Zephaniah 1

Azerbajani Bible (South) Used in Both Iran and Azerbaijan 2008

Jump to: Chapter 2 →

1آمون اوغلو يهودا پادشاهي يوشئيانين حؤکم اتدئيي دؤورده، خئزقئيا اوغلو اَمَريا اوغلو گِدَليا اوغلو کوشي اوغلو صِفَنيايا ربّئن سؤزو نازئل اولدو.

2رب بله بويورور: "ير اوزوندن هر شيي سئلئب سوپوره‌جيم."

3رب بله بويورور: "ائنسانلاري، حيوانلاري، گؤيده‌کي قوشلاري، دهنزده‌کي باليقلاري، پئس آداملاري ائله شر اوچون قورولان تله‌لرئني سئلئب سوپوره‌جيم، ائنساني ير اوزوندن يوخ اده‌جيم.

4اَلئمي اوزاديب يهودا و اورشلئم ساکئنلرئنئن هاميسيني جزالانديرجاغام، بَعَل بوتلرئندن قالانلاري بورادان سئلئب آتاجاغام، بوتپرست دئن خادئملري ائله کاهئنلرئنئن آدلاريني دا بورادان سئلئب آتاجاغام.

5داملاردا گؤي جئسئملرئنه سجده ادنلري، هم ربّئن آدينا، هم ده مئلکوم بوتو آدينا آند ائچئب سجده ادنلري،

6ربّئن يولوندان دؤنَنلري، ربّی آختايارمايانلاري، ربدن مصلحت آلمايانلاري، بورادان يوخ اده‌جيم."

7پروردئگار ربّئن حوضوروندا ساکئت اولون، چونکي اونون گونو ياخينلاشير، رب قوربان حاضيرلاييب، قوناقلاريني تقدئس ادئب.

8رب ديئر: "او قوربان گونو امئرلري، شاهزاده‌لري، اجنبي دَبي ائله گِيئنَنلري جزالانديرجاغام.

9او گون آستاناسيندان تولّانيب کِچَنلري، اؤز آغالارينين اِولرئني قدّارليق و حئيله ائله دولدورانلاري جزالانديرجاغام."

10رب بويورور: "او گون باليقلار دروازاسيندان فغان سَسي، ائکئنجي محلّه‌دن شئون سَسي، تپه‌لردن ده بؤيوک گورولتو اِشئدئله‌جک."

11ای بازار محلّه‌سئنئن ساکئنلري، شئون ادئن! بوتون تاجئرلر محو اولاجاق، تَره‌زئده گوموش چکن آداملار قيريلاجاق.

12او زامان اورشَلئمئن هر طرفئني چيراقلارلا آختاراجاغام، خوشبخت ياشايان لاقيدلري، چؤکونتوسو دئبئنه چؤکموش شراب کئمي اولانلاري، اورَکلرئنده "رب هچ نه اتمَز، نه ياخشيليق، نه ده پئسلئک" دئيَنلري جزالانديرجاغام.

13وار-دؤولتلري تالان اولاجاق، اِولري خارابا قالاجاق، تئکدئکلري اِولرده ياشاماياجاقلار، اونلار، سالديقلاري اوزوملوکلرئن شرابلاريني ائچميه‌جکلر.

14ربّئن مؤحتشم گونو ياخينلاشير، ياخينلاشير، تِز گله‌جک. اشئت! ربّئن گونونده فرياد سَسي آجي اولاجاق، ائگئد آدام بِله، فرياد اده‌جک.

15او گون قضب گونو اولاجاق: اذئيّت و مشقّت گونو، وئران و محو گونو، قارانليق و ظولمت گونو، قارا بولودلارين بورودويو گونو اولاجاق!

16او گون ائستِحکاملي شهرلره، اوجا بوي کونج بورجلرئنئن ضئدّئنه دؤيوش اوچون چالينان کَره‌نايلارين، دؤيوش نعره‌لرئنئن سَسلَندئيي گونو اولاجاق!

17آداملارا اِله بلا گؤنده‌ره‌جيم کي، کور کئمي هارايا گده‌جکلرئني بئلميه‌جکلر، چونکي ربّئن ضئدّئنه گوناه ادئبلر. قانلاري توز کئمي تؤکوله‌جک، باغيرساقلاري يرده چورويوب پِيئن اولاجاق."

18ربّئن قضب گونونده قيزيل-گوموشلري اونلاري قورتارا بئلميه‌جک، اونون قيرتلي قضبئنئن آلوووندا بوتون اؤلکه يانيب يوخ اولاجاق، چونکي او، اؤلکه‌نئن ساکئنلرئني کامئل بئر شکئلده قيراجاق.

Jump to: Chapter 2 →