1 Samuel 2

Balinese

1Dane Hana tumuli ngastawa sapuniki: “Ida Sang Hyang Widi Wasa sampun ngebekin manah titiange antuk suka rena. Ambate bagian titiange malantaran pakardin Idane. Titiang prasida ngedekin musuh titiange. Ambate suka rena manah titiange, duaning Ida Sang Hyang Widi Wasa sampun nulungin titiang.

2Nenten wenten sane suci sakadi Ida, duaning nenten wenten sane nyamenin Ida. Samaliha nenten wenten pasayuban sakadi Widin iragane.

3Wusan ragane mabaos sumbung, sampunang ragane mabaos nemah misuh. Santukan Ida Sang Hyang Widi Wasa, Widi sane maha wikan, samaliha Ida sane nepasin sakancan laksanan manusane.

4Panah prajurite sane teguh-teguh sampun lung, nanging anake sane lemet sayan siteng.

5Anake sane riin wareg, sane mangkin nanggap upah mangda polih pangan. Nanging anake sane riin nandang seduk, sane mangkin nenten malih nandang seduk. Anake sane bekung sampun maderbe pianak pepitu, nanging anake sane maderbe pianak akeh, raris kabanggayang kantun newek.

6Ida Sang Hyang Widi Wasa ngamademang wiadin nguripang. Ida sane nedunang anake ka lokan anake padem, tur Ida taler sane ningtingang saking irika.

7Ida ngawinang anake dados tiwas wiadin sugih. Ida sane ngasorang miwah Ida taler sane nginggilang.

8Ida sane ningtingang anake sane nista saking buke, tur mangunang anake sane kakirangan saking kasangsaranipune. Ida nadosang ipun sawitran parapangerane tur ngenahang ipun ring genahe sane luih. Dasar gumine punika druen Ida Sang Hyang Widi Wasa, tur ring duurnyane Ida sampun ngwangun jagate puniki.

9Ida nyayubin urip kaulan Idane sane satia tuu, nanging jadmane sane dursila sirna ring petenge. Jadmane nenten prasida molih kamenangan malantaran kakuatannyane newek.

10Meseh-meseh Ida Sang Hyang Widi Wasa pacang kasirnayang. Ida jaga nyander ipun antuk kilap saking langite. Ida pacang nepasin jagate makasami. Ida pacang mapaica kawisesan ring sang prabu druen Idane, Ida jaga ngawinang sang prabu seselikan Idane setata molih kamenangan.”

11Dane Elkana tumuli mantuk ka Rama nanging Dane Samuel okan danene kantun ring Silo ngiring Sang Pandita Eli dados pangancang Ida Sang Hyang Widi Wasa.

12Mungguing oka-okan Dane Eli sane lanang-lanang punika anak sane dursila, sami nenten lingu ring Ida Sang Hyang Widi Wasa.

13Samaliha nenten ngamanggehang darmaning pandita. Nyabran wenten anak ngaturang aturan, rikala daginge sedek karatengang, parekan panditane raris rauh makta garpu magigi tiga,

14saha macek daginge sane sedek karatengang ring jambangane. Napija sane kenianga antuk garpune punika, punika dados druen sang pandita. Kadi asapunika laksanan parapanditane marep ring sakancan anak Israele sane rauh maturan ring Silo.

15Malah-malah ring sapunapine sadereng muluk daginge punika kambil tur kaborbor, parekan sang pandita sampun rauh saha mabaos ring sang maturan punika kadi asapuniki: “Aturang daginge punika akidik ring sang pandita, jaga panggang dane. Dane nenten kayun nampi daging sane malablab. Dane ngarsayang sane kantun matah.”

16Yening anake sane maturan punika masaur sapuniki: “Ngiringja margiang paindikan sane patut tur borbor dumun muluke puniki. Wusan punika rarisang ambil sane encen mantuk ring kayun.” Parekan panditane jaga masaur sapuniki: “Sampunangja sapunika. Aturangja daginge punika sane mangkin. Yening nenten kadi asapunika, tiang jaga ngambil antuk kawirosan.”

17Dosan oka-okan Dane Eli punika kalintang abot ring ayun Ida Sang Hyang Widi Wasa, duaning dane nganistayang aturan sane katur ring Ida Sang Hyang Widi Wasa.

18Mungguing Dane Samuel ngraris ngaturang ayah ring ayun Ida Sang Hyang Widi Wasa, tur dane ngangge jubah suci sane malakar kain lenen.

19Nyabran taun ibun danene ngardi jubah alit pabuat dane, tur makta jubahe punika ring dane, rikala ibun danene sareng-sareng ring ajin danene lunga ngaturang aturan taunan.

20Dane Eli tumuli ngamertanin Dane Elkana miwah rabin danene, kadi asapuniki pangandikan danene: “Mugi Ida Sang Hyang Widi Wasa mapaica katurunan pabuat ragane uli sig anake luh ene, ngentinin ane suba aturang ragane teken Ida.” Sasampune punika dane raris pada mawali mantuk.

21Ida Sang Hyang Widi Wasa ngamertanin Dane Hana, mawinan dane raris ngembasang oka lanang tetiga miwah oka istri kekalih. Duk punika Dane Samuel sane anom punika sampun sayan duur ring ayun Ida Sang Hyang Widi Wasa.

22Dane Eli sane mangkin sampun lingsir pisan. Dane tan mari mireng indik laksanan oka-okan danene marep ring wong Israele. Samaliha dane sareng kalih sampun merem ngajak paraistrine sane ngayah ring gapuran Kemah Linggih Ida Sang Hyang Widi Wasa.

23Duaning punika Dane Eli tumuli ngandika ring oka-okan danene sapuniki: “To ngudiang dadi cening malaksana ane buka keto, makejang anake suba ngorahang teken bapa unduk kajelekan laksanan ceninge.

24Suudja cening malaksana buka keto. Ene paundukan ane abot pesan, ane raosanga baan parakaulan Ida Sang Hyang Widi Wasa.

25Yening ada anak pelih tekening timpalnyane, Ida Sang Hyang Widi Wasa ane lakar melanin ia. Nanging yening lantas ada anak madosa tekening Ida, nyen ane lakar melanin ia?” Nanging pangandikan ajin danene nenten karengayang. Duaning punika Ida Sang Hyang Widi Wasa mapakayunan nyedayang dane sareng kalih.

26Dane Samuel, anake anom punika, sayan duur tur sayan kaledangin antuk Ida Sang Hyang Widi Wasa miwah kasihin antuk manusa.

27Wenten nabi adiri ngrauhin Dane Eli tur mabaos ring dane sapuniki: “Sapuniki sabdan Ida Sang Hyang Widi Wasa: Ulun suba ngedengang ragan Ulune teken leluur kitane Harun muah kulawargannyane dugase ia enu dadi panjak Piraune di Mesir.

28Buina Ulun suba milih ia uli pantaran suku bangsa Israele makejang buat dadi panditan ulune, apanga ia ngaturang aturan sig pamorboran aturan Ulune, ngenyit pasepan muah nganggo baju epod buat nampa nyuun sabdan Ulune. Buina Ulun suba maang kita nyuang duman uli aturane ane maborbor.

29To ngudiang kita ngedotang aturan-aturan ane arsayang Ulun uli kaulan Ulune. Buina ngudiang dadi kita ngajiang pianak kitane lebihan teken Ulun malantaran kita ngulurin ia ngempek dewekne aji bagian aturan ane paling melaha ane aturanga baan kaulan Ulune teken Ulun.

30Ane malu, Ulun Sang Hyang Widi Wasa, Widin Israele suba majanji lakar nadiang kulawarga muah suku bangsan kitane pandita buat samakelo-kelonne. Nanging ane jani Ulun tusing lakar ngamanggehang janjin Ulune. Ulun lakar nginggilang anake ane subakti teken Ulun, nanging geting teken ane nganistayang Ulun.

31Sasajaane lakar teka masanne, Ulun lakar ngamatiang sakancan truna-trunane ane ada di kulawarga muah suku bangsan kitane, kanti tusing ada ane lakar enu idup kanti tua.

32Kita lakar nemu kakewehan tur iri ati nepukin sakancan mertane ane lakar paicayang Ulun teken wong Israele ane lenan, nanging tusing ada anak idup kanti tua di pantaran kulawargan kitane.

33Sakewala ada aukud katurunan kitane ane lakar lugrain Ulun idup, tur ia lakar dadi pandita ane ngancangin Ulun. Nanging ia lakar buta tur tusing ngelah pangajap. Sajaba ia, makejang katurunan kitane lakar mati salah pati.

34Yening pianak kitane makadadua, nah ento Hopni muah Pinehas suba mati sibarengan, ento lakar dadi ciri pabuat kita mungguing sakancan ane suba sabdayang Ulun ento lakar kasidan.

35Ulun lakar nyelik satunggaling pandita ane subakti teken Ulun tur sedia nglaksanayang sapakarsan Ulune. Ulun lakar mapaica katurunan teken ia, ane lakar setata ngancangin sang prabu seselikan Ulune.

36Asing-asing katurunan kitane ane nyidaang nutugang tuuh lakar tangkil teken panditane ento buat nunas pipis wiadin dedaaran. Ia lakar pada mapinunas apanga kalugra nulungin parapanditane apanga ia nyidaang maan dedaaran.”

← Chapter 1 Chapter 3 →