Jonah 2

Bemba

← Chapter 1 Jump to: Chapter 3 →

1Elyo Yona apepele kuli Yawe Lesa wakwe ilyo ali mu nda ya cisabi ati,

2“Mu kupelelwa kwandi nalilile kuli Yawe, nao anjasuka. Nalilile ninshi ndi mu nda ya ku calo ca bafwa, ne shiwi lyandi walyumfwa.

3Pantu wamposele muli bemba uwashika, pakati nankati ka menshi. Amenshi yeka yeka eyanshingulwike, na matamba yobe yonse yalempita pamulu.

4Na ine epakutila, ‘Iwe nauntamfya pa cinso cobe. Kanshi Itempele lyobe ilyamushilo ine nkalimona shani nakabili?’

5Amenshi nayanjibisha, yalepita na pamulu, ine ndekafilafye. Itenga elinshingulwike, icani ca muli bemba nacintabilila na ku mutwe.

6Nintotobela mwisamba lya mpili, njile ku calo uko imipilikisho nainjisalila, lelo iwe we Yawe Lesa wandi, naufumya umweo wandi mu nindi.

7“Ilyo ndi mupepi no kuleka umweo, elyo naibukisha iwe we Yawe, ne pepo lyandi lyafika uko uli, mwi Tempele lyobe ilyamushilo.

8“Abapepa ifilubi ifyabuwelewele, bena balileka ukukupetamina.

9Lelo ine kwishiwi ilyakutotela nakulakutuula ne lambo, no kucita fyonse ifyo nalaile. Ala niwe we Yawe uupususha abantu.”

10Elyo Yawe aeba icisabi, naco epakuya lukila Yona ku mulundu.

← Chapter 1 Jump to: Chapter 3 →