Psalms 118

Balinese

1Aturangja panyuksma ring Ida Sang Hyang Widi Wasa, santukan Ida kalintang sueca, tur sih pasuecan Idane langgeng salami-laminipun.

2Ngiringja rakyat Israele makasami pada mabaos kadi asapuniki: “Sih pasuecan Idane langgeng salami-laminipun.”

3Ngiringja parapanditan Ida Sang Hyang Widi Wasa makasami pada mabaos kadi asapuniki: “Sih pasuecan Idane langgeng salami-laminipun.”

4Ngiringja sawatek anake sane astiti bakti ring Ida, makasami pada mabaos kadi asapuniki: “Sih pasuecan Idane langgeng salami-laminipun.”

5Ring sajeroning titiang katempuh antuk kamewehan, titiang mapinunas ring Ida Sang Hyang Widi Wasa, tur Ida nagingin pinunas titiange saha mebasang titiang.

6Ida Sang Hyang Widi Wasa ngiangin titiang, titiang nenten pacang ajerih. Napike sane jaga sida kalaksanayang antuk anake marep ring titiang?

7Ida Sang Hyang Widi Wasa mapaica pitulung ring titiang, tur titiang jaga ngeton meseh-meseh titiange kaon.

8Becikan suksrah ring Ida Sang Hyang Widi Wasa, bandingang ring jaga ngandelang manusane.

9Becikan suksrah ring Ida Sang Hyang Widi Wasa, bandingang ring jaga ngandelang parapamimpin manusane.

10Katah meseh-meseh sane ngiter titiang, nanging ipun sirnayang titiang antuk kawisesan Ida Sang Hyang Widi Wasa.

11Ipun ngiter titiang, nanging ipun sirnayang titiang antuk kawisesan Ida Sang Hyang Widi Wasa.

12Ipun pagriung ngrebut titiang sakadi nyawan, nanging titiang nyirnayang ipun. Ipun gelis puun sakadi genine nilap punyan ketket. Titiang nyirnayang ipun masrana kawisesan Ida Sang Hyang Widi Wasa.

13Titiang kasiatin banget pisan kantos tambis-tambis kaon, nanging Ida Sang Hyang Widi Wasa mapaica pitulungan ring titiang.

14Ida Sang Hyang Widi Wasa mapaica kawisesan miwah kasitengan ring titiang, tur Ida sampun ngluputang titiang.

15Piragiangja suryak kamenangan ring kemah-kemah kaulan Ida Sang Hyang Widi Wasa, kadi asapuniki: “Kawisesan Ida Sang Hyang Widi Wasa sane sampun ngawinang punika makasami.

16Kawisesan Idane sane sampun ngawinang iraga menang, inggih punika kawisesan Idane sane luih ring rananggana.”

17Titiang nenten jaga padem, nanging titiang jaga urip, tur jaga nglumbrahang paindikan sane sampun kakardi antuk Ida Sang Hyang Widi Wasa.

18Ida sampun nyisipang titiang banget pisan, nanging Ida nenten manggayang titiang padem.

19Ampakinja titiang korin Perhyangan Agunge. Titiang jaga ngranjing tur ngaturang panyuksma ring Ida Sang Hyang Widi Wasa.

20Puniki kori agung Ida Sang Panembahan, tur wantah jadmane sane patut kewanten sane kalugra ngranjing.

21Duh Ratu Sang Hyang Widi Wasa, titiang muji Palungguh IRatu, santukan Palungguh IRatu nagingin pinunas titiange, tur Palungguh IRatu sampun mapaica kamenangan ring titiang.

22Batune sane kakutang antuk tukang batune, sane kanggep tan paguna, sane mangkin mabalik dados batu sane maha utama.

23Paindikane punika sampun kakardi antuk Ida Sang Hyang Widi Wasa. Punika yuakti ngangobin pabuat iraga.

24Rahinane puniki, rahina kamenangan Ida Sang Hyang Widi Wasa. Ngiringja maliang-liang, tur ngluihang rahinane puniki.

25Duh Ratu Sang Hyang Widi Wasa, luputangja titiang. Duh Ratu Sang Hyang Widi Wasa, lugrainja titiang mangda titiang prasida labda karya.

26Dumadak Ida Sang Hyang Widi Wasa ngamertanin anake sane rauh sajeroning parab Idane. Titiang jaga ngamertanin semeton saking Perhyangan Agung Ida Sang Hyang Widi Wasa.

27Ida Sang Hyang Widi Wasa punika maraga Widi, tur Ida sampun kalintang sueca ring titiang. Pada agemja carang tarune, ngiringja kawitin upacarane samaliha ngiringja iraga mamargi ngilehin pamorboran aturane.

28Palungguh IRatu Widin titiange, tur titiang ngaturang panyuksma ring Palungguh IRatu. Titiang jaga nglumbrahang kagungan Palungguh IRatune.

29Matur panyuksmaja ring Ida Sang Hyang Widi Wasa, santukan Ida maraga sih sueca. Sih pasuecan Idane langgeng salawas-lawasnya.

← Chapter 117 Chapter 119 →