Malachi 1

Azerbajani Bible (South) Used in Both Iran and Azerbaijan 2008

Jump to: Chapter 2 →

1بو ائخطار ربّئن مَلاکي واسئطه‌سئله ائسرايئله ددئيي سؤزدور.

2رب ديئر: "سئزي سِودئم." لاکئن سئز ديئب سوروشورسونوز: "بئزي نجه سِودئن؟" رب ده جاواب ورئر: "عئسو يعقوبون قارداشي مگر ديئلدي؟ آمّا من يعقوبو سِودئم،

3عئسودان نئفرت اتدئم. اونون داغلاريني وئران اتدئم، مئراثيني چؤل چاقّاللارينا وردئم."

4اِدوملولار ديئرلر: "بئز اَزئلدئک، آمّا خاراباليقلاري تزه‌دن برپا اده‌جيئک." آنجاق قوشونلار ربّی بله ديئر: "قوي اونلار قورسون، آمّا من ييخاجاغام. اونلارين اؤلکه‌سي پئسلئک بؤلگه‌سي چاغيريلاجاق، اؤزلري ده همئشه ربّئن قضبلَندئيي خالق اولاراق تانيناجاقلار."

5سئز بونو گؤزلرئنئزله گؤرنده دئيه‌جکسئنئز: "رب ائسرايئل سرحدلرئندن کناردا دا عظمتلئدئر!"

6قوشونلار ربّی ديئر: "ای آديما حؤرمت اتمه‌يَن کاهئنلر! اوغول آتاسينا، قول آغاسينا حؤرمت گؤرسه‌دئر. اگر من آتايام، هاني منه حؤرمتئنئز؟ اگر آغايام، هاني مندن قورخونوز؟ لاکئن سئز «آدينا نجه حؤرمت اتمه‌دئک؟» ديئب سوروشورسونوز.

7قوربانگاهيمين اوستونده نجئس يمک تقدئم ادئرسئنئز، حله «سني نجه نجئس اتدئک؟» ديئب سوروشورسونوز. «ربّئن سوفره‌سئنه حؤرمت اتمک لازيم ديئل» دِمَکله بله ادئرسئنئز.

8کور حيواني قوربان آديندا گتئرمک مگر پئس ائش ديئل؟ توپال و يا ناخوش حيوان قوربان اتمک مگر پئس ائش ديئل؟ بله بئر حيواني اؤز والئنه تقدئم ات، گؤر سندن مگر راضي قالير و يا سني مگر قبول ادئر؟" قوشونلار ربّی بويورور.

9"ائندي بئزه لوطف اتمه‌سي اوچون تارييا يالوارين. سئز بله قوربانلار گتئرَرکَن، او مگر سئزي قبول اِدَر؟" قوشونلار ربّی ديئر.

10"کاش کي آرانيزدان بئر نفر قوربانگاهيمدا بوش-بوشونا اود يانديرماماق اوچون معبدئن قاپيلاريني باغلايايدي! من سئزدن راضي ديئلم، گتئره‌جَيئنئز تقدئملري دا قبول اتميه‌جيم." قوشونلار ربّی بويورور.

11"گونشئن چيخديغي يردن باتديغي يِره قدر، منئم آديم مئلّتلر آراسيندا عظمتلي اولاجاق. هر يرده آديما بوخور يانديريلاجاق، تمئز تقدئملر گتئرئله‌جک. چونکي مئلّتلر آراسيندا آديم عظمتلي اولاجاق." قوشونلار ربّی بويورور.

12"سئز "پروردئگارين سوفره‌سي نجئسدئر، چؤره‌يئنه ده حؤرمت اتمک لازيم ديئل» دئيه‌رَک، آديمين موقدّسلئيئني پوزورسونوز.

13اوسته‌لئک «بو نه زحمتدئر» ديئب منه بورون ساللاييرسينيز." قوشونلار ربّی بويورور. "سئز قوربان اولاراق اوغورلوق، چولاق، ناخوش حيوان گتئرئرسئنئز، من اونو سئزدن مگر قبول اده‌رم؟" رب ديئب سوروشور.

14"لعنت اولسون او فيريلداقچييا کي، سوروسوندن نذئر اتدئيي اِرکَک حيوان عوضئنه، ربّه قوصورلو حيوان قوربان ادئر! چونکي من بؤيوک بئر پادشاهام و آديم مئلّتلر آراسيندا هيبتلي‌دئر.» قوشونلار ربّی بويورور.

Jump to: Chapter 2 →