bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Balinese
/
Balinese
/
Psalms 89
Psalms 89
Balinese
1
Duh Ratu Sang Hyang Widi Wasa, titiang jaga tan mari ngidungang sih pasuecan Palungguh IRatu sane tan rered-rered, tur jaga nglumbrahang kasatian Palungguh IRatune kantos salami-laminipun.
2
Titiang uning mungguing sih pasuecan Palungguh IRatu punika jaga nglantur ngantos salami-laminipun miwah kasatian Palungguh IRatu kukuh bakuh waluya sakadi langite.
3
Palungguh IRatu masabda asapuniki: “Ulun suba ngae prajanjian ngajak manusane ane selik Ulun, tur Ulun suba majanji teken Daud parekan Ulune kene:
4
‘Katurunan kitane lakar setata madeg ratu. Ulun lakar matiningin katurunan kitane kanti salawas-lawasne.’ ”
5
Duh Ratu Sang Hyang Widi Wasa, akasane ngidungang paindikan-paindikan sane becik sane sampun kardi Palungguh IRatu, tur ipun ngidungang kasatian Palungguh IRatune.
6
Duh Ratu Sang Hyang Widi Wasa, tan wenten anak sane nyamenin Palungguh IRatu ring suargan. Sawatek sane murip ring suargan nenten wenten sane pateh sakadi Palungguh IRatu.
7
Palungguh IRatu kaluihang ring paruman parasucine, tur ipun makasami pada kagaok ring Palungguh IRatu.
8
Duh Ratu Sang Hyang Widi Wasa, Widi Sane Maha Wisesa, nenten wenten anak sane mawisesa sakadi Palungguh IRatu. Duh Ratu Sang Hyang Widi Wasa, ring saluiring paindikan Palungguh IRatu satia tuu.
9
Palungguh IRatu nitah segarane sane mawisesa, samaliha Palungguh IRatu nedunang ombakipune sane ngrubeda.
10
Palungguh IRatu nyakcak sato segarane sane ageng sane mawasta Rahab tur ngamademang ipun, samaliha antuk kakuatan IRatune sane mawisesa Palungguh IRatu ngaonang meseh-meseh druene.
11
Akasane punika druen Palungguh IRatu, kadi asapunika taler pretiwine. Palungguh IRatu ngardi jagate miwah sadagingipun sami.
12
Palungguh IRatu sane ngwentenang kaler miwah kelod. Gunung Tabor miwah Gunung Hermone makidung saha bungah muji Palungguh IRatu.
13
Ambate ageng kawisesan Palungguh IRatune! Ambate ageng kakuatan Palungguh IRatune!
14
Kaprabon Palungguh IRatune kadasarin antuk kapatutan, kadilan tur sih pasuecan miwah kasatian tansah sinah ring sakancan pakardin Palungguh IRatu.
15
Ambate bagian rakyate sane ngaturang bakti ring Palungguh IRatu masrana kidung, inggih punika anake sane urip sajeroning galang sih pasuecan Palungguh IRatune.
16
Malantaran Palungguh IRatu, ipun pada masuka rena arahina mepek, tur ipun pada muji Palungguh IRatu malantaran kabecikan Palungguh IRatune.
17
Palungguh IRatu mapaica kamenangan sane ageng ring titiang, tur sajeroning sih pasuecan Palungguh IRatune, Palungguh IRatu ngawinang titiang menang.
18
Duh Ratu Sang Hyang Widi Wasa, Palungguh IRatu sane nyelik sesuunan titiange. Palungguh IRatu Widin Israele sane suci, sane mapaica sang prabu ring titiang.
19
Sane dumun masrana wahyu Palungguh IRatu masabda ring parekan druene sane satia tuu, sapuniki: “Ulun suba mapaica pitulungan teken prajurite ane kabinawa, tur Ulun suba mapaica singasana teken anak ane selik Ulun uli pantaran rakyate.
20
Ulun suba ngamanggehang parekan Ulune Daud dadi raja malantaran nyriokin ia aji lengis ane suci.
21
Kakuatan Ulune lakar setata marengin ia, tur kawisesan Ulune lakar ngawanang ia kuat.
22
Musuh-musuhne tusing lakar taen menang nglawan ia, tur anake dursila tusing lakar nyidayang ngalahang ia.
23
Ulun lakar ngenyagang musuh-musuhne, tur ngamatiang sakancan anake ane geting teken ia.
24
Ulun lakar asih sueca tur satia teken ia. Ulun lakar ngawanang apang ia setata menang.
25
Ulun lakar ngamanggehang pamrentahannyane uli di Segara Tengahe nganti neked di Tukad Eprate.
26
Ia lakar matur teken Ulun kene: ‘Palungguh IRatu makadados Aji miwah Widin titiange, samaliha Palungguh IRatu dados pasayuban miwah juru rahayun titiange.’
27
Ulun lakar nadiang ia putran Ulune ane paling keliha, ane paling agung di pantaran sawatek pararatune.
28
Ulun lakar setata ngamanggehang janjin Ulune teken ia, tur prajanjian Ulune teken ia lakar nglantur nganti salawas-lawasne.
29
Katurunannyane lakar kukuh bakuh buka langite, tur katurunannyane lakar setata madeg ratu.
30
Nanging yening katurunannyane tungkas teken pidabdab Ulune, buina tusing malaksana satinut teken titah-titah Ulune,
31
yening ia tusing lingu teken pituduh-pituduh Ulune, buina tusing nyak ngagem titah-titah Ulune,
32
ditu Ulun lakar nyisipang ia uli krana dosa-dosannyane, tur Ulun lakar ngranayang ia nandang sangsara ulihan kapelihannyane.
33
Nanging Ulun lakar tusing suud asih sueca teken Daud, wiadin lompang teken janjin Ulune ngajak ia.
34
Ulun tusing lakar muungang prajanjian Ulune teken ia, wiadin muungang salah tunggal prajanjian ane suba gae Ulun ngajak ia.
35
Yen Ulun suba majanji masrana parab Ulune ane suci, Ulun tusing lakar linyok teken Daud.
36
Ia lakar setata ngelah katurunan, tur Ulun lakar nyayubin pamrentahannyane sanun matan aine masinar.
37
Pamrentahannyane lakar langgeng waluya buka bulane, ane dadi saksi ane satia tuu di langite.”
38
Nanging Palungguh IRatu duka ring sang prabu seselikan Palungguh IRatune tur Palungguh IRatu sampun ngutang saha nulak ida.
39
Palungguh IRatu sampun ngurungang prajanjian Palungguh IRatu ring parekan druene, tur ngentungang gelungan idane ring endute.
40
Palungguh IRatu sampun nguugang tembok-tembok kotan idane, tur manggayang benteng idane sajeroning karusakan.
41
Sakancan anake sane nglintang irika sami pada mandung druen idane, tur pisaga-pisagan idane makasami pada ngedekin ida.
42
Palungguh IRatu sampun mapaica kamenangan ring meseh-meseh idane, tur Palungguh IRatu sampun ngawinang ipun pada liang.
43
Palungguh IRatu sampun ngawinang sanjatan idane tan paguna, tur manggayang ida kakaonang ring payudan.
44
Palungguh IRatu sampun ngentungang teteken kaprabon idane, tur nyabatang singasanan idane ka tanahe.
45
Palungguh IRatu sampun ngawinang ida lingsir sadurung masannyane, tur ngliput ida antuk kimud.
46
Duh Ratu Sang Hyang Widi Wasa, punapike ngantos salaminipun Palungguh IRatu jaga nyingidang raga? Malih amunapike suenipun pidukan Palungguh IRatune jaga murub sakadi geni?
47
Elingangja, ambate cutet tuuh titiange. Elingangja mungguing Palungguh IRatu ngardi titiang sareng sami puniki dados manusa pada.
48
Sapasirake sane mrasidayang urip tur nenten jaga padem? Sapunapike antuka manusane nyaga sikianipune, mangda sampunang padem?
49
Duh Ratu Sang Hyang Widi Wasa, ring dijake buktin sih pasuecan Palungguh IRatune sane nguni? Ring dijake janji sane kardi Palungguh IRatu sareng ring Sang Prabu Daud?
50
Sampunangja lali, indik titiange parekan Palungguh IRatune kabinjulin miwah indik titiange negen sakancan temah jadmane sane tan pawidi.
51
Duh Ratu Sang Hyang Widi Wasa, meseh-meseh druene minjulin sang prabu seselikan Palungguh IRatune! Ipun pada minjulin ida, ring saparilampah Idane.
52
Pujija Ida Sang Hyang Widi Wasa, salami-laminipun! Amin! Amin!
← Chapter 88
Chapter 90 →