Psalms 88

Balinese

1Duh Ratu Sang Hyang Widi Wasa, Widi miwah juru rahayun titiange, arahina titiang masesambatan, tur rikalaning wengi titiang tangkil ring ayun Palungguh IRatu.

2Pirengangja pangastawan titiange, tur pirengangja sesambatan titiange nunas pitulungan!

3Kalintang akeh kamewehan sane nempuh dewek titiange, kantos titiang tambis-tambis padem.

4Titiang tan bina sakadi jadmane sane lianan sane makire padem, tur kakuatan titiange sami sampun ical.

5Titiang kentungang ring pantaran jadmane padem. Titiang waluya sakadi sawa sane ring bangbang setrane, inggih punika jadma sane sampun laliang Palungguh IRatu, sane tan patut molih pitulungan saking Palungguh IRatu.

6Palungguh IRatu sampun nyabatang titiang ka tengah bangbang setrane sane dalem, ring bangbang sane pinih peteng dedet tur pinih dalem.

7Pidukan Palungguh IRatune berat pisan neteh titiang, tur titiang kanyagang ring sor ombak pidukane punika.

8Palungguh IRatu sampun ngawinang timpal-timpal titiange pada ngutang titiang, tur ngawinang ipun marasa seneb ring titiang. Titiang kakurung tur nenten mrasidayang ngluputang dewek,

9tur matan titiange kuyu nandang sangsara. Duh Ratu Sang Hyang Widi Wasa, nyabran rahina titiang nunas ica, tur nyakupang lima ngastawa ring Palungguh IRatu.

10Punapike Palungguh IRatu nyinahang katawahan pabuat jadmane sane padem? Punapike ipun jaga urip tur muji Palungguh IRatu?

11Punapike sih pasuecan Palungguh IRatu sane nenten rered-rered punika kabaosang ring bangbang setrane, wiadin punapike kasatian Palungguh IRatune kabaosang ring genah karusakane?

12Punapike katawahan Palungguh IRatune kanten ring genahe sane peteng dedet, wiadin punapike kabecikan Palungguh IRatune kanten ring jagate sane sampun kalaliang?

13Duh Ratu Sang Hyang Widi Wasa, titiang masesambatan nunas tulung ring Palungguh IRatu, tur nyabran semeng titiang ngastawa ring Palungguh IRatu.

14Duh Ratu Sang Hyang Widi Wasa, punapi awinannya Palungguh IRatu nulak titiang? Punapike awinannya Palungguh IRatu ngedoh saking titiang?

15Ngawit saking titiang kantun wimuda, titiang sampun nandang sangsara tur tambis-tambis padem. Titiang leleh tan pabayu malantaran antuk pidukan Palungguh IRatune.

16Pidukan Palungguh IRatu sane banget punika ngenyagang titiang, tur panglurug Palungguh IRatune sane tan sipi punika nguugang titiang.

17Sapanjang rahina pidukane punika ngiter titiang sakadi blabar, tur pidukane punika ngiter titiang saking milehan.

18Palungguh IRatu sampun ngawinang sawitran titiange sane pinih raket ring titiang ngutang titiang, tur wantah peteng dedete kewanten sane dados timpal titiange.

← Chapter 87 Chapter 89 →