Micah 3

Bemba

← Chapter 2 Jump to: Chapter 4 →

1Ine nalisosele nati, “Umfweni kuno imwe mwe ntungulushi sha bakwa Yakobo, mwe bakateeka ba ŋanda yakwa Israeli. Bushe teimwe mulingile ukwishiba umulinganya?

2Imwe mwalipata ifisuma, mwatemwafye ifyabipa. Mulafunda inkanda sha bantu bandi abomi, mwashinsula ne minofu ku mafupa yabo.

3Mulalya iminofu ya bantu bandi, mwafundulula ne nkanda shabo. Mwatobaula na mafupa yabo, mwayaputula kwati yakubika mu cakwipikamo, kwati ni nama iyileipikwa mu mpoto.”

4Inshita imo ikafika ilyo bakalakuuta Yawe mutuule, nomba nao takalebaasuka nakalya. Akafisa ne cinso cakwe kuli bena pali iyo nshita, takaleumfwa mapepo yabo pa mulandu wa micitile yabo iyabipa.

5Ifi efyasosa Yawe ati, “Abantu bandi tepakubepwa kuli aba bakasesema. Ilyo bakwete ifyakulya, balasesema icibote, lelo abashibapeeleko kantu bena balababushisha inkondo.

6Eico bushiku bwenu nabupwa tamwakulakwatapo ne fimonwa, imfifi eyalamuponena, akasuba kakawila bakasesema, no lubuuto lukasanguke mfifi.

7Kanshi abasobela ifyakuntanshi bakabaseka, elyo ababuka nabo bakalengwa insoni. Bonse bakatalalafye tondolo, pantu Lesa talebasuka nakalya.”

8Nomba ine Yawe alimpeelesha amaka, alimpelesha no Mupashi wakwe, alimpeela na mano ayamulinganya. Alilenga nokuti ndeshipa pakwebelapo abakwa Yakobo pa bucisanguka bwabo, na bena Israeli pa bubifi bwabo.

9Umfweni kuno, mwe ntungulushi sha ba ŋanda yakwa Yakobo, na imwe bakateeka ba ŋanda yakwa Israeli, imwe mwalipata umulinganya, mulafulunganya ifintu fyonse ifyalungama.

10Mwe bakuula Sioni ku mulopa walufyengo, umusumba wa Yerusalemu ku bubifi.

11Bakateeka ba musumba bauteekelafye mukupokelela amafisakanwa, bashimapepo ababamo pakulondolwela abantu amafunde yakwa Lesa, ninshi kano bena batala balipililwapo. Bakasesema pakwebako abantu ifyo Lesa abasokolwela, nabo ninshi kano batala bamwenapo ulupiya. Elyo bonsefye balaimona ukuti Yawe aba nabo. Balasosa nokuti, “Ala ifwe tafyakatuponene ifinkunka nakalya, pantu Yawe aba na ifwe.”

12Kanshi imwe nimwe bene mukalenga ukuti Sioni bakamulima nge bala, nimwe bene mukalenga ukuti Yerusalemu akasanguke umwina wa fitantala, nokuti pa lupili apaba iŋanda yakwa Lesa pakasapilwe, pakabefye umutengo.

← Chapter 2 Jump to: Chapter 4 →