Psalms 110

Balinese

1Ida Sang Hyang Widi Wasa ngandika ring ratun titiange, sapuniki: “Maija cening negak dini di tengawan Ajine, kanti musuh-musuh ceninge dadiang Aji pajekjekan batis ceninge.”

2Ida Sang Hyang Widi Wasa jaga maicayang kakuasan kaprabon iratune saking Sion. Ida masabda kadi asapuniki: “Prentahja musuh-musuh ceninge makejang!”

3Rikala iratu ngebug meseh-meseh iratune, kaula druene jaga pada ngiring saking suka lila. Sakadi damuhe rikalaning ngedas lemah, kadi asapunika paratruna-trunane jaga pada rauh tangkil ring iratu ring bukit-bukite sane suci.

4Ida Sang Hyang Widi Wasa sampun ngardi prajanjian sane suci, tur Ida nenten jaga ngurungang prajanjian Idane punika. Janjin Idane sapuniki: “Cening lakar madeg pandita salawas-lawase manut sorohan Malkisedeke.”

5Ida Sang Hyang Widi Wasa wenten ring tengen iratune. Yening Ida menggah, Ida jaga ngaonang pararatune sami.

6Ida jaga nibakang tetepasan ring bangsa-bangsane sami, tur jaga ngebekin ranangganane antuk sawa. Ida pacang ngaonang pararatune sane ring jagate sami.

7Ida sang prabu jaga nginum toya saking tukade sane wenten ring sisin margine, tur ida jaga molih kakuatan malih, saha jaga molih ring rana.

← Chapter 109 Chapter 111 →