Malachi 3

Bemba

← Chapter 2 Jump to: Chapter 4 →

1Yawe umwine wa fita alesosa ati, “Moneni, ine nkatuma inkombe yandi iyakuntangilila, iyakumpekanishisha inshila. Ala Imfumu iyo mufwaya, mukapulikilwafye yaisa kwi Tempele lyaiko. Inkombe iyo imwe mufuluka, ikesa kukulumbilisha icipangano candi.”

2Elyo nomba bushe nani akesa shanshako mu bushiku akafika? Nani akapusuka ilyo akesa moneka? Pantu ena akesa ba ngo mulilo wa mwilungu umo bengulwila ifyela, akesa ba nge sopo ilyamaka ilyakusambila.

3Akesa mukulalubulwisha ngo muntu uuleengulula no kuwaminisha silifa. Akesa wamya bamwana Levi nga filya fine bawaminisha silifa na golide. Elyo nabo nomba bakalatuula Yawe imituulo iya mu bololoke.

4Imituulo iyo abena Yuda na bena Yerusalemu bakalatuula Yawe, elyo nao nomba akalasekelamo nga filya fine caleba kale mu myaka yakale.

5Yawe umwine wa fita aletila ati, “E mulandu ine nkesa kukumulubulwisha imwe, nkesa shinina bwangu bwangufye abantu ababuka, abacita ubucende, abalapa ubufi, abacenjelela ababomfi pakubalipila amalipilo yabo, abafyenga bamukamfwilwa na bana banshiwa, abafyenga na beni abenafyalo, kabili abashankwatila akatiina.”

6Yawe umwine wa fita aletila ati, “Cine cine ine ne Yawe nshifutuka iyoo. E mulandu wine imwe bamwana Yakobo mushalobela.

7Ukufuma ku nshita ya fikolwe fyenu, imwe mwalipula mu mafunde yandi, tamuyakonka nakalya nga filya fine ne fikolwe fyenu fyalecita. Kanshi imwe bweleleni kuli ine, na ine ndi nokubwelela kuli imwe.” Lelo imwe mulepusha amuti, “Nga kuti twacita shani pakubwelela uko uli?”

8Eico na ine ndemwipusha nati, “Bushe umuntu kuti acenjesha ine ne Lesa? Ala nakalya, lelo kwena imwe mulancenjesha. Muncenjesha shani? Ni mukukanaleta icapekumi, na mukukanaleta imituulo.

9Mwashama imwe bonsefye, pantu umushobo wenu onsefye apo wapela ulancenjesha.

10Akuleteni ku ŋanda yandi umutuulo uutuntulu uwa capekumi, epakuti icakulya cilebamo mu ŋanda yandi. Aleni njesheni ne Yawe umwine wa fita, mumone nga nshakamwiswile amatala ya mulu, no kumupongolwela ifintu ifingi ifyakuti na pakubika pakabule.

11Nshaleleka makanta ukuti alemonawila ifisabo iyoo, ne fimuti fya myangashi mu mabala yenu tafyakalelukusha ifisabo fyaiko.” Efyasosa Yawe umwine wa fita.

12“Elyo na bantu ba mishobo yonse bakulatilafye, ‘Awe imwe mwalishuka,’ pantu mu calo cenu mukalaba insansa. Nine Yawe umwine wa fita nalanda.”

13Yawe aletila ati, “Ifyo imwe mulanda pali ine, filankalifya umutima. “Lelo imwe mulanjipusha amuti, ‘Nga finshi ifyo ifwe tukulandapo?’

14Nico imwe mutila amuti, ‘Ukubombela Lesa, awe kuicushafye. Nga finshi ifyo ifwe tumwenamo mukulasunga amafunde yakwa Yawe umwine wa fita, na mukulaenda abafiitwa pakumulanga ukuti tulelanguluka pafyo tubifishe?

15Ukulingana nefyo ifwe tumona, tutila abacilumba balipaalwa. Elyo abacita ifyabubifi nabo balishuka, elyo abesha Lesa nabo balapusumuka.’”

16Elyo abantu abakwatile Yawe akatiina balasoshanya, ninshi Yawe nao alekutika, aleumfwa nefyo balelanda. Elyo icitabo icipombwa icacibukisho calembelwe pa cinso cakwa Yawe ica mashina ya bantu abamukwatile akatiina no kucindika ishina lyakwe.

17Elyo Yawe umwine wa fita asosa ati, “Aba bena ebakaba abantu bandi abo nacindamika. Ubushiku ine nkabombapo cimo, bakaba abandifye. Ine nkabalangulukilako, nga filya fine umuntu alangulukilako umwana wakwe uumubombela.

18Elintu nakabili mukashininkisha ifyo abantu abololoke baibela ku bantu ababifi, ifyo abantu abamombela baibela ku bantu abashimombela ine ne Lesa.”

← Chapter 2 Jump to: Chapter 4 →