Colossians 4

Baoule Bible 1996 (Kuo :Dele')

← Chapter 3 Jump to:

1:Yee' a: mor 'ble-a 'ge-nynuu, a 'ble a-a'a: 'ge-nynuu 'de 'yi 'sleh ka 'di. A-a': ne-': bhuli'-'. A: na-dih-eh: gwluhuh' dih,: ka a-a' 'jeh: ke, a 'ble-a Nyor: Klaba' 'de Nyorsoa 'bli yai'.

2A 'duo: a-a' ti-a' klehkpeh-' 'do Nyorsoa bo: wlu-eh bo.: Mor a: taa 'de or bo wlu,: yee' 'do: wor a-a' 'dlu 'di dih: na-dih-eh-a' klehkpeh 'ye: ne. A po or-a' 'zio: ke.

3A bale-or 'do: a-a' dhih bo: ke, 'de: kpaa' 'ye 'o 'wluh 'do: a bo,: a 'ye or-a' tubo-wlu⧾ po,: a 'ye 'slan: or kor-a 'Klae 'i, or-a' dhih-': za. Deh no-eh, en-' dhih: oo', 'on: ne: kasue 'di: naa.

4:Yee' a: wlu 'de Nyorsoa bo, 'on 'ye: wlu: ka 'on: korn 'on 'ye-a wlu-a' no, 'de 'on 'ye-eh' ken dih zela: deh 'jeh, on 'ye-eh' dih 'worn.

5A no: toror': korn-deh⧾ 'do nyor⧾: on se-a 'Klae-a' dhih dhih 'jeh-' po ybei'. Ti-a' klehkpeh a 'ble-a, a: no-dih-ih: koan: 'jeh nor-' 'do on ybei'.

6:Yee' 'nyi deh a mu-a-': za, a 'wla: gwluhuh' dih, 'de nyor⧾ 'ye a: dou'⧾ bo: to. 'De: mor nyor dhele a deh dih, 'de a 'ye eh-a' gbor: za-da yubo: 'de: dhehehn: ka 'di.

7:Yee': Teki'kor:: or no-a: a-a': dhih: kma-de-di', 'de: or no-a: dhehehn-koan:: no-nyor-: 'dekorn:: a 'be 'bhoi-yu-: 'de: Gwlor: baa'-a' deh 'di, or-: mu a tubo-wlu⧾-a' klehkpeh 'nyi-: 'do 'an dhih bo.

8Eh-:: korn dhih 'de 'an dbo-or 'de a bo, or 'ye 'de a-a' 'kpih po, 'de or 'ye a: gwluhuh' zela:: ka 'noror: a bo: ne-a.

9Or-:: Oni'sima-: mo-:: an mu 'de: yi-dih:: or no-a: a-a' 'Klae: dhih: kma-de-di', 'de: or no-a: dhehehn-nyor. Mo-:: an mu a deh⧾-a' klehkpeh: en mu-a 'dlu bo 'noror: a bo: gwluhuh' zela:.

10'Alita'kor:: or: ne 'on: ne-a 'noror: kasue 'di, or 'da, or-: 'ye a-uh. 'Make: or: ne: Bana'ba no-a 'de-di': yi-nyor⧾-a' 'nynuu, or 'da or-: 'ye a-uh: ke o. A 'ye 'chlee-deh 'weh, 'do or-a' dhih bo,: eh zela:-a a: gwluhuh', a 'ye-or dih kpon,: mor or yi 'de a bo.

11:Jasua': or: korn 'nyne: nee' 'dhu-a 'Jehtor-', or 'da, or-: 'ye a-uh: ke o. Nyor⧾ taan: daa mo-: no: Jueh'-nyor⧾ 'klein': on 'wluh 'de: Jueh'-nyor:⧾: on po-a: Yusu'-a' dhih dhih 'jeh-' 'nyne-', 'de: on: ne 'an no-dih: koan: dha: due', 'do Nyorsoa-a' nyor⧾ wlu 'ken: korn-eh-a' dhih bo, 'de on 'worn, on dhe 'on: porluh 'di dih 'gabaa.

12:Ipa'fa 'da, or-: 'ye a-uh,: or no-a a-a' nyor: due': ke, 'de: or no-a: Yusu' 'Klae-a' 'bhoi-yu. Or wlu 'de Nyorsoa bo 'weh 'do a-a' dhih bo, 'do ti-a' klehkpeh bo 'gabaa. Or dhele Nyorsoa-: dih, or 'ye-eh' no, 'de a 'ye-eh yubo: deh 'jeh, deh⧾ Nyorsoa 'bhorn-a a 'ye-a' no, 'de a 'ye en-' klehkpeh no deh 'jeh.

13'An 'jeh 'yor-eh: 'on 'beh-dih: 'on 'ye-eh' ken dih zela:: ka or no-a: koan:: no-eh 'gabaa 'do a bo, 'dekorn: nyor⧾: on 'ti-a: gwlor⧾ an 'da-dih-a 'Lolesi'a-: 'dekorn: 'Yala'poli-:.

14'Lu: or no-a: a-a' kwein:: di-nyor 'de: or no-a: a-a': dhih: kma-nyor, or-: 'Dima-: on 'da, mo-: 'ye a-uh.

15A zela:: a-a' 'Klae: de-di'-boi': on: ne-a 'Lolesi'a,: gwluhuh',: a: mor 'ye-uh o, 'dekorn:: a-a' 'de-di'-nynor-kpao': Nefa'-:: korn mor 'chore: eh 'gbon-dih-a 'de or 'bli 'gbu: ke-:.

16:Yee': mor 'chlee-deh:: daa eh: zlo-eh: 'de a bo,: yee' a 'ye-eh bo, eh 'ye: zlo-eh: 'do 'chore: eh: ne-a 'Lolesi'a ybei'. 'De mor 'chlee-deh: 'Klae: de-di'-boi': on: ne-a 'Lolesi'a, an mu-a a bo 'chle-:, a zlo-eh: ke.

17A zela:: Aki'pa: gwluhuh', or 'ye-eh' bo 'ye,: koan:: or 'nyi-eh or-uh, 'de: Gwlor: baa'-a' deh 'di, or 'ye-or 'i gweh.

18'Mor: or 'dhu-a: Poror'-', 'an 'jeh 'yor-eh-a' son, mo-: 'on no, 'de 'on 'chle-a 'yee'-wlu:⧾: daa bo, 'mor 'ye a-uh. Nyor-a' 'ma-dih:-' 'an dhih bo,: ka 'on: ne-a 'noror: kasue 'di. 'Nyi Nyorsoa-a' mla: ne 'o a bo o.

← Chapter 3 Jump to: