Psalms 92

Balinese

1Duh Ratu Sang Hyang Widi Wasa, ambate beciknya ngaturang panyuksma tur makidung ngluihang Palungguh IRatu, duh Ratu Sang Hyang Widi Wasa Sane Maha Luur.

2Ambate beciknya nyabran semeng nglumbrahang sih pasuecan Palungguh IRatune sane nenten rered-rered miwah nyabran wengi nglumbrahang kasatian Palungguh IRatune,

3masrana antuk tetabuhan miwah rebab miwah antuk gegambelan miwah kecapi.

4Duh Ratu Sang Hyang Widi Wasa, pakaryan Palungguh IRatu sane mawisesa ngawinang titiang suka rena. Titiang makidung saha bungah malantaran paindikan sane sampun kardi Palungguh IRatu.

5Duh Ratu Sang Hyang Widi Wasa, ambate ageng pakaryan Palungguh IRatune punika, tur ambate dalem pakayunan Palungguh IRatune!

6Paindikan-paindikan punika nenten prasida kuningin antuk jadmane nambet, tur nenten prasida karesepang antuk jadmane belog.

7Menawita jadmane dursila jaga mentik sakadi padang, tur jadmane sane malaksana iwang jaga muponin gemuh landuh, nanging ipun jaga kasirnayang kantos basmi kerta.

8Santukan Palungguh IRatu, duh Ratu Sang Hyang Widi Wasa, IRatu maraga maha luur salami-laminipun.

9Titiang uning mungguing meseh-meseh Palungguh IRatune pacang padem, tur sakancan jadmane dursila pacang kaon.

10Palungguh IRatu sampun nadosang titiang siteng waluya sakadi banteng alasane. Palungguh IRatu sampun ngamertanin titiang antuk kaliangan.

11Titiang sampun ngeton kakaonan meseh-meseh titiange, tur miragi sesambatan jadmane dursila.

12Jadmane sane patut jaga tumbuh lanus waluya sakadi wit korma, tur ipun jaga tumbuh sakadi wit arase ring Libanon.

13Ipun waluya sakadi taru sane katandur ring Perhyangan Linggih Ida Sang Hyang Widi Wasa, sane tumbuh lanus ring Perhyangan Agung Widin iragane.

14Ipun tansah kantun mawoh, taler rikalaning ipun sampun tua, tur setata kantun gadang lumlum tur kuat.

15Indike punika nyinahang, mungguing Ida Sang Hyang Widi Wasa punika adil tur pasayuban titiange nenten naenin iwang.

← Chapter 91 Chapter 93 →