bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Balinese
/
Balinese
/
Psalms 119
Psalms 119
Balinese
1
Bagia sakancan anake sane urip nirmala sane laksanannyane satinut ring pidabdab Ida Sang Hyang Widi Wasa.
2
Bagia sakancan anake sane sairing ring pituduh-pituduh Idane, sane ngiring Ida saking saguluking ati.
3
Ipun nenten naenin malaksana iwang, tur ipun mamargi ring margin Ida Sang Hyang Widi Wasa.
4
Duh Ratu Sang Hyang Widi Wasa, Palungguh IRatu sampun maicayang pidabdab Palungguh IRatu ring titiang, tur ngandikayang mangda titiang saking satia tuu ninutin pidabdabe punika.
5
Sasida-sidan antuk titiang mapakibeh, mangda titiang prasida satia tuu, sajeroning pituduh-pituduh Palungguh IRatune punika.
6
Yening titiang nglinguang pituduh-pituduh Palungguh IRatune makasami, kenginan titiang nenten jaga nemu kimud.
7
Yening titiang minehin tetepasan Palungguh IRatu sane adil, titiang jaga muji Palungguh IRatu antuk manah sane nirmala.
8
Titiang jaga sairing ring pidabdab Palungguh IRatune, duaning punika sampunangja Palungguh IRatu nilar titiang.
9
Sapunapike antuka anake truna mangda uripipune tetep kantun suci nirmala? Wantah malantaran ninutin pituduh-pituduh Palungguh IRatu.
10
Titiang nyadia ngancangin Palungguh IRatu antuk saguluking manah titiange. Gambelja titiang mangda sampunang titiang kantos tempal ring pituduh-pituduh Palungguh IRatune.
11
Titiang nampa nyuun pidabdab Palungguh IRatune, mangda titiang nenten ngardi dosa pamantuka ring Palungguh IRatu.
12
Duh Ratu Sang Hyang Widi Wasa, titiang muji Palungguh IRatu. Patujuhinja titiang margin Palungguh IRatune.
13
Antuk suara sane santer titiang ngwali-walinin sakancan pidabdabe sane sampun paicayang Palungguh IRatu.
14
Titiang demen ninutin pituduh-pituduh Palungguh IRatune langkungan ring maderbe kasugihan sane akeh.
15
Titiang mlajahin pituduh-pituduh Palungguh IRatune, tur titiang ngamargiang paurukan Palungguh IRatune.
16
Titiang suka rena ring pidabdab Palungguh IRatu, tur pituduh-pituduh Palungguh IRatune nenten jaga laliang titiang.
17
Suecaninja titiang, parekan Palungguh IRatu, mangda titiang prasida urip tur ninutin paurukan Palungguh IRatune.
18
Kedatangja matan titiange, mangda titiang mrasidayang ngeton kasujatian kaluihan pidabdab Palungguh IRatune.
19
Titiang iriki ring mrecapada wantah abosbos kewanten. Sampunangja singidanga pituduh-pituduh Palungguh IRatune ring titiang.
20
Manah titiange yuakti kalintang meled, mangda titiang tansah uning ring tetepasan-tetepasan Palungguh IRatune.
21
Palungguh IRatu nglemekin jadmane sane sumbung. Sengkala jadmane sane tempal ring pituduh-pituduh Palungguh IRatune.
22
Luputangja titiang saking panyacad miwah temah pisuhipune, santukan titiang ngamanggehang pidabdab Palungguh IRatune.
23
Parapamrentahe paum mapiguman, tur saigum jaga nglawan titiang. Nanging titiang jaga nelebang paurukan Palungguh IRatune.
24
Pituduh-pituduh Palungguh IRatune ngawinang titiang bungah ring manah, tur pituduh-pituduhe punika minakadi dados juru pitutur titiange.
25
Titiang kakaonang kantos maguyang ring buke. Bangunangja titiang manut sakadi janjin Palungguh IRatune.
26
Titiang ngangkenin saananing paindikan sane sampun laksanayang titiang, tur Palungguh IRatu nyaurin titiang. Patujuhinja titiang margin Palungguh IRatune.
27
Tulunginja titiang mangda titiang mrasidayang ngresep ring pidabdab Palungguh IRatune. Titiang jaga minehin saha teleb paurukan-paurukan Palungguh IRatune sane luih.
28
Titiang kaliput antuk kaduhkitan. Kuatangja titiang, manut sakadi janjin Palungguh IRatune.
29
Piaraja titiang mangda sampunang titiang ngungsi margine sane iwang tur urukja titiang indik pidabdab Palungguh IRatune sajeroning pasuecan Palungguh IRatune.
30
Titiang sampun sedia jaga ngiringang Palungguh IRatu, tur titiang sampun ngamanahin saha teleb tetepasan Palungguh IRatune.
31
Duh Ratu Sang Hyang Widi Wasa, titiang sampun ngiringang pituduh-pituduh Palungguh IRatune. Sampunangja titiang icena manggihin kimud.
32
Titiang meled pisan jaga nuutin pituduh-pituduh Palungguh IRatune punika, santukan Palungguh IRatu jaga ngwewehin pangresepan titiange.
33
Duh Ratu Sang Hyang Widi Wasa, urukja titiang piteges pidabdab Palungguh IRatune tur titiang pacang ninutin pidabdabe punika nyabran rahina.
34
Terangangja pidabdab Palungguh IRatune punika ring titiang, tur titiang jaga ninutin pidabdabe punika. Titiang jaga ngagem pidabdabe punika antuk saguluking manah titiange.
35
Dadosangja titiang satinut ring pituduh-pituduh Palungguh IRatune, santukan sajeroning pituduh-pituduhe punika titiang molih kaliangan.
36
Icenja titiang manah sane meled buat ninutin pidabdab Palungguh IRatune, langkungan ring meled molih kasugihan.
37
Gambelja titiang, mangda sampunang titiang nglinguang paindikan sane tan paguna. Suecaninja titiang, manut sakadi janjin Palungguh IRatune.
38
Pagehangja ngagem prajanjian Palungguh IRatune ring titiang, parekan Palungguh IRatune, inggih punika prajanjian sane kardi Palungguh IRatu ring jadmane sane satinut ring Palungguh IRatu.
39
Luputangja titiang saking panyacad sane ajerihin titiang. Ambate luih tetepasan Palungguh IRatune.
40
Titiang mamanah ninutin pituduh-pituduh Palungguh IRatune. Icenja titiang urip sane anyar, santukan Palungguh IRatu maraga adil.
41
Duh Ratu Sang Hyang Widi Wasa, sinahangja ring titiang agenging sih pasuecan Palungguh IRatu. Rahayuangja titiang satinut ring prajanjian Palungguh IRatune.
42
Malantaran punika titiang mrasidayang nyaurin jadmane sane nyacad titiang, santukan titiang andel ring sabdan Palungguh IRatune.
43
Lugrainja titiang mangda titiang setata maosang kasujatian, santukan pangajap-ajap titiange wenten sajeroning tetepasan Palungguh IRatune.
44
Titiang jaga setata ninutin pidabdab Palungguh IRatune kantos salami-laminipun.
45
Titiang mamanah urip sajeroning kabebasan sane sampurna, santukan titiang misadia ninutin paurukan-paurukan Palungguh IRatune.
46
Titiang jaga nguningayang pituduh-pituduh Palungguh IRatune ring pararatune, tur titiang nenten jaga kimud.
47
Titiang marasa liang sajeroning ninutin pituduh-pituduh Palungguh IRatune, santukan titiang tresna ring pituduh-pituduhe punika.
48
Titiang ngajiang tur tresna ring pituduh-pituduh Palungguh IRatune, tur titiang jaga minehin saha teleb pituduh-pituduh Palungguh IRatune punika.
49
Elingangja prajanjian Palungguh IRatune ring titiang, parekan Palungguh IRatune. Indike punika ngawinang titiang maderbe pangajap-ajap.
50
Yadiastu sajeroning kamewehan, titiang rumasa bungah, santukan prajanjian Palungguh IRatune ngawinang titiang urip.
51
Jadmane sane sumbung tan mari nemah misuh titiang, nanging titiang nenten matilar saking pidabdab Palungguh IRatune.
52
Duh Ratu Sang Hyang Widi Wasa, titiang eling ring tetepasan-tetepasan Palungguh IRatune sane riin, tur punika sane ngawinang titiang rumasa bungah.
53
Rikala titiang ngeton jadmane dursila mamurug pidabdab Palungguh IRatune, titiang gedeg pisan.
54
Sakantun titiange urip ajebos iriki ring jagate, titiang jaga ngawi kidung ngeniang indik pidabdab Palungguh IRatune.
55
Duh Ratu Sang Hyang Widi Wasa, rikala wengi titiang eling ring Palungguh IRatu raris titiang mineh-minehin pidabdab Palungguh IRatune.
56
Titiang rumasa kalintang bagia sajeroning ninutin pituduh-pituduh Palungguh IRatune.
57
Duh Ratu Sang Hyang Widi Wasa, wantah Palungguh IRatu sane dados daging pangaptin titiange. Titiang majanji jaga nglaksanayang pidabdab-pidabdab Palungguh IRatune.
58
Titiang mapinunas ring Palungguh IRatu antuk saguluking manah, mangda Palungguh IRatu kawelas arsan ring titiang sakadi sane sampun janjiang Palungguh IRatu.
59
Titiang sampun minehin pamargin titiange, tur titiang majanji jaga ninutin pituduh-pituduh Palungguh IRatune.
60
Pramangkin titiang jaga nglaksanayang pituduh-pituduh Palungguh IRatune punika.
61
Jadmane dursila sampun masang jeet pabuat titiang, nanging titiang nenten lali ring pidabdab Palungguh IRatune.
62
Rikalaning tengah wengi titiang bangun, tur titiang muji Palungguh IRatu, duaning tetepasan Palungguh IRatune sane adil.
63
Titiang dados sawitran sakancan anake sane ngancangin Palungguh IRatu, tur dados sawitran sakancan anake sane nglaksanayang pidabdab Palungguh IRatune.
64
Duh Ratu Sang Hyang Widi Wasa, mrecapadane kabekin antuk sih pasuecan Palungguh IRatune sane nenten rered-rered. Urukja titiang pituduh-pituduh Palungguh IRatune punika.
65
Duh Ratu Sang Hyang Widi Wasa, Palungguh IRatu sampun ngamanggehang janjin Palungguh IRatune. Palungguh IRatu kalintang sueca ring titiang parekan Palungguh IRatune.
66
Icenja titiang kawicaksanan miwah pangweruhan, santukan titiang pracaya ring pituduh-pituduh Palungguh IRatune.
67
Sadurung Palungguh IRatu nyisipang titiang, titiang biasa malaksana iwang, nanging sane mangkin titiang ninutin sabdan Palungguh IRatune.
68
Ambate ageng sueca lan panugrahan Palungguh IRatune. Urukja titiang pituduh-pituduh Palungguh IRatune.
69
Jadmane sane sumbung sampun maosang paindikan sane bobab ngeniang indik titiange, nanging titiang ninutin titah-titah Palungguh IRatune antuk saguluking manah titiange.
70
Jadmane punika nenten ngresep nanging titiang muponin kaliangan sajeroning pidabdab Palungguh IRatune.
71
Ukuman titiange punika dados paindikan sane becik pabuat titiang, santukan paindikane punika ngawinang titiang mlajahin pituduh-pituduh Palungguh IRatune.
72
Pidabdab sane paicayang Palungguh IRatu punika pabuat titiang, pikenohipun langkungan ring sakancan jinahe sane wenten ring jagate.
73
Palungguh IRatu ngardi titiang, tur Palungguh IRatu sampun ngrahayuang titiang. Icenja titiang pangresepan, mangda titiang prasida mlajahin pidabdab-pidabdab Palungguh IRatune.
74
Jadmane sane ngluihang Palungguh IRatu jaga rumasa liang, rikalaning ipun ngeton titiang, santukan titiang pracaya ring janjin Palungguh IRatune.
75
Duh Ratu Sang Hyang Widi Wasa, tetepasan Palungguh IRatune sawiakti adil. Samaliha yening Palungguh IRatu nyisipang titiang, punika malantaran Palungguh IRatu satia tuu.
76
Icenja mangda sih pasuecan Palungguh IRatune sane nenten rered-rered punika nglipurang titiang, sakadi sane sampun janjiang Palungguh IRatu ring titiang, parekan Palungguh IRatune.
77
Suecaninja titiang mangda titiang urip, santukan titiang manggih kaliangan sajeroning pidabdab Palungguh IRatune.
78
Dumadak jadmane sane sumbung jaga molih kimud, santukan ipun sampun nglingga caya jaga nalih titiang. Nanging pabuat titiang, titiang jaga teleb minehin titah-titah Palungguh IRatune.
79
Dumadak jadmane sane ngluihang Palungguh IRatu pada rauh ring titiang, inggih punika jadma sane uning ring pituduh-pituduh Palungguh IRatune.
80
Dumadak titiang mrasidayang ngamargiang pituduh-pituduh Palungguh IRatune saha sampurna, mangda sampunang titiang nandang kimud.
81
Duh Ratu Sang Hyang Widi Wasa, titiang sampun kaleson nyantosang Palungguh IRatu buat jaga ngrahayuang titiang. Titiang kapiandel ring sabdan Palungguh IRatune.
82
Matan titiange sampun kuyu nyantosang paindikan sane janjiang Palungguh IRatu. Titiang raris mataken, malih pidanke Palungguh IRatu jaga mapaica pitulungan ring titiang?
83
Titiang sampun tan paguna sakadi klukuh wadah anggure sane sampun kakutang. Nangingke titiang nenten naenin lali ring pituduh-pituduh Palungguh IRatune.
84
Malih amunapike suenipun titiang patut nyantosang? Malih pidanke Palungguh IRatu jaga nyisipang jadmane sane nyangsaren titiang?
85
Jadmane sumbung sane nenten ninutin pidabdab Palungguh IRatune, ipun sampun ngardi bangbang buat jaga mencanen titiang.
86
Pituduh-pituduh Palungguh IRatune punika makasami patut pisan kagega. Jadmane pada nyangsaren titiang antuk pangindrajala, duaning punika icenja titiang pitulungan.
87
Ipun tambis-tambis sida karya jaga ngamademang titiang, nanging titiang nenten nglemenahang pituduh-pituduh Palungguh IRatune.
88
Malantaran sih pasuecan Palungguh IRatune sane nenten rered-rered, tur Palungguh IRatu nyuecanin titiang, kantos titiang prasida ninutin pidabdab-pidabdab Palungguh IRatune.
89
Duh Ratu Sang Hyang Widi Wasa, sabdan Palungguh IRatune punika pageh salami-laminipun. Sabdane punika langgeng wenten ring suargan.
90
Kasatian Palungguh IRatune langgeng salami-laminipun. Palungguh IRatu sampun ngenahang jagate puniki ring genahnyane, tur ipun kantun tetep rauh mangkin.
91
Makasami kantun kantos rauh mangkin malantaran pituduh Palungguh IRatune, santukan ipun makasami punika dados parekan Palungguh IRatune.
92
Yening pidabdab Palungguh IRatu punika sampun nenten dados pukuh kaliangan titiange, meh titiang sampun padem malantaran kasangsaran titiange.
93
Titiang nenten jaga naenin nglemenahang titah-titah Palungguh IRatune, santukan malantaran punika Palungguh IRatu sampun miara urip titiange.
94
Titiang puniki druen Palungguh IRatune. Luputangja titiang! Titiang sampun mapakibeh jaga ninutin pituduh-pituduh Palungguh IRatu.
95
Jadmane dursila sampun nyantosang nyadia jaga ngamademang titiang, nanging titiang jaga teleb minehin pidabdab-pidabdab Palungguh IRatune.
96
Titiang sampun mlajahin mungguing saluiring paindikan punika wenten watesipun. Nanging pituduh Palungguh IRatune punika sampurna.
97
Ambate tresnan titiange ring pidabdab Palungguh IRatu punika. Arahina mepek titiang mineh-minehin pidabdabe punika.
98
Pituduh Palungguh IRatu punika setata nyarengin titiang. Indike punika ngawinang titiang wicaksana imbangang ring meseh-meseh titiange.
99
Titiang ngresep langkungan ring sakancan gurun titiange, santukan titiang teleb minehin titah-titah Palungguh IRatune.
100
Kawicaksanan titiange langkungan ring anake lingsir-lingsir, santukan titiang ninutin pituduh-pituduh Palungguh IRatune.
101
Titiang sampun ngedohang sakancan laksanane dursila, santukan titiang mamanah ninutin sabdan Palungguh IRatune.
102
Titiang sampun nenten nglemenahang titah-titah Palungguh IRatune, santukan Palungguh IRatu ngraga sane dados gurun titiange.
103
Ambate manis rasan titah-titah Palungguh IRatu punika. Indike punika manisan ring madune.
104
Titiang molih kawicaksanan saking pidabdab Palungguh IRatu punika, duaning punika titiang geting ring sakancan laksanane sane corah.
105
Sabdan Palungguh IRatune minakadi suluh buat nuntun titiang, samaliha makadados galang pabuat margin titiange.
106
Titiang jaga ngagem sumpah titiange, buat ninutin titah-titah Palungguh IRatune sane adil.
107
Duh Ratu Sang Hyang Widi Wasa, kasangsaran titiange sawiakti kalintang abot. Lugrainja titiang kantun urip, sakadi janjin Palungguh IRatune.
108
Duh Ratu Sang Hyang Widi Wasa, ledang Palungguh IRatu nrima atur panyuksman titiange, tur urukja titiang pituduh-pituduh Palungguh IRatune.
109
Titiang setata nyadia nyerahang urip titiange, tur titiang nenten lali ring pidabdab Palungguh IRatune.
110
Jadmane dursila masang jeet pabuat titiang, nanging titiang tan tempal ring pituduh-pituduh Palungguh IRatune.
111
Pituduh-pituduh Palungguh IRatune punika dados paderbean titiange sane langgeng. Pituduh-pituduhe punika dados kaliangan manah titiange.
112
Titiang sampun ngamastiang jaga ninutin pidabdab-pidabdab Palungguh IRatune, kantos rauh panemayan titiange pacang padem.
113
Titiang geting ring jadmane sane nenten saking saguluking manah astiti bakti ring Palungguh IRatu. Nanging titiang tresna ring pidabdab Palungguh IRatune.
114
Palungguh IRatu makadados patindih miwah pasayuban titiange. Titiang wantah ngajap-ajap prajanjian Palungguh IRatune.
115
Ih jadmane ane kakaput baan dosa, johangja ibane uli sig icange. Icang lakar ninutin pituduh Widin icange.
116
Icenja titiang kakuatan, sakadi janjin Palungguh IRatune, mangda titiang tetep urip. Sampunangja titiang kadoanga sajeroning pangajap-ajap titiange.
117
Gambelja titiang mangda titiang rahajeng, tur titiang pacang setata nglinguang pituduh-pituduh Palungguh IRatune.
118
Palungguh IRatu nulak sawatek jadmane sane tempal ring pidabdab Palungguh IRatune. Rencananipun sane bobab punika tan paguna.
119
Sakancan jadmane sane dursila kaonang Palungguh IRatu tan bina sakadi lulune, duaning punika titiang tresna ring pituduh-pituduh Palungguh IRatune.
120
Titiang rumasa ajerih ring Palungguh IRatu. Titiang kalintang ajerih ring tetepasan Palungguh IRatune.
121
Titiang sampun nglaksanayang napi sane patut miwah sane becik. Sampunangja titiang serahanga ring meseh-meseh titiange.
122
Ledang Palungguh IRatu majanji, mungguing Palungguh IRatu jaga mapaica pitulungan ring parekan Palungguh IRatune. Sampunangja icena jadmane sane sumbung jaga ngereh titiang.
123
Matan titiange kantos kuyu ngajap-ajap pitulungan saking Palungguh IRatu, inggih punika indik kabebasan sane sampun janjiang Palungguh IRatu.
124
Titahja titiang manut sih pasuecan Palungguh IRatune sane nenten rered-rered, tur urukja titiang pituduh-pituduh Palungguh IRatune.
125
Titiang puniki parekan Palungguh IRatu. Icenja titiang pangresepan, mangda titiang uning ring paurukan-paurukan Palungguh IRatune.
126
Duh Ratu Sang Hyang Widi Wasa, puniki sampun panemayan Palungguh IRatune jaga ngamargiang pakarsan Palungguh IRatune, santukan jadmane sampun pada tempal ring pidabdab Palungguh IRatune.
127
Titiang tresna ring pidabdab Palungguh IRatune langkungan ring tresnan titiange ring mas, langkungan ring mase sane pinih becika.
128
Duaning punika titiang sairing ring sakancan titah Palungguh IRatu, tur titiang geting ring sawatek pamargine sane iwang.
129
Paurukan Palungguh IRatune kalintang luih. Titiang satinut ring paurukane punika saking saguluking manah titiange.
130
Katerangan ngeniang indik paurukan-paurukan Palungguh IRatu punika ngawinang jadmane sane nambet dados wicaksana.
131
Bungut titiange sebakang titiang santukan kameledan titiange ring pituduh-pituduh Palungguh IRatune.
132
Cingakja titiang tur suecaninja titiang, sakadi sane sampun margiang Palungguh IRatu marep ring sakancan jadmane sane astiti bakti ring Palungguh IRatu.
133
Sampunangja titiang icena labuh, sakadi sane sampun janjiang Palungguh IRatu tur sampunangja icena titiang kakaonang antuk kadursilane.
134
Luputangja titiang saking jadmane sane nindes titiang, mangda titiang prasida nglaksanayang pituduh-pituduh Palungguh IRatune.
135
Mertaninja titiang malantaran Palungguh IRatu nyinahang teja wedanan Palungguh IRatune, tur urukja titiang pidabdab Palungguh IRatune.
136
Yeh matan titiange membah sakadi tukad, santukan rakyate nenten nglaksanayang pidabdab Palungguh IRatune.
137
Duh Ratu Sang Hyang Widi Wasa, Palungguh IRatu maraga wicaksana, tur pidabdab Palungguh IRatu punika adil.
138
Pidabdab sane sampun margiang Palungguh IRatu punika sawiakti adil tur patut.
139
Tangkah titiange kebus santukan pedih basang titiange duaning meseh-meseh titiange nenten nglinguang pituduh-pituduh Palungguh IRatune.
140
Ambate pasti janjin Palungguh IRatune. Ambate tresnan titiange ring janjine punika.
141
Titiang puniki tan paguna miwah nista, nanging titiang nenten nglemenahang paurukan Palungguh IRatune.
142
Kadilan Palungguh IRatune jaga manggeh salami-laminipun, tur pidabdab Palungguh IRatune setata patut.
143
Titiang kalikub antuk kamewehan miwah karesresan, nanging pituduh-pituduh Palungguh IRatune ngawinang titiang suka rena.
144
Titah Palungguh IRatune setata adil. Icenja titiang pangresepan, mangda titiang tetep urip.
145
Titiang nunas ica ring Palungguh IRatu saking saguluking manah titiange. Duh Ratu Sang Hyang Widi Wasa saurinja titiang janten titiang jaga ninutin pituduh-pituduh Palungguh IRatune.
146
Titiang nunas ica ring Palungguh IRatu. Luputangja titiang, malantaran punika titiang jaga ngamanggehang pidabdab Palungguh IRatune.
147
Sadurung suryane endag, titiang masesambatan nunas tulung ring Palungguh IRatu. Pangajap-ajap titiange wantah ring janjin Palungguh IRatune.
148
Awengi mepek titiang nenten dados pules buat minehin tur nelebang titah-titah Palungguh IRatune.
149
Duh Ratu Sang Hyang Widi Wasa, malantaran sih pasuecan Palungguh IRatune sane nenten rered-rered punika, pirengangja pinunas titiange. Sinahangja pasuecan Palungguh IRatune, sayubinja urip titiange.
150
Jadmane sane nyapa kadi aku, sane nyangsaren titiang sampun sayan nganampekin titiang, inggih punika jadma sane nenten naenin ngamanggehang pidabdab Palungguh IRatune.
151
Nanging, duh Ratu Sang Hyang Widi Wasa, Palungguh IRatu nampek ring titiang tur sakancan pituduh-pituduh Palungguh IRatune punika kukuh bakuh.
152
Sane nguni titiang sampun uning ring titah-titah Palungguh IRatune. Palungguh IRatu ngamanggehang titah-titahe punika kantos salami-laminipun.
153
Cingakja kasangsaran titiange, tur rahayuangja titiang santukan titiang tan nglemenahang pidabdab Palungguh IRatune.
154
Tindihinja wicaran titiange, tur bebasangja titiang. Rahayuangja titiang sakadi sane sampun janjiang Palungguh IRatu.
155
Jadmane sane dursila nenten karahayuang, santukan ipun nenten nglaksanayang pidabdab Palungguh IRatu.
156
Nanging, duh Ratu Sang Hyang Widi Wasa, sih kawelas arsan Palungguh IRatune kalintang ageng. Sinahangja kawelas arsan Palungguh IRatune, tur rahayuangja titiang.
157
Titiang katah pisan maderbe meseh miwah jadmane sane nindes titiang, nanging titiang nenten lenga nglaksanayang pidabdab Palungguh IRatune.
158
Rikala titiang ngeton jadmane sane dura cara, titiang rumasa kalintang seneb ring manah, santukan ipun nenten ngamanggehang pituduh-pituduh Palungguh IRatune.
159
Duh Ratu Sang Hyang Widi Wasa, indayangja aksi tresnan titiange ring titah-titah Palungguh IRatune punika. Sih pasuecan Palungguh IRatune nenten naenin masalin. Duaning punika rahayuangja titiang.
160
Unteng pidabdab Palungguh IRatu punika, inggih punika kasujatian, tur sakancan tetepasan Palungguh IRatune sane adil punika langgeng salami-laminipun.
161
Jadmane sane makuasa tan pakrana jaga ngebug titiang, nanging titiang ngluihang pidabdab Palungguh IRatune.
162
Ambate liang manah titiange, santukan janjin Palungguh IRatune, sakadi liang jadmane sane muponin arta brana sane katah.
163
Titiang kalintang geting ring paindikan sane kalintang bobab, nanging titiang tresna ring pidabdab Palungguh IRatune.
164
Arahina ping pitu titiang ngaturang panyuksma, pabuat tetepasan Palungguh IRatune sane adil.
165
Jadmane ane tresna ring pidabdab Palungguh IRatune, ipun muponin sutrepti sane sampurna, tur tan wenten indik sane ngawinang ipun sengkala.
166
Duh Ratu Sang Hyang Widi Wasa, titiang nyantosang Palungguh IRatu, buat ngrahayuang titiang, tur titiang nglaksanayang sapituduh Palungguh IRatune.
167
Titiang ninutin paurukan-paurukan Palungguh IRatune, tur titiang tresna ring paindikan punika saking saguluking manah.
168
Titiang ninutin titah-titah miwah pituduh Palungguh IRatune. Palungguh IRatu ngaksi saluiring sane laksanayang titiang.
169
Duh Ratu Sang Hyang Widi Wasa, dumadak sesambatan titiange buat nunas pitulungan rauh ring ayun Palungguh IRatune. Icenja titiang pangresepan sakadi sane sampun janjiang Palungguh IRatu.
170
Pirengangja pangastawan titiange, tur rahayuangja titiang manut ring janjin Palungguh IRatune.
171
Titiang jaga setata muji Palungguh IRatu, santukan Palungguh IRatu ngurukang titiang pidabdab Palungguh IRatune.
172
Titiang jaga makidung ngeniang indik pidabdab Palungguh IRatune, santukan pituduh-pituduh Palungguh IRatu punika adil.
173
Palungguh IRatu tansah sedia mapaica pitulungan ring titiang, santukan titiang ngiringang pituduh-pituduh Palungguh IRatune.
174
Duh Ratu Sang Hyang Widi Wasa, ambate meled titiange ring pitulungan Palungguh IRatu sane pacang ngrahayuang titiang. Titiang molih kaliangan sajeroning pidabdab-pidabdab Palungguh IRatu punika.
175
Icenja titiang urip mangdane titiang prasida muji Palungguh IRatu. Dumadakja titah-titah Palungguh Iratune nulungin titiang.
176
Titiang ngumbara milehan waluya sakadi biri-biri sane ical. Duaning punika ledang Palungguh IRatu rauh ngruruh titiang, parekan Palungguh IRatune, santukan titiang nenten nglemenahang pidabdab Palungguh IRatune.
← Chapter 118
Chapter 120 →