Mark 3

Baoule Bible 1996 (Kuo :Dele')

← Chapter 2 Jump to: Chapter 4 →

1:Yee': Yusu' mu 'de 'di: gweh-dih-sla 'zorn-: de,: neheh'. 'Do: wor or: yeh-dih: 'yu: due': or: korn-a son 'meh-a.

2:Yee' an pobo-or-: ya, on 'ye-eh' 'ye,: eh beh or mu 'yu: dao' 'puh-dih: 'do Nyorsoa-a': gwlee-we-eh 'di-:, 'de on 'ye-or' 'tele' dih: kpon-dih: 'do deh-zon:: no-eh bo.

3:Yeh an pobo-a 'o,: yee' or: wlu-' 'de 'yu: or: korn-a son 'meh-a bo, or 'dae:, 'Yle. Yi 'noror nyor⧾ ybei'.

4:Yeh 'yu mu-a, 'de or: nyna-a dih,: yee': Yusu' dhele-uh-: dih, or 'dae:, Eh: ne 'o: a-a'a: 'tele'-a': gwie 'i 'weh, nyor 'ye nyor-': za-dih: 'do Nyorsoa-a': gwlee-we-eh 'di: e?: Ae' nyor 'ye deh-zon no? Eh: nmor-: 'yi nyor 'ye nyor-a': febeh' zelie:: e?: Ae' nyor 'ye nyor 'dba ke?: Yeh or dhele-uh-a dih,: yee' an-a' nyor: se-': wlu.

5:Yee': yeh or pobo:-a an-a' klehkpeh ya, 'de an-a' 'worn, an-a': wlu-a,: yee' or 'kpa-' 'chehn. Jorwor: or 'ye an-a': wehlih:, 'do an-a' 'dlu⧾-a': kmu-a' bo, 'de or: wlu 'de son-a' 'meheh'-yu:: dao' bo, or 'dae:, Slo: an-a' son. 'De or slo-uh.: Yee' or-a' son 'bor-'.

6:Yeh: Falasi'i-nyor⧾ 'ye-a deh: dao',: yee' on 'si-: 'zorn. 'De mo-: 'dekorn:: Hehlo'-a'a: bo: na-nyor⧾-: on 'dhu dhih, 'do: dha: due': dao',: ka on 'ye-a': Yusu'-a' 'dba-a' no.

7:Yee': yeh: Yusu'-: 'dekorn: or-a'a: bo: na-nyor⧾-: on 'wluh-a 'o,: yee' on mu 'de: Galali'i-yobo'-pehnu worn 'i.: Yeh an mu-a,: yee' nyor⧾: doru', mo-: 'wluh: Galali'i-bluhba ken, mo-: zi 'o on klei'. 'De nyor⧾: dhulu': noo' 'wluh: Judi'a-bluhba ken-:

8:Julu'slehn-: 'Idumi'a-bluhba ken-: 'bluhba-a' 'for: or: ne-a 'de 'Jorle-ni-a' 'yluh-a' 'kwla 'wluh-dih: 'da worn dih-: 'dekorn: 'bluhba-a' 'for⧾: eh: ne-a 'Taya-gwlor-: 'dekorn: 'Saedorn-gwlor 'de dih-:. Nyor⧾: dhulu': daa, deh⧾ or no-a, me-: on 'worn, eh-:: korn dhih on yi 'de or bo.

9:Yeh nyor⧾-a dhie-a 'i,: yee' or zela: or-a'a: bo: na-nyor⧾-:: gwluhuh', on 'ye 'de 'blagbe 'di 'kpa po 'do or bo, 'de nyor⧾: ne-or' 'dlu dih: gweh-dih:.

10Deh no-eh, or 'puh-dih: puhba-nyor:⧾: dhulu',: yee': ka nyor⧾: an puhba-a, on 'worn-ih'-a,: yee' on yi 'de or bo, 'de an vorn on 'ye-or' dih 'tuh.

11:Mor 'kwla 'ye-dih-deh:⧾: en: ne-a 'o nyor⧾ 'de, en 'ye-or,: yee' en bla en-' 'jeh-: dih 'do or ybei', 'de en po 'geh⧾, en no,: Mor, Nyorsoa-a' 'Yu: oo' o.

12:Yee' or 'dhu-ih 'slen deh 'jeh, en: ne-eh' no, 'de nyor⧾: ne-' nyor or 'dhu-eh:-' yubo:.

13:Yeh: Yusu' 'wluh-a 'o: Galali'i-yobo'-pehnu worn 'i: dao',: yee' or mu 'de tluh ken, 'de or 'da nyor⧾ or 'bhorn-a, 'do or bo.: Yeh on yi-a 'de,

14:yee' or: za 'de on 'klu-' nyor⧾-a': bhue: 'yor 'sororn' or 'da-dih-a or-a'a: dboo-nyor⧾.: Yeh or gan-a nyor⧾: dao',: yee' or: wlu-' 'de on bo, or 'dae:, 'On gan a 'weh a 'ye 'on bo: na, 'on 'ye a dbo a 'ye Nyorsoa-a' wlu kpa.

15'An mu a 'kpih 'nyi-:, a 'ye 'kwla 'ye-dih-deh⧾ 'do nyor⧾ 'de: za.

16Nyor⧾ or 'duo:-a-', an-a' 'nyne: wor: dhe dih. Samor' or 'dhu-dih:-a: Piteh'-nyne-:

17:Zehbehli'-a'a: 'nynuu 'Jeen-:: korn or-a' dei': Jororn'-:: on: ne-a 'sororn', or 'dhu-dih:-a Bona'yi-nyne,: en 'dhu-a 'ni-a' 'gbuu'-nyor⧾-nyne-',

18Andlu'-: Felor'-:: Batale'meor-: Matio'-:: Tormor'-: 'Ehfea-a'a: 'yu 'Jeen-: 'Talior-:: korn Samor': or no-a or-a'a: 'bluhba-dlu-a' dhih: vorn-nyor-:

19'dekorn:: Juda': Ehkeh'lior-:: or plo-a: Yusu'.

20:Yee': Yusu' mu 'de 'gbu-: de, 'de: gwlor-nyor⧾: gweh de 'do mor: neheh'. Eh-: no-eh 'de or-: or-a'a: bo: na-nyor⧾-: on se 'beh-dih: on 'ye deh di-a' 'jeh: sloror'.

21:Yee': yeh or-a'a: nyor⧾ 'worn-ih'-a,: yee' on mu-or 'o 'weh, on 'ye-or' wlu 'ken: korn. Deh no-eh, on 'da, Sena-a: no-or.

22Nyor⧾ 'tele': torne-nyor:⧾: on 'wluh-a: Julu'slehn, on 'dae:,: Behzeh'bu: 'o,: on no-a 'ku, mo-:: ne 'o or 'de. 'Kwla 'ye-dih-deh:: klaba': oo', eh-: 'nyi-or 'kpih, 'de or za nyor⧾ 'kwla 'ye-dih-deh⧾ 'de.

23:Yeh or 'worn-ih'-a,: yee' or 'da nyor⧾-a' klehkpeh: on: ne-a 'o 'weh, 'de or po 'dlan, or dhele-uh dih, or 'da,: Kaa 'ku-a mu an-a' 'jeh dih: no-eh: no: eh?

24:Mor 'bluhba-dlu: za an-a' 'jeh 'sororn', 'de on 'ye an-a' 'jeh bo vorn,: yee' 'bluhba-dlu:: dao', on se dih: nyna-eh 'beh-dih:.

25:Mor 'cheh-buh: za an-a' 'jeh 'sororn', 'de on 'ye an-a' 'jeh bo vorn,: yee' 'cheh-buh:: dao', on se dih: nyna-eh 'beh-dih:.

26:Mor 'ku: za an-a' 'jeh 'sororn', 'de on 'ye an-a' 'jeh bo vorn,: yee' on: se-' dih: nyna-eh 'beh-dih: i, an-a' 'kpih-a mu worn: gweh.

27Nyor se 'beh-dih: or 'ye: kmuu-nyor-a'a: 'gbu wa, 'de or 'ye or-a'a: 'tiei-' 'duo:. Jorwor:: mor or 'ye-eh' no, or mu: kmuu-nyor:: dao': san: weh, 'de or 'ye or-a'a: 'tiei kpa.

28Dhih 'jeh, 'an zela a: gwluhuh', nyor⧾-a' deh⧾-zon⧾-a' klehkpeh-: 'dekorn: Nyorsoa-a' 'nyne 'kor-dih-eh-: en mu bo 'ma-dih-eh:.

29Jorwor: nyor-beh:: or 'kor-dih:-a Gban 'i: ne: Zulu-a' 'nyne, or-a' deh⧾-zon⧾ 'se 'ba bo 'ma-dih-eh,: ka ti-a mu-a 'dlu-': tehn. Deh no-eh, or no deh-zon:: klaba': eh mu-a 'o or 'dlu: ne,: ka ti-a mu-a 'dlu-': tehn. (

30Deh: korn-a dhih or: za-a deh: daa-', eh-: 'dhu, on 'da or 'ble 'kwla 'ye-dih-deh:.)

31:Yee': Yusu' 'de-: 'dekorn: or-a' dei'-nyor⧾-kpalu⧾-: mo-: yi 'o or bo, 'de on: nyna dih 'do 'zorn, on dbo 'de or bo 'gbu 'di wlu.

32:Yee' nyor⧾: doru', mo-: 'gola-or 'de dih, 'de on zela-or: gwluhuh', on 'da,: On 'de-: 'dekorn:: an-a' dei'-boi'-: mo-:: ne 'de 'zorn,: an dhele: an-a' dhih dih.

33'De or dhele-uh dih, or 'dae:,: Or 'dhu 'on-de-': eh?: Or 'dhu 'an dei'-boi'-': eh?

34'De or pobo: nyor⧾: on 'gola-or 'de dih ya, or 'da, 'On-de-: 'dekorn: 'an 'de-di'-boi'-: mo-:: dhe dih.

35Nyor: or no-a Nyorsoa-a' 'ton: korn-deh, or-: 'dhu 'an 'de-di'-boi'-: 'dekorn: 'on-de-:-'.

← Chapter 2 Jump to: Chapter 4 →