Job 3

Baoule (NYANMIƐN NDƐ'N 1998)

← Chapter 2 Jump to: Chapter 4 →

1Kɛ be o lɛ sɔ'n, kpɛkuun Zɔb boli cɛn'n bɔ be wuli i nun'n i sannzan.

2I ndɛ ng'ɔ kannin'n yɛ:

3Cɛn nga bɔ be wuli min nun'n, ɔ ka min ngunmin-ɔn, nán be kɛ i be wla cɛn'm be nun kun! Yɛ kɔnguɛ nga be wunnzɛli min nun'n, man i kusu ɔ yo sɔ wie.

4Man cɛn sɔ'n ɔ kaci aosin. Kɛ Nyanmiɛn o nglo lɔ'n, nán ɔ buɛ i ndɛ nun kun. Yɛ nán ɔ kpaja kun!

5Man aosin tritri kpa'n ɔ di i sɔ cɛn liɛ'n, man wie'n i aosin tuun'n ɔ di i wie, yɛ man nyanmiɛn ble'n ɔ kɛtɛ i su. Sɛ ɔ ti sran'n, wuun n ´se kɛ man sa kekleekle'm be tɔ i su yɛ be `kun i srɛ.

6Kɔnguɛ sɔ'n, man aosin'n ɔ fɛ i. Sɛ ɔ ti sran'n, wuun n ´se kɛ nán man ɔ nyan ye le, afuɛ'n i cɛn'm be afiɛn. Nán man be kɛ i wla anglo'm be cɛn'm be nun.

7Man kɔnguɛ kun sɔ'n i kusu ɔ yo kɛ bla klun kpanfuɛ sa, nán be kpan aklunjuɛ kpanlɛ fi cɛn sɔ'n nun!

8Man be bɔ be bo cɛn'm be sannzan, man be nga be tinnge Leviatan'n, be bo cɛn sɔ'n i sannzan!

9Kɛ i blɛ liɛ'n ko ju'n, nán man awɛ nzraama'n ɔ fite. Man ɔ minndɛ lika weiin lele ngbɛn, nán man ɔ wun nglɛmun lika'n b'ɔ kpaja'n!

10Afin ɔ'a saci-man kuɛ nga n trannin nun'n, ɔ man m'an wun nyrɛnnɛn kɛ nga sa.

11Ɔo! ?Ɔ yo sɛ ti yɛ man m'an wu-man mín nin klun-ɔn? ?Ɔ yo sɛ ti yɛ man kɛ be wuli min cɛ'n m'an ka-man abialiɛ-ɔ?

12?Ɔ yo sɛ ti yɛ man n nyannin sran juli min-ɔn? ?Ɔ yo sɛ ti yɛ man n nyannin nyɔnflɛn n nɔnnin-ɔn?

13Sɛ ɔ'a yo-man sɔ'n, wuun kɛ e ´se yɛ'n n nun-man min ndia nun lɔ fɔun! ?Wuun n la-man lɔ diin cɛ?

14E nin famiɛn mun nin mɛn'n nun sran dandan mun bɔ be bɔbɔ be kplan be asieliɛ dandan'm be sie'n, wuun e nin be y'a la-man ndia'n nun diin!

15E nin famiɛn i awlo lɔ sran dandan mun nga be lɛ sika ɔkwlɛ, bɔ jɛtɛ ufue'n ɔ'a yi bé sua mun'n, wuun e nin be y'a la-man ndia'n nun diin!

16Annzɛ kusu wuun n nun-man lɛ, wuun n yoli kɛ ba bɔ be kpɔli i'n sa, wuun n yoli kɛ ba bɔ ɔ'a wun-man wia'n i wun'n sa.

17Asieliɛ'n nun lɔ liɛ'n, sran nga be bu-man Nyanmiɛn like fi'n, be keje-man bé wun kun. Be nga b'a fɛ bɔ be lɛ-man wunmiɛn kun'n, be la lɔ diin.

18Lɔ liɛ'n, bisuafuɛ'm bé wun ti be fɔun! Be lɛ-man sunianfuɛ kpankpan-man be su kun.

19Sran dandan mun nin sran nga be lɛ-man nyrun'n, be kwlaa be ti kun lɔ. Kanga'm b'a nyan be ti be min'm bé sa nun.

20?Ɔ yo sɛ ti yɛ Nyanmiɛn kplin su man be wu be bɔ be wun nyrɛnnɛn nin-ɔn? ?Ɔ yo sɛ ti yɛ ɔ kplin su man be wu be bɔ be nguan'n ɔ ti afɛ ngunmin nin-ɔn?

21Be sɔfuɛ'm be kunndɛ wie'n sa lele ngbɛn, be konvi sɔ wie'n tra anyanbeun ninnge mun.

22Sɛ be wu nan be nyan be ndia liɛ'n, be klun'n ɔ ´jɔ, bé wun ´blibli be.

23N wun-man kɔwlɛ, ɔ yo kɛ Nyanmiɛn ɔ'a sisi min wun awa sa.

24Kplinlɛ'n yɛ ɔ ti min aliɛ yɛ n di-ɔ. Yɛ min fɛfɛlɛ'n, ɔ ti kɛ nzue yɛ ɔ fin like nun ɔ su nyrɛn sa.

25Sa nga n sro i'n, kpɛkuun a ´nian-an ɔ'a ju min su. Like nga n sɛ i nyan'n, kpɛkuun ɔ'a nyan min.

26N tran diin-ɔn ɔ yo-man ye, n si-man like nga be flɛ i aunjuɛ'n, n tran ase n de wunmiɛn-ɔn ɔ yo-man ye. Min wla'n ɔ gua-man ase mlɔnmlɔn.

← Chapter 2 Jump to: Chapter 4 →