2 Chronicles 1

Balinese

1Ida Sang Prabu Salomo, putran Ida Sang Prabu Daud, ngamanggehang linggih idane ring kaprabon Israel, tur Ida Sang Hyang Widi Wasa, Widin idane ngamertanin ida, saha ngawinang kawisesan idane kalintang ageng.

2Ida Sang Prabu Salomo mapaica prentah ring sakancan prakanggen idane sane ngamong rakyat panyiuan miwah sane ngamong rakyat panyatusan, miwah sakancan pamong prajane, sakancan pamimpin kulawargane, miwah sakancan rakyat sane lianan,

3mangda ida, dane ipun sareng sami pada nyarengin ida ka genah panyungsungane ring Gibeon. Ida lunga mrika, santukan irika genah Kemah Linggih Ida Sang Hyang Widi Wasa sane pecak kakardi ring tegal melakange antuk Dane Musa, parekan Ida Sang Hyang Widi Wasa.

4(Peti Prajanjiane, sampun wenten ring Yerusalem, kagenahang ring satunggiling kemah, sane kawangun antuk Ida Sang Prabu Daud, duk ida makta Peti Prajanjiane punika saking Kiryat-Yearim.)

5Pamorboran aturan sane malakar antuk temaga, sane pecak kakardi antuk Dane Besaleel okan Dane Uri, putun Dane Hur, taler wenten ring Gibeon, ring ajeng Kemah Linggih Ida Sang Hyang Widi Wasa. Irika Ida Sang Prabu Salomo, kairing antuk rakyate sami ngaturang sembah ring Ida Sang Hyang Widi Wasa.

6Ring ajeng Kemahe punika, ida sang prabu muspa ring ayun Ida Sang Hyang Widi Wasa, masrana ngaturang aturan ring duur pamorboran aturane sane malakar temaga punika. Ida ngaturang wewalungan siu ukud, sane katampah tur kaborbor ring duur pamorboran aturane punika.

7Ring wengi punika Ida Sang Hyang Widi Wasa mapakantenang raga ring Ida Sang Prabu Salomo, sarwi mataken sapuniki: “Apa ane lakar tunas kita teken Ulun?”

8Ida Sang Prabu Salomo matur sapuniki: “Palungguh IRatu tansah nyinahang sih pasuecan sane ageng ring ajin titiange Daud, tur sane mangkin Palungguh IRatu nglugrain titiang ngentosin ida madeg ratu.

9Duh Ratu Sang Hyang Widi Wasa, tegepangja janjin Palungguh IRatu sane sampun kardi Palungguh IRatu tumiba ring ajin titiange. Palungguh IRatu sampun ngamanggehang titiang dados ratu, sane ngreh satunggiling bangsa sane tan keni winilang akehipune.

10Duaning punika, icenja titiang kawicaksanaan miwah kawidagdaan buat mrentah ipun. Yen nenten kadi asapunika, sapunapike jaga antuk titiang mrentah bangsa druen Palungguh IRatu sane ageng puniki?”

11Ida Sang Hyang Widi Wasa nyaurin Ida Sang Prabu Salomo, sapuniki: “Kita suba milih ane patut. Kita tusing nunas kasugihan, arta brana, kabinawan, kapatian musuh-musuh kitane, wiadin umur panjang buat dewek kitane, nanging kita nunas kawicaksanaan muah pangresepan, apanga kita nyidayang mrentah kaulan Ulune, ane serahang Ulun teken kita.

12Ulun lakar mapaica kawicaksanaan muah pangresepan teken kita. Sajaba ento, Ulun masih lakar ngicen kita kasugihan, arta brana, muah kabinawan, lebihan teken sakancan pararatu ane suba madeg malunan wiadin ane lakar madeg durian teken kita.”

13Sasampune punika Ida Sang Prabu Salomo raris kesah saking genah panyungsungane ring Gibeon, inggih punika genah Kemah Linggih Ida Sang Hyang Widi Wasa, raris mawali ka Yerusalem. Irika ida mrentah wong Israele makasami.

14Ida raris munduhang prajurit sane nunggang kreta siu nanggu samas akehipun, miwah prajurit nunggang kuda roras tali akehipun. Prajurit-prajurite punika, abagian genahang ida ring Yerusalem, tur sisanipun genahang ida ring kota-kota sane lianan.

15Sapanyeneng idane, akeh mas miwah perake ring Yerusalem asah ring akeh batune, miwah akeh taru arase asah ring taru aane sane biasa.

16Parasudagar ida sang prabu ngetangang kuda-kuda sane katumbas saking Mesir miwah Kewe,

17miwah kreta-kreta sane katumbas saking Mesir. Sudagar-sudagare punika tumuli ngadol kuda miwah kreta punika ring pararatune ring Het miwah ring Siria. Kretane punika sane asiki mapangarga aji tigang atak bidang jinah perak, miwah kudane asiki mapangarga aji karobelah bidang jinah perak.