2 Samuel 18

Bemba

← Chapter 17 Jump to: Chapter 19 →

1Elyo Davidi alonganike abantu ali nabo, no kusontapo abakalamba ba pa makana (1,000) elyo na bakalamba ba pa myanda (100).

2Awe Davidi epakwakanya impuka sha fita patatu. Impuka imo abika mu minwe yakwa Yoabu, impuka imbi mu minwe yakwa Abishai munyina wakwa Yoabu umwana wakwa Seruiya, elyo imbi nayo mu minwe yakwa Itai umwina Gati. Elyo imfumu yaeba ifita aiti, “Icine cinefye na ine wine, tuleya bonse pamo.”

3Lelo abantu batile, “Tecakwesha ukuti iwe we mfumu uye. Pantu nga cakuti ifwe twatitikishiwa, twafulumuka, tabakatusakamane ifwe iyoo. Nangufye nalimo citika wa pali ifwe afwa, nalyo line tabakatusakamane. Pantu iwe we mfumu naucila pali ifwe nangu tube amakana ikumi limo (10,000). Iwe cawama ukuti ube mu musumba pakuti uletutuminako ubwafwilisho.”

4Elyo imfumu nayo yayasuka aiti, “Ine ndifye nokucita conse icamoneka icisuma kuli imwe.” Awe imfumu epakwiminina pa mbali ya mpongolo ilyo abantu bonse balefuma mu mpuka mu mpuka sha myanda elyo na mu makana.

5Elyo imfumu yakonkomesha Yoabu, Abishai na Itai aiti, “Pa mulandu wa ine, namulomba munsungileko umulumendo Abusalomu.” Elyo ne mpuka shonse shalyumfwile ifyo imfumu yakonkomeshe pa mulandu wakwa Abusalomu kuli cila mukalamba wa fita.

6Kabili ifita fyakwa Davidi fyaile mu mpanga mukulwisha abena Israeli. Elyo ubulwi bwabelele mu mutengo wa Efulemu.

7Abena Israeli babacimfya ku bantu bakwa Davidi. Kabili kwali impendwa iyikulu nganshi iya bantu abo baipeye ukulingana na bantu amakana amakumi yabili (20,000).

8Ubulwi bwasalangenefye mu calo conse. Elyo umutengo nao waipeye abantu abengi ukucila na bafwile ku lupanga.

9Awe cabafye nkuma, Abusalomu ninshi nanina pa mfalashi, yayapita mwisamba lya misambo ya cimuti cikulu ica oki, umutwe wakwa Abusalomu wakofya mu cimuti. Elyo ashala alepelelafye mu lwelele, ninshi imfalashi anininepo yena ileyafye.

10Ilyo umuntu umo amona ici, aeba Yoabu ati, “Nimona Abusalomu alepelela mu cimuti ca oki.”

11Yoabu nao asosa ku muntu uumwebele ifi ati, “Watila shani! Wacimumona? Cinshi ico ushacimukomawila palya pene, aponena na panshi? Lyena nga nakupeela indalama amashekeli ya silifa ikumi limo no mushipi wa mpalume.”

12Nao umuntu ayasuka Yoabu ati, “Nangufye wingampeela indalama amashekeli ikana limo (1,000) no kuyapima na mu lupi lwandi, awe ine teti njimye ukuboko kwandi no kwipaya umwana wa mfumu. Pantu bonse ala twacilayumfwila ilyo imfumu yacilakonkomesha iwe na Abishai na Itai ati, ‘Munsungileko bwino umulumendo Abusalomu.’

13Kanshi ine ncita icabipa mu bumi bwandi no kumwipaya, pantu takwaba icintu nelyo cimo icifiswa ku mfumu, na iwe wine nga nauntaluka.”

14Elyo Yoabu atila, “Ine nshikwete nshita yakonawila kuli iwe ngefi.” Abuula amafumo yatatu mu minwe yakwe no kuyalasa pa cifuba cakwa Abusalomu ilyo ninshi acili umumi ku cimuti ca oki.

15Elyo bakasenda wa fyanso fyakwa Yoabu bashinguluka Abusalomu, bamulasa no kumwipaya.

16Elyo Yoabu epakulisha ipenga, ne fita fyaleka ukukunkunika abena Israeli pakuleshiwa na Yoabu.

17Epakubuula Abusalomu, bamuposa mu cilindi icikalamba mu mutengo, no kutulikapo umwina ukulu uwa mabwe. Mu nshita iyi ninshi abena Israeli nabafulumuka cila umo ku ŋanda yakwe.

18Ilyo Abusalomu acili umumi, aliimikile umwine ilibwe lya cibukisho cakwe mu mukonko wa mfumu. Pantu atontonkenye ukuti, “Ine nshakwatapo umwana umwaume uwakulenga ishina lyandi ukwibukishiwa.” Ainike ici cibukisho ce libwe ishina lyakwe, ukushinta na lelo line bacita Icibukisho cakwa Abusalomu.

19Elyo Aimasi mwana Sadoki atile, “Shilekeni mbutukileko no kutwala ilyashi ku mfumu ukuti Yawe nakulubula ukufuma mu minwe ya balwani bobe.”

20Lelo Yoabu amweba ati, “Telelo uli nokutwala ilyashi ku mfumu. Uli nalimo ukutwala ili lyashi inshita imbi, lelo teti ucite ifi mu bushiku bwa lelo iyoo, pantu umwana wa mfumu nafwa.”

21Elyo Yoabu aeba umo umwina Kushi ati, “Kabiye kebe imfumu ifyo wamona.” Umwina Kushi nao epakukontamina panshi pakupeela umucinshi kuli Yoabu elyo abutuka.

22Aimasi umwana wakwa Sadoki atile kuli Yoabu, “Nangu cibe shani, napapata ndekafye na ine nkonke ulubilo pa numa ya mwina Kushi.” Lelo Yoabu ayasuka ati, “Mwana wandi cinshi ico na iwe ulefwaila ukukonkela? Iwe taukwete ilyashi nangu limo ilingapeelelwapo icilambu kuli iwe.”

23Nao Aimasi atile, “Nangu cibe shani, ndebutuka nkonke.” Kanshi Yoabu epakumweba ati, “Butuka.” Elyo Aimasi akonka ulubilo mu mbali ya nshila ye wanga no kucilawila umwina Kushi.

24Davidi acili ekele pakati ka mpongolo shibili, umulinshi anina pa mulu wa mutenge wa mpongolo pa cibumba. Ilyo ainuna amenso, amona umuntu umwaume alebutuka eka.

25Umulinshi apunda ku mfumu no kuyeba pali ici. Elyo imfumu yatila, “Nga cakuti alifye eka afwile ali ne lyashi ilisuma.” Nao umuntu esafye no kupalamina.

26Kabili umulinshi amona umuntu na umbi alebutuka, elyo aita umulinshi wa pa mpongolo ati, “Mona umuntu na umbi alebutuka eka!” Elyo imfumu yatile, “Nao wine afwile aleletafye ilyashi ilisuma.”

27Elyo umulinshi atila, “Namona ine kwati muntu wantanshi ukubutuka kwakwe kupalile Aimasi mwana Sadoki.” Imfumu yatila, “Muntu umusuma uuli ne lyashi lisuma.”

28Awe Aimasi akuuta ku mfumu nokutila, “Fyonse filifye bwino!” Pakuposha imfumu akontamina panshi nokutila, “Napaalwe na matotelo Yawe Lesa wenu pakulubula abantu abaimishe amaboko yabo kuli shikulu imfumu yandi.”

29Elyo imfumu yaipwishe aiti, “Bushe umulumendo Abusalomu ali umutende?” Nao ayasuka ati, “Namwene icimfulunganya icikalamba mu nshitafye ilyo Yoabu ali nokuntuma ne mubomfi wenu. Elyo na ine ne mubomfi wenu, kwena nshishibe ifyo cali.”

30Nayo imfumu yamweba aiti, “Iminina kumbali no kulolela pano pene.”

31Kabili nao umwina Kushi afika no kusosa ati, “Mwe shikulu imfumu yandi, umfweni ilyashi ilisuma! Yawe namulubula imwe ilelo ukufuma kuli bonse abamwimine.”

32Elyo imfumu yaipusha umwina Kushi aiti, “Bushe umulumendo Abusalomu ali umutende?” Umwina Kushi nao ayasuka ati, “Shi abalwani bakwa shikulu imfumu yandi, na bonse abakwimina kukucita ububi bengaba ngo mulumendo uyu.”

33Awe capapwishe imfumu. Yaile pa muputule wa pamulu ukupitila ku mwinshi wa mpongolo no kulalila. Ilyo yaile, yatile, “Iye we mwana wandi Abusalomu! Mwana wandi Abusalomu! Cawama nga cakuti nine mfwile ukucila iwe. Iwe Abusalomu, umwana wandi, umwana wandi!”

← Chapter 17 Jump to: Chapter 19 →