Psalms 93

Balinese

1Ida Sang Hyang Widi Wasa punika maraga Sang Prabu. Ida mabusana kaluihan miwah kakuatan. Jagate sampun kagenahang saha kukuh bakuh ring genahnyane, tur nenten mrasidayang makisid.

2Duh Ratu Sang Hyang Widi Wasa, singasanan Palungguh IRatune sampun kamanggehang saking pangawit, tur Palungguh IRatu sampun wenten sadurung kala masane ngawitin.

3Duh Ratu Sang Hyang Widi Wasa, sawang samudrane ngunggahang suarannyane. Ipun makuug ngamedalang suarannyane.

4Ida Sang Hyang Widi Wasa mrentah ring suarga sane maha luur agengan ring kuugan segarane, tur kawisesan Idane agengan ring ombak segarane.

5Duh Ratu Sang Hyang Widi Wasa, pidabdab Palungguh IRatune langgeng, tur Perhyangan Agung Palungguh IRatune sawiakti suci pisan kantos salami-laminipun.

← Chapter 92 Chapter 94 →