Psalms 86

Balinese

1Duh Ratu Sang Hyang Widi Wasa, pirengangja pinunas titiange, tur saurinja titiang, santukan nenten wenten anak sane nulungin titiang, samaliha titiang lemet.

2Luputangja titiang saking sang pati, santukan titiang subakti ring Palungguh IRatu. Luputangja titiang, santukan titiang puniki parekan Palungguh IRatu, tur titiang andel ring Palungguh IRatu.

3Palungguh IRatu sane dados Widin titiange, duaning punika suecaninja titiang, titiang ngastawa ring Palungguh IRatu arahina mepek.

4Duh Ratu Sang Hyang Widi Wasa, lugrainja parekan druene kaliangan, santukan pangastawan titiange munggah ka ayun Palungguh IRatu.

5Palungguh IRatu sueca ring titiang tur ngampurayang titiang, tur bek antuk pasuecan sane nenten rered-rered pabuat sakancan anake sane ngastawa ring Palungguh IRatu.

6Duh Ratu Sang Hyang Widi Wasa, pirengangja pangastawan titiange. Pirengangja sesambatan titiange nunas pitulungan.

7Titiang mapinunas ring Palungguh IRatu rikalaning masa kamewehan, santukan Palungguh IRatu nagingin pangastawan titiange.

8Duh Ratu Sang Hyang Widi Wasa, tan wenten Widi sane nyamenin Palungguh IRatu. Nenten wenten Widi sane mrasidayang ngardi paindikan sakadi sane sampun kardi Palungguh IRatu.

9Sakancan bangsane sane sampun kardi Palungguh IRatu, jaga pada rauh sumungkem ring ayun Palungguh IRatune. Ipun jaga muji kagungan Palungguh IRatune.

10Palungguh IRatu mawisesa tur ngardi paindikan-paindikan sane ngangobin, tur wantah Palungguh IRatu kewanten sane maraga Widi.

11Duh Ratu Sang Hyang Widi Wasa nikayangja ring titiang napi sane patut laksanayang titiang, tur titiang jaga satinut ring Palungguh IRatu saking satia tuu. Urukja titiang ngancangin Palungguh IRatu saking manah nguleng astiti bakti.

12Titiang jaga muji Palungguh IRatu antuk saguluking manah titiange, duh Ratu Sang Hyang Widi Wasa, Widin titiange. Titiang jaga nglumbrahang kagungan Palungguh IRatune ngantos salami-laminipun.

13Ambate ageng sih pasuecan Palungguh IRatune sane nenten rered-rered punika tumiba ring titiang! Palungguh IRatu sampun ngrahayuang titiang saking bangbang patine.

14Duh Ratu Sang Hyang Widi Wasa, jadmane sane ngagu mamanah nglawan titiang tur grombolan jadmane sane angkara sampun ngindayang ngamademang titiang, inggih punika jadmane sane nenten lingu ring Palungguh IRatu.

15Nanging duh Ratu Sang Hyang Widi Wasa, Palungguh IRatu maraga Widi sane asung lugraha miwah sih sueca, sane tansah sabar, tur tansah kapiolasan miwah satia tuu.

16Cingakja titiang tur suecaninja titiang. Kuatangja titiang tur luputangja titiang, santukan titiang ngancangin Palungguh IRatu sakadi sane sampun kalaksanayang antuk memen titiange.

17Duh Ratu Sang Hyang Widi Wasa, lugrainja titiang bukti ngeniang indik-indik kabecikan Palungguh IRatu. Jadmane sane geting ring titiang jaga nandang kimud, rikalaning ipun ngeton mungguing Palungguh IRatu sampun mapaica kaliangan miwah pitulungan ring titiang.

← Chapter 85 Chapter 87 →