Haggai 1

Azerbajani Bible (South) Used in Both Iran and Azerbaijan 2008

Jump to: Chapter 2 →

1داريوش پادشاهين حاکئمئيّتئنئن ائکئنجي ائلي، آلتينجي آيين بئرئنده، شِاَلتي‌اِل اوغلو يهودا والئسي زِروبّابئله و يِهوصاداق اوغلو باش کاهئن يوشَعه پيغمبر حَجَه‌ي واسئطه‌سئله ربّئن سؤزو نازئل اولدو:

2"قوشونلار ربّی بله ديئر: «بو خالق ديئر کي، حله ربّئن معبدئني تزه‌دن قورماق واختي چاتماييب.»"

3ربّئن بو سؤزو پيغمبر حَجه‌ي واسئطه‌سئله نازئل اولدو:

4"بو معبد خارابا قالديغي حالدا، مگر سئزئن اوچون واختي‌دير کي، دامي ياراشيقلي اِولرئنئزده اوتوراسينيز؟"

5ائندي قوشونلار ربّی بله ديئر: "حيات يوللارينيز حاقّيندا ياخشي دوشونون.

6چوخ اَکئبسئنئز، آمّا آز گؤتوروبسونوز. يِيئرسئنئز، آمّا دويمورسونوز. ائچئرسئنئز، آمّا سوسوزلوغونوز ياتمير. گِيئنئرسئنئز، آمّا پالتارينيز سئزي ائستي ساخلامير. مَواجئبئنئز جيريق کئسه‌يه قويولور."

7قوشونلار ربّی بله ديئر: "حيات يوللارينيز حاقّيندا ياخشي دوشونون.

8داغلارا چيخيب آغاج گتئرئن و معبدي تزه‌دن قورون کي، منئم اوندان خوشوم گلسئن و عئزّتله‌نئم." بونو دئيَن ربدئر.

9"چؤخ شي گؤزله‌دئنئز، آمّا باخ، آز اولدو. آز اولاني دا اِوه گتئرنده اونلاري سوووردوم. نه اوچون؟" قوشونلار ربّی بويورور: "منئم معبدئم خارابا قالديغي حالدا، سئز اؤز اِولرئنئزله مشغولسونوز.

10سئزدن اؤتري بونا گؤره گؤيلر شِحئني، يِر ده محصولونو کَسدي.

11يِره، داغلارا، تاخيلا، تزه شرابا، زيتون ياغينا، تورپاغين يتئردئيي هر محصولا، ائنسانا، حيوانا و اَللرئنئزئن بوتون زحمتئنه من قوراقليق اعلان اتدئم."

12شِاَلتي‌اِل اوغلو زِروبّابئل‌له يِهوصاداق اوغلو باش کاهئن يوشَع و خالقين صاغ قالانلاري اؤزلرئنئن تاريسي ربّئن ددئکلرئندن، يعني پيغمبر حَجه‌يئن سؤزوندن ائطاعت اتدئلر. چونکي اونو اونلارين تاريسي رب گؤنده‌رمئشدي. خالق ربدن قورخدو.

13ربّئن اِلچئسي حَجه‌ي رَبدن آلديغي وظئفه ائله خالقا بله ددي: "رب ديئر: «من سئزئنله‌يَم.»"

14رب شِاَلتي‌اِل اوغلو يهودا والئسي زِروبّابئلي، يِهوصاداق اوغلو باش کاهئن يوشَعي و خالقين بوتون صاغ قالانلاريني روحلانديردي. خالق گلدي و اؤزلرئنئن تاريسي اولان قوشونلار ربّئن معبدئنده ائشلَمَيه باشلادي.

15بو حادئثه داريوش پادشاهين حاکئمئيّتئنئن ائکئنجي ائلي، آلتينجي آيين ائيئرمي دؤردونده باش وردی.

Jump to: Chapter 2 →