Jonah 3

Baoule (NYANMIƐN NDƐ'N 1998)

1Anannganman'n kannin ndɛ kleli Zonas ekun kɛ:

2«Jaso kɔ Niniv, kɔ klɔ dan'n sɔ su lɔ. Ndɛ nga n ´fa wla ɔ́ nuan yɛ'n, bo i ndolo kle lɔfuɛ mun.»

3Yɛ Zonas jaso ɔli Niniv kɛ Anannganman'n fa kan kleli i'n sa-a. I blɛ sɔ nun'n, wuun Niniv'n i dan ng'ɔ ti'n, ɔ ti-man aɔwi. Kɛ a fɛ i bue kun bɔ a kpɛn bue kun ekun'n, a nanti cɛn ba nsan.

4Zonas fali cɛn kun wlannin klɔ'n nun. Kɛ ɔ ´kɔ'n, wuun ɔ ´bo ndolo'n. I waan: «Ɔ ka cɛn ablanan Niniv'n ´nunnun.»

5Ninivfuɛ'm be fali Anannganman i nuan su ndɛ'n su. Be fali akunndan kun. Be waan sran wafa-wafa'n kwlaa be `ci nglɛmun. Kpɛkuun be wlali bajɛ tralɛ.

6Kɛ famiɛn'n tili ndɛ sɔ'n, ɔ jasoli i famiɛn bia'n su, ɔ yili i tralɛ'n, ɔ wlali bajɛ tralɛ yɛ ɔ trannin nzuɛn nun.

7I sin ɔ fali akunndan kun, ɔ man be boli i jɔ be sinnin. Akunndan sɔ'n yɛlɛ nga: Famiɛn'n nin be bɔ be mɛntɛn i'n be wan yoo: «Le nnyɔn nga nun'n i sran o, i nnɛn o, nán be wie fi di like, nán be wie fi nɔn nzue.

8E kwlakwla e `wla bajɛ tralɛ, e `kpan kekle e flɛ Anannganman'n nan e `yaci klunwi sa nin sa tɛtɛ'm be yolɛ!

9E si-man sɛ Anannganman'n gua i ya'n i ase o! Sɛ wienun-ɔn ɔ ´kaci aniɛn nan ɔ su nunnun-man ye o.»

10Anannganman wunnin kɛ be su nanti sɔ. Ɔ ´nian-an, be su kaci be nzuɛn tɛ'n. Yɛ i kusu kacili aniɛn-ɔn. Ɔ man ɔ'a yo-man ng'ɔ guguli kɛ ɔ ´yo'n kun.

← Chapter 2 Chapter 4 →