Joshua 11

Baoule (NYANMIƐN NDƐ'N 1998)

← Chapter 10 Jump to: Chapter 12 →

1Kɛ Zabɛn'n b'ɔ ti Azɔr famiɛn'n tili i kɛ Zozie ɔ'a fa mɛn'n, ɔ sunmannin sran Ɔbab b'ɔ ti Madɔn famiɛn'n, ɔ nin Simrɔn famiɛn'n ɔ nin Aksaf famiɛn'n bé sin.

2Ɔ sunmannin sran ekun famiɛn nga be o oka-oka lika'm be nun lɔ mɛn i nglo-nglo lɔ'n ɔ nin Zurdɛn kongo nun Kinerɛt fɛtɛ'n i bo ngua lɔ'n bé sin. Ɔ sunmannin wie ekun be nga be o lika kpɛtɛkplɛɛ'n nun lɔ'n ɔ nin be nga be o Dɔr lika bɔ o nzue nuan lɔ'n i wia afiliɛ lika lɔ'n nun bé sin. Dɔr klɔ'n wo oka-oka lika'm be nun.

3Ɔ wunnin Kanaanfuɛ nga be o Zurdɛn'n i lika ng'ɔ kpɛ wia afiliɛ nin i lika ng'ɔ kpɛ wia atɔliɛ lɔ'n bé wun. Amɔrfuɛ, nin Ɛtfuɛ, nin Ferezfuɛ, nin Zɛbisfuɛ nga be tran oka-oka lika'm be nun'n, ɔ nin Evfuɛ nga be tran Ɛrmɔn bo lɔ Mizpa lika nun lɔ'n, ɔ wunnin be wun ekun.

4Famiɛn sɔ'm be nin be alɛ kunfuɛ'm be sɔnnin kɛ jenvie nuan aunnyan sa, yɛ be nnɛn kpanngɔ nin be kakaklolo'm be sɔnnin kpa.

5Be kan boli nun nan b'a ko bo be nanmue Merɔm nzue ti wun lɛ, be waan be nin Izraɛlfuɛ'm be ´kun.

6Anannganman seli Zozie kɛ: «Nán sro be, ainman dɔ kunngba nga su'n, wuun m'an yi be kwlaa m'an man wɔ, wuun Izraɛlfuɛ'm bé sa ɔ'a kan be, be lɛ-man nguan. Kpɛ be nnɛn kpanngɔ'm be ja nun ndin'm be nun! Wɔ be kakaklolo'm be nun!»

7Zozie nin i sonja'm be ko fuli be nun Merɔm nzue ti wun lɔ.

8Anannganman fali be wlali Izraɛlfuɛ'm bé sa nun, be kwlali be, be suli be su lele juli Sidɔn klɔ dan'n i nglo lɔ, ɔ nin Misrɛfɔt Maim lɔ, ɔ nin Mizpa kongo nun lɔ wia afiliɛ lika'n nun lɔ. Be kwlali be mlɔnmlɔn, b'a yaci-man sran ba kun sa lɛ.

9Nga Anannganman kan kleli Zozie'n yɛ ɔ yoli-ɔ. Ɔ kpɛli nnɛn kpanngɔ'm be ja nun ndin'm be nun, yɛ ɔ wɔli kakaklolo'm be nun.

10Kɛ Zozie ´sɛ i sin'n, ɔ fali Azɔr b'ɔ ti mɛn nga be o nglo lɔ lika nun'n be famiɛn klɔ'n. Ɔ kunnin i su famiɛn'n.

11Yɛ ɔ man be nunnunnin klɔ'n sufuɛ'm be ngba, sran ba kun sa ɔ'a ka-man lɛ, yɛ be wɔli Azɔr klɔ'n nun.

12Zozie kwlali famiɛn nga be ju guɛli i su'n be kwlakwla. Ɔ fali be klɔ mun. Ɔ kunnin famiɛn mun nin klɔfuɛ mun kɛ Moiz b'ɔ ti Anannganman i sufuɛ'n seli be kɛ be yo'n sa.

13Sanngɛ Izraɛlfuɛ'm b'a wɔ-man klɔ nga be o kpɔlɛ'm be su'n be nun san Azɔr. I liɛ'n Zozie man be wɔli nun.

14Izraɛlfuɛ'm be fali ninnge ɔ nin nnɛn nga be wunnin i klɔ sɔ'm bé su'n, sanngɛ be kunnin klɔ'n sufuɛ mun, sran fi a ka-man.

15Alɛ nun'n, ndɛ nga Anannganman kan kleli Moiz'n, Zozie niannin su yoli i kɛ ɔ fata'n sa.

16Zozie fali be mɛn sɔ'n i ngba: oka-oka lika nin o, ngua lɔ lika nin o, Gozɛn lɔ lika nin o, lika kpɛtɛkplɛɛ nin o, Zurdɛn i kongo lika nun lɔ nin o, ɔ nin nglo lɔ lika kpɛtɛkplɛɛ nin o, nin nglo lɔ oka-oka lika nin o.

17Ɔ kwlali famiɛn nga bé mɛn'n wo oka ti su trɔnmintrɔnmin ɔ nin Baal-Gad lika'm be afiɛn nun'n. Oka sɔ'n mantan Seir lika'n b'ɔ o ngua lɔ'n. Baal-Gad kusu o Liban kongo nun lɔ, Ɛrmɔn oka'n i bo ngua nglo lɔ lika'n nun lɔ. Ɔ kunnin i sɔ famiɛn liɛ'm be kwlakwla.

18Alɛ ng'ɔ nin be kunnin'n ɔ cɛli.

19Alɛ kunlɛ nun yɛ be kwlali klɔ nga be o lɛ'n be kwlakwla-a, san Evfuɛ nga be tran Gabaɔn lɔ'n be yɛ be nin Izraɛlfuɛ'm be dili anuansɛ-ɔ.

20Afin Anannganman man mɛn sɔ nunfuɛ'm be waan san alɛ yɛ be nin Izraɛlfuɛ'm be ´kun-ɔn. I sɔ'n ti, Izraɛlfuɛ'm be kusu be kunnin be kwlakwla kɛ Anannganman fa kan kleli Moiz'n sa.

21I blɛ kunngba'n nun, Zozie nin Anakfuɛ nga be tran oka'm be su Ebrɔn lɔ'n, nin Debir lɔ'n, ɔ nin Anab lɔ'n, nin Zida'n, ɔ nin Izraɛl oka-oka lika'm be nun'n be kunnin. Ɔ nunnunnin be klɔ'n mlɔnmlɔnmlɔn.

22Anakfuɛ ba kun sa ɔ'a ka-man Izraɛl mɛn'n nun san Gaza, nin Gat, ɔ nin Asdɔd lɔ yɛ wie kali-ɔ.

23Wafa nga Anannganman kan kleli Moiz kɛ ɔ `fa mɛn sɔ'n, i su yɛ Zozie nian fali-ɔ. Ɔ fa cɛcɛli Izraɛl akpasua'm be kwlaa, i sin yɛ Izraɛlfuɛ'm be deli wunmiɛn alɛ kunlɛ nun-ɔn.

← Chapter 10 Jump to: Chapter 12 →