Psalms 91

Balinese

1Sapasiraja sane tangkil nunas karahayuan ring Ida Sang Hyang Widi Wasa, sapasiraja kantun ring sor pasayuban Ida Sang Maha Wisesa,

2ipun jaga matur ring Ida sapuniki: “Palungguh IRatu makadados patindih miwah pasayuban titiange. Palungguh IRatu dados Widin titiange, tur titiang suksrah ring ayun Palungguh IRatu.”

3Ida jaga ngrahayuang semeton saking sakancan bayane sane singid miwah saking sakancan pinakite sane ngawinang padem.

4Ida jaga nangkeb semeton antuk kampid Idane, tur semeton jaga rahajeng sajeroning pamiaran Idane. Kasatian Idane jaga nyayubin miwah nindihin semeton.

5Semeton nenten nyandang ajerih ring baya rikalaning wengi, wiadin ring gegebug mesehe sane tan pararapan rikalaning rahina.

6Semeton nenten nyandang ajerih ring grubug sane nibenin rikalaning wengi wiadin ring jadma dursila sane ngamademang rikalaning rahina.

7Yadiastun siu jadmane bah padem ring samping semetone, alaksa ring kiwa tengen semetone, nanging semeton tan jaga katibenin baya.

8Semeton jaga ngeton miwah nyingak indik jadmane dursila kasisipang.

9Semeton sampun ngadegang Ida Sang Hyang Widi Wasa dados patindih semetone, tur Sane Maha Luur dados pasayuban semetone.

10Punika awinannya nenten wenten bencana sane nibenin semeton, tur nenten wenten kawirosan sane jaga rauh nempuh pumahan semetone.

11Ida Sang Hyang Widi Wasa jaga ngandikayang malaekat-malaekat Idane nyaga semeton, buat nyayubin semeton saparilampah semetone.

12Paramalaekate punika jaga nuntun semeton antuk tangannyane mangda cokor semetone nenten katanjung ring batune.

13Semeton jaga nyekjek singa miwah ula inggih punika singa sane galak-galak miwah ula sane sandi.

14Ida Sang Hyang Widi Wasa masabda sapuniki: “Ulun lakar ngrahayuang anake ane astiti bakti teken Ulun muah lakar nyayubin anake ane nawang mungguing Ulun maraga Sang Hyang Widi Wasa.

15Yen ia matur teken Ulun, Ulun lakar nyautin ia. Yening ia katempuh baan kakewehan, Ulun lakar ngiangin ia, tur Ulun lakar ngluputang muah ngajiang ia.

16Ulun lakar maicain ia umur panjang, tur Ulun lakar ngrahayuang ia.”

← Chapter 90 Chapter 92 →