Psalms 87

Balinese

1Ida Sang Hyang Widi Wasa ngwangun kotan Idane ring duur bukite sane suci.

2Ida asih sueca ring kota Yerusalem langkungan tinimbang ring genah-genahe sane lianan ring Israel.

3Ih kotan Ida Sang Hyang Widi Wasa, padingehangja sakancan paundukan ibane ane melah, ane nikayang Ida kene:

4“Di kalane Ulun naptarang bangsa-bangsa ane satinut teken Ulun, Ulun lakar nyuratang masih didaptare ento gumi Mesir muah gumi Babele. Di pantaran jlemane ane nongos di kota Yerusalem, Ulun masih lakar metek bangsa Pilistin, Tirus muah Sudan.”

5Indik Sione jaga kabaosang mungguing sakancan bangsane jaga maug irika, tur Ida Sane Maha Wisesa jaga ngawinang ipun kukuh bakuh.

6Ida Sang Hyang Widi Wasa jaga nyuratang daptar bangsa-bangsane, tur ngaugang ipun makasami dados penduduk kota Yerusalem.

7Ipun sareng sami pada masolah tur makidung, sapuniki: “Ring Sion genah wit sakancan mertan iragane.”

← Chapter 86 Chapter 88 →