Acts 4

Baoule (Nyanmien nde Ufle) 1974

← Chapter 3 Jump to: Chapter 5 →

1Ke Pierre nin Jean bé nuan te ô swran'm bé nde kan kléle'n su'n, Nyanmien nyrun dyranfue'm bé nin Nyanmien sua dan'n i sukpen'n nin Sadducéfue'm (*f5*) bé baa le.

2Ke bé wuun ke bé su klé swran'm bé liké'n, o yôô bé ya kpa yele ke, ke béh kanh Jésus nde'n, bé sé bé ke swran'm bé tyen.

3Bé tra bé siéé bé bisua lo lélé alie tyennin, afin ke oh yôh so'n, wuun alie a san.

4O nin i so'n ngba bé nga bé tili nde so'n bé sunman bé faa su, bé yasua'm bé dyu bo akpi-nnun kun.

5Ke alie tyennin'n, Juif'm bé sukpen, nin kpenngben, nin mmla kléfue mun,

6ye Anne b'o ti Nyanmien nyrun dyranfue dan'n, nin Caïphe, nin Jean, nin Alexandre, ye bé kwlaa bo bé fin Nyanmien nyrun dyranfue dandan'm bé ôsu nun'n, bé yiaa Jérusalem le.

7Ke bé kô fa Pierre nin Jean bali'n, bé dyraan bé bé afien le, bé usa bé ke: ?O yô se ye an kwla yô sa ngaa? ?Ye wan dunman nun ye an yôlio?

8Ye Pierre bo Nyanmien Wawe'n siéé'n, o sé bé ke:

9Nvlé kpen nin awlô bô kpenngben mun, se nde amunh usah é sa kpa bo é yô maan bian folefue nga'n, o nin ke o yôli b'o man o yôô dyuédyué'n

10man amun nin Israëlfue'n kwlaa an si kpa ke Jésus-Christ b'o fin Nazareth bo an bôbôé waka'n su bo Nyanmien tyenniin'n, i dunman nun ye bian nga a yô dyuédyué b'o dyin amun nyrun wa nion.

11Jésus so'n ye o ti: «Yebue bo amun sua kplanfue mun an yii blô nion, I ye wa katyi yebue kpa b'o tra sua'n i tyondyo'n i asé nion.»

12I kunngba tye ye o kwla dé swraan, yele ke Nyanmien a sié'a swran ufle fi men'n nun wa bo i dunman nun é kwla fité nuon.

13Ke bé wuun ke Pierre nin Jean bé ti yakpa'n, o bôô bé nuan, afin bé si ke ba di'a l'école, bé ti ti blé nunfue, bé ti'a swran dan. Bé si ke bé nin Jésus ye bé trannion.

14Ye ke bé wuun bian b'o yôô dyuédyué'n ke o dyin Pierre nin Jean bé wun le'n, ba nya'an nde fi a kanman.

15Ke dyole difue'm bé maan bé atin ke bé dyaô kan'n, bé wuun bé wun,

16bé sé ke: ?Éh yôh minnien nga'm bé se? Afin Jérusalemfue'n kwlaa bé si nun wéiin ke sa nga bé yôli'n ti dan kpa, o man é kwla fia'a su.

17Sannge ke é klô'a ke nde so'n tru o i nyrun'n, man é idyo bé nan é sé bé ke, ke o fin nde'n, nanh man bé kan nde so'n klé swran fi dunman so'n nun kun.

18Ye bé flee bé, nan ba sé bé ke, nanh man bé bô Jésus dunman'n kun, ye nanh man bé klé liké Jésus dunman nun kun mlonmlon.

19Pierre nin Jean bé usa bé ke: ?Se Nyanmien wun ke é nyin yi amun bo é nyin yimen'n, o ti kpa? Anh bu nian,

20nanwle, é kwla yatyi'a liké nga é wunniin'n nin nde nga é tili'n i kanle.

21Bé kannvuun bé ékun, nan ba yatyi bé nun. Swran'm bé ti bé si'a fo nga bé fa tu béo, yele ke bé kwlaa bé manman Nyanmien sa so'n ti.

22Bian so'n i nantile'n yôô abônuan, afin wa di afue b'o tra ablanan.

23Ke bé yatyii bé nun'n, bé oo bé wiéngu'm bé sin, nan ba kan sa kwlaa nga Nyanmien nyrun dyranfue dandan nin kpenngben'm bé kan kléé bé'n ba klé bé.

24Ke bé tili'n, bé kwlaa bé maan bé nen'n su bé sé Nyanmien ke: É Si, o bo a yii nglô, nin asie, nin dyénvié'n, nin ninngé'n kwlaa b'o ô le'n,

25wo ye man o Wawe'n fo o nde'n wlaa é nannan David o swran'n i nuan b'o kenniin ke: «?Nzu ti ye nvlé wié nunfue'm bé plan soo, Ye swran'm bé bu sinnzin akunndan soo?

26Asie'n su famien'm bé dyaôli, Ye kpenngben'm bé yiali, bé bô yôô kun É Min Nyanmien'n nin i Christ'n (*f1*) bé wun.»

27Nanwle, Hérode nin Ponce Pilate nin bé bo bé ti'a Juif'n bé nin Israëlfue'm bé bô yôô kun o swran Jésus bo a guee i su ngô ke o yô famien'n, i wun klo nga su wa,

28ke béh yôh kwlaa nga o bobo Nyanmien Kpli'n a dun mmua buu i akunndan ke bé yô'n.

29Nannan Nyanmien Kpli, nian é wlanwlanle bo bé wlanwlan yéo, i so'n ti sien'n yô mon o swran'm bé kan o nde'n yakpa su.

30Tinnge o sa'n tukpatyefue'm bé wun, man bé yô dyuédyué, yi atre, ye yô abônuan sa o swran Jésus i dunman nun.

31Ke bé kan nde so'n klé Nyanmien wiéli'n, lika nga bé yiaa nun'n kédyéli, Nyanmien Wawe'n fuu bé kwlaa, nan ba kan Nyanmien nde'n yakpa su.

32Swran kaka nga bé lafii Christ su'n, bé bô yôô kun, bé akunndan'n ti kun. Bé nun wié fi sé'a ke i ninngé'm bé ti i ngunmin lie, sannge liké ng'o ti swran kun lie'n, o ti bé kwlaa bé lie.

33Bé bo Jésus sunmaan bé'n bé kan é Min Jésus tyenle nde'n Nyanmien fanngan nun. Bé kwlaa bé yôô bé wun yé dan kpa.

34Afin bé nun wié fi mia'an liké fi wun, bé kwlaa nga bé le fié'n nin sua'n bé yô bé ate. Sika nga bé nyen'n,

35bé fa ble bé bo Jésus sunmaan bé'n. Sika nga swran kun sa mien i wun'n, o ba, bé fa men.

36Joseph, Lévi ôsufue kun b'o fin Chypre men'n nun'n, bo bé bo Jésus sunmaan bé'n bé toen Barnabas bo i bô yele Tyityi Wla'n,

37o le fié kun, o yôô i ate, o fe i sika'n blee bé bo Jésus sunmaan bé'n.

← Chapter 3 Jump to: Chapter 5 →