Daniel 1

Balinese

1Ring taun sane kaping tiga panyeneng Ida Sang Prabu Yoyakim ring Yehuda, Ida Sang Prabu Nebukadnesar sang prabune ring Babel, ngebug kota Yerusaleme tur ngurung kotane punika.

2Ida Sang Hyang Widi Wasa manggayang Ida Sang Prabu Nebukadnesar ngaonang Ida Sang Prabu Yoyakim sarwi ngambil makudang-kudang arta branan Perhyangan Agunge. Ida Sang Prabu Nebukadnesar makta makudang-kudang tawanan mantuk ka Babel, tur ngenahang arta brana sane sampun rampas ida saking Perhyangan Agunge ring pura-puran dewan idane ring Babel.

3Ida Sang Prabu Nebukadnesar mrentahang Dane Aspenas pangageng prakangge druene mangda dane milih makudang-kudang anak truna saking pantaran wong Israele sane matawan punika, inggih punika sane saking kulawarga puri miwah sulinggihe.

4Sane kapilih punika patut anak sane bagus, pradnyan, sampun polih paurukan sane becik, cacep tur nenten madue cacad, mangdane sang kapilih pantes jaga ngaturang ayah ring puri. Dane Aspenas patut ngurukang anake punika ngwacen miwah nulis nganggen basa Babel.

5Sang prabu taler mrentahang, mangda nyabran rahina anake sane kapilih punika kawehin ajeng-ajengan pateh sakadi ajengan kulawargan ida sang prabu. Sasampune tigang warsa anake punika kalatih, ipun patut katangkilang ka ajeng ida sang prabu.

6Ring pantaran anake sane kapilih punika, taler wenten Dane Daniel, Hananya, Misael miwah Dane Asarya. Dane sareng sami punika saking suku Yehuda.

7Pangageng prakanggene ngicen pesengan sane lianan pabuat dane, inggih punika: Dane Daniel kapesengin Beltsasar, Dane Hananya kapesengin Sadrah, Dane Misael kapesengin Mesah, tur Dane Asarya kapesengin Abednego.

8Dane Daniel sampun mastikayang ring kayun, mungguing dane nenten jaga ngletehin ragan danene malantaran ngajengang lungsuran, minakadinipun ajeng-ajengan miwah toya anggur saking puri. Punika awinanipun Dane Daniel mapinunas ring Dane Aspenas mangda dane ledang nulungin,

9tur Ida Sang Hyang Widi Wasa ngawinang Dane Aspenas sayang ring Dane Daniel.

10Nanging Dane Aspenas kalintang ajerih ring sang prabu. Duaning punika dane tumuli mabaos ring Dane Daniel sapuniki: “Ida sang prabu sampun mutusang indik sane patut ajeng tur inum ragane. Yening ragane raris kanten nenten seger sakadi anake sane tiosan, sinah ida jaga ngamademang tiang.”

11Sasampune punika, Dane Daniel raris rauh ring anake sane kapisara antuk Dane Aspenas buat miara Dane Daniel miwah sawitran danene sareng tiga punika, tumuli mabaos sapuniki:

12“Indayangja buktiang sajeroning dasa rahina. Icenja tiang nunas jangan miwah nginum toya ning kewanten.

13Sasampun punika, bandingang raris tiang ring anake sane polih lungsuran ida sang prabu, tur sasampune punika rarisang margiang kaputusan ragane manut pamanggih ragane marep ring sikian tiange.”

14Dane nglugrain sang patpat ngamargiang indike punika sajeroning dasa rahina.

15Sasampune puput sengkere punika, dane sareng patpat kanten segeran tur sitengan yen bandingang ring anake sane nunas lungsuran ida sang prabu.

16Duaning punika ngawit saking rahinane punika sapanglanturipun, Dane Daniel miwah parasawitran danene punika kalugrain ngajengang jangan, sane kanggen ngentosin lungsuran ida sang prabu.

17Ida Sang Hyang Widi Wasa mapaica kaweruhan miwah kapradnyanan ngeniang indik tatua-tatua ring sang patpat. Sajawining punika Dane Daniel taler polih panugrahan buat ngartiang ipian miwah wahyu.

18Ring pamuput taun sane kaping tiga, sakadi sengker sane kapaicayang antuk ida sang prabu, Dane Aspenas raris ngajak anake truna-truna punika makasami tangkil ring ajeng Ida Sang Prabu Nebukadnesar.

19Sang prabu tumuli mabebaosan ring anake truna-truna punika makasami, tur ida ledang ring Dane Daniel, Hananya, Misael miwah Dane Asarya langkungan ring sane tios-tiosan. Duaning punika, sang patpat raris kapangandikayang makarya ring puri.

20Napi kewantenja indik sane katakenang antuk ida sang prabu, yadiastu indik sane sulit sami kuningin, tur kapradnyanan sang patpat punika langkungan kantos tikel ping dasa, yen bandingang ring kapradnyanan sakancan wiku miwah baliane sane wenten ring jagate irika.

21Dane Daniel tetep kantun ring puri kantos Ida Sang Prabu Kores, ratune ring Persia ngaonang jagat Babele.