Zechariah 1

Azerbajani Bible (South) Used in Both Iran and Azerbaijan 2008

Jump to: Chapter 2 →

1داريوشون حاکئمئيّتئنئن ائکئنجي ائلئنده، سکّئزئنجي آيدا عئدّو اوغلو بِرِکيا اوغلو زِکَرئيّا پيغمبره ربّئن بو سؤزو نازئل اولدو:

2"رب آتالارينيزا چوخ قضبلَندي.

3اونا گؤره ده سن اونلارا دِه کي، قوشونلار ربّئن سؤزو بله‌دئر: «منه طرف قاييدين.» قوشونلار ربّی بويورور، «من ده سئزه طرف قاييدارام.» قوشونلار ربّی ديئر.

4"آتالارينيز کئمي اولمايين! قاباقکی پيغمبرلر اونلارا اعلان اتدئلر کي، قوشونلار ربّی اونلارا ديئر: ‹پئس عمل‌لرئنئزدن و پئس ائشلرئنئزدن قاييدين.› آمّا اونلار اشئتمه‌دئلر و منه قولاق آسماديلار.» رب بله بويورور.

5«آتالارينيز ائندي هارادادير؟ پيغمبرلر ده مگر ابده‌جک ياشاييرلار؟

6آمّا قوللاريم پيغمبرلره امر اتدئيئم سؤزلرئم و قايدالاريم، مگر اونلارين باشلارينا گلمه‌دي؟» اونلار دا تؤوبه ادئب ددئلر: «قوشونلار ربّی عمل‌لرئمئزه و ائشلرئمئزه گؤره بئزه نه اتمه‌يي دوشونوب، بئزئمله اِله ده رفتار ادئب.»"

7داريوشون حاکئمئيّتئنئن ائکئنجي ائلئنده، اون بئرئنجي آي اولان شِبات آيينين ائيئرمي دؤردونجو گونو، عئدّو اوغلو بِرِکيا اوغلو زِکَرئيّا پيغمبره ربّئن بو سؤزو نازئل اولدو:

8گجه ياريسي گؤردوم کي، قيرميزي آتا مئنمئش بئر نفر، دره‌نين دئبئنده، مَرسئن آغاجلاري آراسيندا دوروب. اونون آرخاسيندا دا قيرميزي، کَهر و آغ آتلار وار ائدي.

9من سوروشدوم: "آي آغام، بونلار نه‌دئر؟" منئمله دانيشان ملک ددي: "بونلارين نه اولدوغونو سنه گؤرسه‌ده‌جيم."

10مَرسئن آغاجلاري آراسيندا دوران آدام جاواب وردی: "بونلاري رب گؤنده‌رئب کي، دونياني گَزسئنلر."

11اونلار مَرسئن آغاجلاري آراسيندا دوران ربّئن مَله‌يئنه جاواب وردئلر: "بئز دونياني گَزدئک و گؤردوک کي، بوتون دونيا آسايئش و اَمئن-آمانليق ائچئنده‌دئر."

12او واخت ربّئن مَله‌يي ددي: "ای قوشونلار ربّي، بو يتمئش ائل عرضئنده قضبلَندئيئن اورشَلئمه و باشقا يهودا شهرلرئنه، نه واختا قدر مرحمت اتمَيه‌جکسن؟"

13رب منئمله دانيشان مَلَيه ياخشي و تَسلّي‌ورئجي سؤزلرله جاواب وردی.

14منئمله دانيشان مَلَک منه ددي: "سؤزو اعلان ادئب دِه کي، قوشونلار ربّی بله ديئر: «اورشَلئم و صحيون اوچون بؤيوک قيرت واريمدير.

15لاقيد اولان مئلّتلرئن ضئدّئنه چوخ قضبلئيَم. چونکي من بئر آز قضبلَنمئشدئم، لاکئن اونلار وضعئيّتي داها دا پئسلَشدئردئلر.»

16بونا گؤره ده رب بله ديئر: «من مرحمتله اورشَلئمه قاييتديم. اِوئم گئنه اورادا قورولاجاق، اورشَلئمئن اوستونه اؤلچو ائپي چکئله‌جک.» قوشونلار ربّی بويورور.

17سن بئر داها اعلان ادئب دِه کي، قوشونلار ربّی بله ديئر: «شهرلرئم گئنه بوللوقلا دولوب داشاجاق. رب صحيونا گئنه تسلّی وره‌جک، گئنه اورشَلئمي سِچه‌جک.»"

18سونرا باشيمي قالديريب باخديم و دؤرد بوينوز گؤردوم.

19منئمله دانيشان مَلَکدن سوروشدوم: "بونلار نه‌دئر؟" او منه جاواب وردی: "بونلار يهوداني، ائسرايئلي و اورشَلئمي داغيتميش بوينوزلاردير."

20او واخت رب منه دؤرد اوستا گؤرسَتدي.

21سوروشدوم: "بونلار نه اتمه‌يه گلئرلر؟" او جاواب وردی: "بو بوينوزلار يهوداني اِله داغيتديلار کي، هچ کس باشيني قالديرا بئلمه‌دي. بو اوستالار دا گلدئلر کي، يهودا اؤلکه‌سئني داغيتماق اوچون بوينوز قالديران مئلّتلري دهشته گتئرئب بوينوزلاريني يِره چيرپسينلار."

Jump to: Chapter 2 →