Genesis 18

Balinese

1Sasampune punika Ida Sang Hyang Widi Wasa raris makantenang raga ring Dane Abraham, nampek ring wit taru sucine ring Mamre, rikala dane malinggih ring pamedal kemah danene, rikalaning panes banteng.

2Rikala dane matolihan, dane ngaksi wenten anak sareng tetiga ngadeg ring ajeng danene. Sasampun cingakin dane anake punika, dane raris malaib saking pamedal kemah danene, praya mendakin anake punika. Dane raris sumungkem,

3saha kadulurin atur sapuniki: “Inggih Ratu, yening Palungguh IRatu ledang ring titiang sampunangja Palungguh IRatu ngimpasin titiang, parekan druene puniki.

4Lugrainja titiang ngambil toya akidik, wasuhinja cokor Palungguh IRatune, tur rarisangja masandekan ring sor wit tarune puniki.

5Santukan Palungguh IRatu sampun ledang rauh ring cecanggahan titiange puniki, lugrainja titiang ngambil roti akidik, mangda kenakan Palungguh IRatu nglanturang pamargi.” Pasaur tamiune punika sapuniki: “Jalanangja buka ane orahang kita ento!”

6Dane Abraham tumuli digelis lunga ka kemah, nganampekin Dane Sara, sarwi mabaos sapuniki: “Enggalangja adi! Jemak tepunge ane melah telung takeh! Laut adonang, tur ngaeja roti ane bunter-bunter.”

7Dane Abraham tumuli malaib ka genah banteng danene, dane ngejuk godel sane mokoh tur becik asiki, raris kapaicayang ring parekan danene, tur iparekan tumuli digelis ngolah godele punika.

8Sasampune punika, dane raris ngambil mentega miwah susu miwah ulam godele sane sampun kaolah punika, raris kasodayang ring ajeng tamiune punika. Tamiune marayunan, ring sor wit tarune punika, kayahin antuk Dane Abraham.

9Anake punika raris mabaos ring dane sapuniki: “Dijake Sara kurenan kitane?” Dane raris matur sapuniki: “Ipun wenten ring kemah.”

10Salah tunggal tamiune punika raris ngandika sapuniki: “Sasajaane buin atiban Ulun lakar buin nekain kita. Kala ditu Sara kurenan kitane lakar ngelah pianak muani adiri.” Dane Sara mirengang indike punika saking jelanan kemahe sane ring ungkur Dane Abraham.

11Dane Abraham miwah Dane Sara daweg punika sampun pada lingsir tur yusan danene sampun langkung, samaliha Dane Sara sampun wusan ngraja.

12Duaning punika, Dane Sara ica sarwi mabaos ring kayun sapuniki: “Punapike tiang pacang malih kasemaran, sasampune tiang tua cakluk miwah kurenan tiange sampun tua?”

13Ida Sang Hyang Widi Wasa raris ngandika ring Dane Abraham sapuniki: “Ngudiang dadi Sara kedek tur ngraos kene: ‘Sajake tiang lakar nglekadang pianak, apa buin jani kurenan tiange suba tua?’

14Apake ada paundukan ane tuara kasidan pabuat Ida Sang Hyang Widi Wasa? Buin atiban, di dinane ane suba kapastiang ento, Ulun lakar buin teka nekain kita. Kala ditu Sara lakar ngelah pianak muani adiri.”

15Nanging Dane Sara nenten ngangken, sarwi mabaos sapuniki: “Titiang tan wenten kedek,” santukan dane ajerih. Nanging Ida Sang Hyang Widi Wasa ngandika sapuniki: “Tusingja saja keto! Mula tuah saja kita kedek.”

16Anake punika raris mamargi saking irika, tur maksian ka kota Sodom. Dane Abraham taler mamargi ngiringang anake punika.

17Ida Sang Hyang Widi Wasa raris makayun-kayun kadi asapuniki: “Apake Ulun lakar makebang teken Abraham, unduk ane lakar laksanayang Ulun?

18Sawireh ia lakar dadi bangsa ane gede tur kuasa, buina malantaran ia sakancan bangsane di gumine lakar nampi merta.

19Buina Ulun suba nyelik ia, apanga ia nguduhang pianak-pianak muah katurunannyane pageh malaksana buka ane pituduhang Ulun, malantaran malaksana ane patut muah adil. Yen suba keto Ulun lakar negepang janjin Ulune teken Abraham, buka ane suba janjiang Ulun teken ia.”

20Sasampune punika Ida Sang Hyang Widi Wasa raris masabda sapuniki: “Liu pesan anake ngrimikang unduk gumi Sodom muah Gomorane, buina sasajaane dosannyane suba kaliwat gede.

21Ulun lakar tumurun nelokin ia, apa saja laksanannyane buka munyin anake ane ngrimikang ia, buka ane suba pireng Ulun. Ulun makeneh nawang ane amun sasajaane.”

22Tamiune sareng kalih raris kesah saking irika, tumuli mamargi ngungsi ka kota Sodom, nanging Dane Abraham kantun ngadeg ring ayun Ida Sang Hyang Widi Wasa.

23Dane Abraham raris nganampekin Ida, tumuli matur kadi asapuniki: “Punapike Palungguh IRatu jaga masmi jadmane sane patut sinarengan ring jadmane sane dursila?

24Sapunapi minab, yen wenten anak patut sareng seket diri ring kotane punika? Punapike Palungguh IRatu jaga masmi genahe punika? Punapike Palungguh IRatu nenten ledang mapaica pangampura ring ipun, malantaran jadmane sane patut sareng seket diri sane wenten ring kotane punika?

25Mugija indike punika kaedohang saking ayun Palungguh IRatu, inggih punika ngamademang jadma sane patut sinarengan ring jadmane dursila, kantos jadmane sane patut punika tan bina sakadi jadmane sane dursila. Dumadak indike punika kaedohang saking ayun Palungguh IRatu. Punapike sang maraga Hakim ring sakuub jagate nenten jaga nepasin ipun saha adil?”

26Ida Sang Hyang Widi Wasa raris masabda sapuniki: “Yening di kota Sodom ada dapetang Ulun anak ane patut seket diri, ulihan anake ento Ulun lakar ngampurayang kotane ento.”

27Dane Abraham tumuli matur sapuniki: “Sujatinipun titiang sampun prasangga pisan matur ring ayun Palungguh IRatu Sang Hyang Widi Wasa, yadiastu titiang puniki waluya buk miwah abu.

28Ring pradene jadmane sane patut kirang limang diri, punapike Palungguh IRatu jaga masmi kotane punika, malantaran kirang malih limang diri punika?” Ida raris masabda sapuniki: “Ulun tusing lakar masmi kotane ento, yening ada dapetang Ulun jlema patut setiman diri ditu.”

29Dane Abraham malih nglanturang atur danene sapuniki: “Ring pradene wenten wantah petang dasa diri jadma sane patut irika, sapunapi minab.” Ida masabda sapuniki: “Ulun tusing lakar masmi kotane ento ulihan jlemane petang dasa diri ento.”

30Dane Abraham malih matur: “Mugi Palungguh IRatu Sang Hyang Widi Wasa nenten menggah yening titiang matur malih apisan. Ring pradene wantah sareng tigang dasa sane wenten irika, sapunapi minab?” Ida malih masabda: “Ulun tusing lakar masmi kotane ento, yening ditu ada dapetang Ulun jlema patut telung dasa diri.”

31Dane malih matur: “Sawiaktinipun titiang sampun kalintang purun matur ring Palungguh IRatu Sang Hyang Widi Wasa. Ring pradene irika wantah wenten jadma patut kalih dasa diri kewanten, sapunapi minab?” Ida malih masabda: “Ulun tusing lakar masmi kotane ento, ulihan jlemane ane duang dasa diri ento.”

32Dane malih matur: “Mugi Palungguh IRatu Sang Hyang Widi Wasa nenten menggah yening titiang matur malih apisan kewanten. Ring pradene sane wenten irika wantah dasa diri kewanten, sapunapi minab?” Ida malih masabda: “Ulun tusing lakar masmi kotane ento, ulihan jlemane ane adasa ento.”

33Sasampun Ida puput masabda ring Dane Abraham, Ida Sang Hyang Widi Wasa raris kesah saking irika, tur Dane Abraham raris mawali ka genah danene.

← Chapter 17 Chapter 19 →