Psalms 111

Balinese

1Pujija Ida Sang Hyang Widi Wasa! Titiang jaga ngaturang panyuksma ring Ida Sang Hyang Widi Wasa, saking saguluking manah titiange ring pauman parakaulan Idane.

2Ambate luih paindikane sane kakardi antuk Ida Sang Hyang Widi Wasa. Sakancan anake sane marasa liang ring paindikane punika sami pada mamanah ngresepang paindikane punika.

3Sakancan sane kardi Ida punika luih agung pisan. Kadilan Idane langgeng salami-laminipun.

4Ida Sang Hyang Widi Wasa nenten manggayang iraga lali ring pakardi-pakardin Idane sane ngangobin. Ida kalintang sih sueca miwah asung lugraha.

5Ida mapaica pangan kinum ring anake sane ngluihang Ida, tur Ida nenten naenin lali ring prajanjian Idane.

6Ida sampun nyinahang kawisesan Idane ring kaulan Idane, malantaran Ida maicayang jagat wong sunantarane ring ipun.

7Ring saluiring pakardin Idane, Ida maraga satia tuu turing adil. Sakancan pituduh Idane nyandang kapiandel.

8Pituduh-pituduhe punika langgeng salami-laminipun, tur pituduhe punika kapaicayang sajeroning kapatutan miwah kadilan.

9Ida mebasang kaulan Idane, tur Ida ngardi prajanjian sane langgeng ring ipun. Ida maraga suci tur maha wisesa.

10Margi buat ngulati kawicaksanane, punika ngluihang Ida Sang Hyang Widi Wasa. Ida mapaica tetepasan sane patut ring sakancan anake sane sairing ring pituduh-pituduh Idane. Ida patut kapuji salami-laminipun.

← Chapter 110 Chapter 112 →