Obadiah 1

Azerbajani Bible (South) Used in Both Iran and Azerbaijan 2008

Jump to:

1بو، عوبَديايا ظاهئر اولان رؤيادير. پروردئگار رب اِدوم باره‌سئنده بله ديئر: بئز ربدن بئر خبر اشئتدئک، مئلّتلر آراسينا بئر قاصئد گؤنده‌رئلئب کي، دسئن: "قالخين، گلئن اِدومون ضئدّئنه قالخيب اونونلا دؤيوشَک!"

2"باخ، من سني مئلّتلر آراسيندا کئچئک اده‌جيم؛ هامي سنه خور باخاجاق.

3ای سن قايا چاتلاقلاريندا مسکن سالان، اِوئني اوجالاردا قوران! اوره‌يئنئن تکبّورو سني آلداديب، قلبئنده ديئرسن: «منی کئم يِره ييخا بئلر؟»"

4رب بويورور: "سن قارتال کئمي يوخاري اوچاسان دا، يوواني اولدوزلار آراسيندا قوراسان دا، من سني اورادان يِره ييخاجاغام.

5اگر گجه يانينا اوغرولار و حرامئلر گلسَيدئلر، نجه هلاک اولاردين! مگر آنجاق اؤز ائسته‌دئکلري قدر اوغورلامازديلار؟ باغينا اوزوم ييغانلار گلسَيدئلر، مگر بئر نِچه سالخيمي بوراخمازديلار؟

6عئسونون هر شيي نجه تالان ادئله‌جک، گئزلي خزئنه‌لري آشکارا چيخاريلاجاق.

7سنئنله عهد باغلايانلارين هاميسي سني اؤلکَندن قوواجاقلار، موتّفئق‌لرئن سني آلداديب مغلوب اده‌جکلر. سنئنله چؤرک يئيَنلر سنه تله قوراجاقلار، هچ کس ده بونو آنلاماياجاق."

8رب بويورور: "مگر او گون اِدومون حئکمتلي آداملاريني، عئسو داغينداکي دوشونجه‌لی‌لري محو اتميه‌جيم؟

9او واخت ای تِيمان، ائگئد آداملارين اِله قورخويا دوشه‌جک کي، عئسو داغلارينين هر ساکئني قيرغيندا اؤلدوروله‌جک.

10قارداشين يعقوبا اتدئيئن قدّارليغا گؤره سن خجالت ائچئنده قالاجاقسان، ابده کئمي کَسئله‌جکسن.

11ياداِللي‌لر اونون ثروتئني آپاران گون سن اوزاقدا دوروب تاماشا اتدئن. اَجنبي‌لر اونون شهر دروازالاريندان گئرئب اورشَلئم اوچون پوشک آتان گون، سن ده اونلاردان بئري کئمي رفتار اتدئن.

12قارداشلارينين بدبختلئک گونوندن ذؤوق آلما، يهودا نسلئنئن هلاک اولدوقلاري گون سِوئنمه، اونلارين هلاکتي گونده، اونلارين پرئشانليغيندا، سن فخر اتمه.

13خالقيمين موصئبت گونونده اونلارين شهر دروازالاريندان گئرمه‌يئن، باشلارينا بلا گلن گون اونلارين فلاکتئني شادليقلا تاماشا اتمه‌يئن، باشلارينا بلا گلن گون اونلارين مالينا اَل اوزاتمايين!

14قاچان يهودا اؤولادلاريني اؤلدورمک اوچون يول آيريجيندا دايانمايين، او عذابلي گون قورتولانلاري دوشمنه تسلئم اتمه‌يئن!

15چونکي ربّئن گونو بوتون مئلّتلر اوچون ياخينلاشير، ای اِدوم، سن نه جور ادئبسن، سنه ده بله ادئله‌جک، عمل‌لرئنئن عوضي اؤز باشينا گله‌جک!

16نجه سئز منئم موقدّس داغيمدا ائچدئنئز، بوتون خالقلار دا دورمادان ائچه‌جکلر، ائچئب اوداجاقلار، اِله بئل کي، هچ واخت يوخ ائمئش.

17لاکئن قورتولوش تاپانلار صَحيون داغينا ييغيلاجاقلار، او داغ موقدّس اولاجاق. يعقوب نسلی اؤز مولکونه صاحئب اولاجاق!

18او واخت يعقوب نسلی اود، يوسئف نسلی آلوو، لاکئن عئسو نسلی کولَش اولاجاق، اونلار عئسو نسلئني يانديريب محو اده‌جکلر. عئسو نسلئندن قورتولان اولماياجاق. چونکي رب بله ديئب.

19نِگِب ساکئنلري عئسو داغيني، هامار بؤلگه‌ده ياشايانلار فئلئسطلی‌لرئن بؤلگه‌سئني، اونلار اِفرايئمله سامئره زَمئلرئني، بِنيامئنلی‌لر ده گئلعادي آلاجاقلار.

20اسئر اولان بو ائسرايئل قوشونو کي، صارِفَته قدر کَنَعانلي‌لارين آراسينداديرلار، اورشَلئم اسئرلري کي، صِفارَدده‌دئرلر، نِگِب شهرلرئني ضبط اده‌جکلر.

21خالقي قورتارانلار، صَحيون داغينا چيخيب عئسو داغينا حؤکم اده‌جکلر، و مملکت ربّئن اولاجاقدير."

Jump to: