1 Corinthians 5

Baoule Bible 1996 (Kuo :Dele')

← Chapter 4 Jump to: Chapter 6 →

1:Yee' keen' 'jeh ka, eh-a' kuna': yeh-dih: 'on-: ken,: ka 'tmeor:⧾: korn-eh: ne-a 'de a 'nyne-'. Eh-a': yeh: ne-a 'de a 'nyne-', eh se 'de nyor⧾: on se-a Nyorsoa yubo: 'nyne-': ne-a' 'jeh. 'On 'worn-ih': ka a-a' nyor: due': ne or: baa'-a'a: 'nynor-a 'tmo-a.

2:Yee': kaa eh no 'de a 'beh-dih a-a' 'jeh 'i 'suh: eh? A-a': porluh⧾: korn en 'ye 'zorn 'kpa: dee', 'do deh-zon:, nyor: dao' or no-a bo. A: korn a 'ye-or' 'o 'zorn po, or 'ye 'de a 'nyne-' 'wluh: dee'.

3Keen': mloror' 'an 'jeh 'yor-eh-a' nyior-tu se 'de a bo: ne, jorwor: 'an: porluh⧾-a' klehkpeh: ne 'de a bo 'weh. 'De mor 'on chehn nyor: dao' or-a' zabe 'i see,: eh gweh-a: ka 'on: ne-a 'o.

4:Mor a 'kpa: dha: due' 'de: a-a': Gwlor: baa': Yusu'-a' 'nyne 'di, 'de 'an: porluh⧾-a' klehkpeh 'ye 'de a bo: ne, 'de: Gwlor: baa': Yusu'-a' 'kpih 'ye 'de a bo: ne: ke,

5:yee' a: za nyor: dao' 'kwla 'de 'ku 'kwa, 'de 'ku 'ye or-a' yau 'kor-dih:. Eh-: mu-eh: no, 'de or 'ye 'o or-a' 'jeh bo yi, 'de: mor: Gwlor: baa' yi de, 'de or-a': zulu 'ye 'puh.

6Eh-a' dhih, eh se 'yi dih: nmor, a 'ye a-a' 'jeh 'i 'beh-dih:. A se-eh yubo:: ka deh⧾: en 'vu-dih-a 'bhlee, en-': bhebe' deh⧾-bei:, me-: 'vu-dih 'bhlee:: kpuan'-a' klehkpeh: e?

7:Yee' a 'tali: a-a' deh⧾-zon:⧾: en gweh-a deh⧾: en 'vu-dih-a 'bhlee dih, 'de a 'ye 'bhlee:: eh se-a 'vuu'-deh⧾ bo: ne gweh. 'De 'on yubo-eh, 'ka-: a: ne 'jeh ka. Deh no-eh, 'Klae: or no-a: a-a' 'Meh-a': bla-dih: 'dlu-dih-blae'-yu, or 'dhu-dih-eh: gban 'i: weh see, 'do: a bo.

8:Yee' 'do eh-a' dha,: a-a' 'dhu-:-' gor: or gweh-a 'bhlee:: eh: ne-a 'vuu'-deh:⧾ soa bo,: en 'dhu-a 'galo:: korn-eh-: 'dekorn: deh⧾-zon:⧾: no-eh-:. Jorwor: a 'nyi: a 'dhu gor: daa 'de: vlehehn'-': gweh ka-: 'dekorn: dhih-a' 'yor-eh-: 'di: eh gweh-a: ka 'bhlee:: eh se-a 'vuu'-deh⧾ bo: ne.

9'Chlee-deh: 'on 'chle-a a bo: zai', 'on zela: a: gwluhuh' 'weh: eh: mor 'tmeor:⧾: korn-nyor⧾: ne a-a' nena:-' bo.

10Deh 'an za-a-': naa, 'on: se-' 'kmo bo-nyor⧾ 'da,: on no-a 'tmeor:⧾: korn-nyor⧾-: deh⧾-a' 'klan: korn-nyor⧾-: 'ylii'-nyor⧾-: 'dekorn: zuu⧾-a': weheh': za-nyor⧾-:.: Mor 'on: taa: mloo' 'da: dee',: yee' a: korn a 'ye dha 'kmo bo 'wluh klehkpeh klehkpeh.

11Deh 'an za-dih-a dhih-' dih, eh-:: dhe dih. Nyor: or 'da-dih-a or-a' 'jeh 'Klae-a' klei': zi-nyor, 'de: or: ne-dih:-a 'tmeor:⧾: korn-eh-: deh⧾-a' 'klan: korn-eh-: zuu⧾-a': weheh': za-eh-: nyor⧾ 'bhun dih: wlu-eh-: nomor 'na-eh-: 'dekorn: 'yli-a'-: 'kmo. Eh-a' nyior-tu:: ne: ao', or: ne a-a' nena:-' bo, 'de on: ne a-a' kpuhba:-' son⧾ ybei': sloror'.

12Deh 'on po 'de dih: eh, 'de 'on 'ye nyor⧾: on se-a 'noror 'chore-': ne, an-a' zabe zi: eh? Nyor⧾: on: ne-a 'noror 'chore-', mo-:: korn zabe: a: korn a 'ye zi.

13Nyorsoa-a mu: yuh se-a 'noror 'chore-': ne, an-a' zabe: zi.: Yee' a: mor 'ye: yuh: ne-a 'de 'chore-', an-a' zabe zi,: ka Nyorsoa-a' 'chlee-deh no-a eh-a': za-a', eh no-a, A: za 'de deh⧾-zon:⧾: no-nyor⧾ 'noror a 'nyne-'.

← Chapter 4 Jump to: Chapter 6 →