Daniel 11 — Chibemba

1“Na ine, mu mwaka wantanshi kukuteeka kwakwa Dariusi umwina Media naimine kukuba uwakumutungilila, kabili uwakumukoselesha.

2“Kanshi nomba kankwebe icacine. Imfumu shitatu eshikabala shikateeka icalo ca Pesia, elyo pakakonka iyalenga bune, yena ikakwatishapo ubukankala ukucila pa shinankwe. Ilyo ikakwatisha amaka ne fyuma, elyo ikalenga bonse ukwimina ubufumu bwa Bagiriki.

3“Elyo kukesa imfumu iyapambana. Yena ikateeka icalo icikulu, kabili ikalacitafye ifyo ilefwaya.

4Nomba ikatilafye cilya yakwatisha amaka elyo ubufumu bwaiko bukonaika, bukakanishiwe mu tupinda tune, lelo tabwakapeelwe kuli bamwane iyoo, elyo kabili tabwakakwate na maka nga yalya akwete pantu ubufumu bwaiko bukafumishiwapo no kupeelwa kuli bambi.

5“Imfumu ya ku kapinda ka ku kulyo ikaba iyamaka. Nomba mushika umo uwa fita fyaiko akacisha imfumu amaka, no buteko bwakwe bukacilapo, ne calo ico uyo mushika akalateeka cikacilapo ubukulu.

6Panuma ya myaka imo imo, bakacita icipangano. Umwana umukashana wa mfumu ya mu calo ca ku kapinda ka ku kulyo bakamufya ku mfumu ya calo ca ku kapinda ka ku kuso pakuti baleumfwana. Lelo takakwate amaka ne cumfwano cabo tacakaye patali, pantu umukashana wine pamo na babomfi bakwe abo akasenda pamo pene na mwane, bakabepaya bonse, bakepaila kumo kwine no wamukoseleshe.

7“Elyo umwaume umo pa ba lupwa lwa uyu mwanakashi akasansa ifita fya mfumu ya ku kapinda ka ku kuso, akabengilila mwilinga no kubacimfya.

8Akasenda ne milungu yabo, akasenda ifilubi fya cela kumo ne fintu fyabo ifyamutengo ifya golide ne fya silifa, no kufitwala akafitwala ku Egupto. Pakapita imyaka imo imo iyakuikalila ku matwi tondolo, takalaimina imfumu ya ku kapinda ka ku kuso.

9Elyo imfumu ya ku kapinda ka ku kuso ikaya sansa imfumu ya ku kapinda ka ku kulyo, nomba bakaya ifulumunako.

10“Abana ba mfumu ya ku kapinda ka ku kuso bakapekanya ibumba ilikalamba ilya fita no kubusha inkondo. Bakalulunkana nge lyeshi ilyamaka mpaka ukufika na kwilinga lya balwani.

11Elyo imfumu ya ku kapinda ka ku kulyo ikafulwa, ikemina imfumu ya ku kapinda ka ku kuso, ikaicimfya, ikacimfya ne bumba line ilikalamba ilya fita fyaiko.

12Iyo mfumu ya ku kapinda ka ku kulyo ikalaitakisha pa mulandu wakucimfya ifita ifishaifulila, na pa mulandu wakwipaululapo ifita ifingi, lelo kwena ukucimfya kwaiko epo kukapelela.

13Pantu imfumu ya ku kapinda ka ku kuso ikabwelela mu calo caiko, no kuya longanya ifita ifingi ukucila na pafyo yali nafyo kale. Pa nshita iyalinga ikabwelelamo, ninshi lyena ikaya ne fita ifingi, ne fyanso nafyo ifingi.

14“Pa nshita ilya abantu abengi bakasangukila imfumu ya ku kapinda ka ku kulyo. Na mu mushobo obe wine iwe Daniele, ala mukabamo abantu bamo abakali abakasanguka pa mulandu wacimonwa ico bamwene, lelo kwena bakailetelelafye.

15Kanshi imfumu ya ku kapinda ka ku kuso ikaya shinga umusumba we linga, no kupoka ikaupoka. Ifita fya calo ca ku kapinda ka ku kulyo tafyakatwalilile ukulwa inkondo iyoo. Nangufye ifita fya calo ca ku kapinda ka ku kulyo ifyacenjelesha, awe nafyo fine tafyakakwate amaka ayakushanshako nakalya.

16Uukaya basansa akabacita ifyo alefwaya, tapakamoneke uwakumulesha iyoo. Kabili akesa iteeka mu calo icawamisha pa fyalo fyonse, no kucimfya akacicimfya conse.

17Imfumu ya ku kapinda ka ku kuso ikapekanya ifita fyaiko fyonse pakuyapoka icalo conse ica mfumu ya ku kapinda ka ku kulyo. Nomba ikatala ikapande amano ayakumfwaninamo neyo mfumu. Ikatala ikatumine imfumu ya ku kapinda ka ku kulyo mwane umwanakashi uwakuti ikope, epakuti ikamone umwakwipaila iyo mfumu ya ku kapinda ka ku kulyo, lelo kwena imfumu ya ku kapinda ka ku kuso ikaicushafye.

18Elyo kabinge ikapilibukila mu lulamba lwa bemba na mu fishi mwine, no kuya sansa abantu abekalamo, no kucimfyamo abengi. Nomba mushika umo akansha iyo mfumu no kuipwisha icilumba.

19Elyo iyo mfumu ikabwelela ku calo caiko, no kulaikala mu misumba yaiko iya malinga. Uko kwine eko bakainashisha no kuipoka ubufumu, no kuloba ninshi yaloba.

20“Pa malo yaiko pakesa imfumu imbi. Yena ikatuma kasonkesha wamusonko pakuti ifyuma fyaiko fifulishe. Nomba pakapitafye akashita kanono ninshi akonaulwa, nomba tabakamwipaye ku mufulo nangu mu nkondo iyoo.

21“Imfumu ya ku kapinda ka ku kuso iyikakonkapo yena ikaba imfumu iyibi, ishakalinge na kuteeka abantu. Yena ikesa pumikishafye abantu, no kupoka ubufumu mu bucenjeshi.

22Ifita ifikaicilima ikafipasanganya, ikafyonawila kumo kwine na cilolo wa cipangano.

23Nangu iyo mfumu ikateekafye akamushobo ka bantu akanono, kwena ubufumu bwaiko bukakulilako, pantu ikalacita ubucenjeshi ubwakumfwana na bantu ba mitundu imbi.

24Mukupumikisha ikasansa icitungu cimo icikankala nganshi ica mu calo, ico yaleumfwana naco kale, no kucitamo ifintu ifyo ifikolwe fyaiko fishabalile aficita. Ifyuma ifyo ikatapamo, ne fya bene ifyo ikebamo pa nshita ya nkondo, ikafipeelaika abantu abakalaikonka. Ikalapanga ukusansa imisumba ya malinga, nomba ni pa nshita inono.

25“Ikapama ukwimya ibumba ilikalamba ilya fita pakuya lwisha imfumu ya ku kapinda ka ku kulyo, lelo kwena nayo ine imfumu ya ku kapinda ka ku kulyo ikapekanya ifita ifingi kabili ifyamaka ifyakulwa ne mfumu ya ku kapinda ka ku kuso. Lelo iyo mfumu ya ku kapinda ka ku kulyo tayakashangileko, pantu abantu baiko bakaisangukila.

26Abalya ne mfumu ifya kwisano ebakayonaula. Ibumba lyonse ilya fita fyaiko likapashika, ne fita fyaiko ifingi fikafwa mu nkondo.

27Elyo isho imfumu shibili shikalila petebulo limo, lelo mu mitima yashiko shikalapingilana, kabili shikalalandafye ifyakubepana. Tashakashuke mufyo shikapanga ukucita, pantu ninshi inshita iyapimwa tailafika.

28Imfumu ya ku kapinda ka ku kuso ikabwelelamo ku calo caiko, ikasenda fyonse ifyo ikatapa mu nkondo. Ikabwelela ku calo caiko ninshi ilepanga ukonaula icipangano camushilo. Lelo kwena ikatala yashala yabacitapo cimo ico itemenwe, elyo ikabwelelemo ku calo caiko.

29“Limbi kuntanshi ikabwelelako nakabili kukuya sansa icalo ca ku kapinda ka ku kulyo, nomba tacakabe ngefyo caleba kale.

30Pantu lyena aba ku Kitimu bakaya na mato yabo kukuya icincintila, nayo ikayatiina no kubwelelamo. Ikabwela ne cipyu no kwisa fulilwa abantu bakwa Lesa. Ikesa esha ukonaula icipangano icamushilo, pantu ikesa konkelela amano ya bantu abakasangukila icipangano camushilo.

31Ifita fyaiko fimo fikesa kowesha Itempele lyakwa Lesa, kumo kwine na malinga yaliko. Fikalesha na malambo ayatulwa inshiku shonse, fikabikamo ne cintu icabunani kabili icabonaushi.

32Iyo mfumu ikalacita amano pakusembeleka abantu abakalasuula icipangano camushilo, nomba abantu abaishiba Lesa awe bena bakashala umo bakosela ndi, no kukanya bakalakanya ne mfumu ine.

33Abamano ba muli abo bantu, bakalapandako abengi amano. Nomba pa kashita kamo, pali abo bantu bamo bakafwa ku nkondo, bamo bakafwa ku mulilo, bambi bakafwila muli bunkole, bambi bakafwila mukutapwa.

34Ilyo bakacula, kukamoneka abakubakoseleshako panono, lelo kwena abengi bakaikumika uko bali mu bucenjeshi.

35Abamano bamo bamo bakaipununa no kuwa, lelo cikalenga ukuti balopololwe, basangululwe kabili bawamishiwe ilyo inshita icilipo, pantu impela ikesa pa nshita iyo Lesa umwine apima.

36“Imfumu ikalacitilafye umo ilefwaila. Ikalaitakisha no kuisansabalika ukuti yena yalicila pa milungu yonse, ikalalanda na mashiwi ayakusuula Lesa Mukulu wine. Yena ikatwalilila ukushuka, mpakafye inshita yabukali ikapwe pantu ifyo Lesa apanga ukucita, fili nokucitika.

37Iyo mfumu yena ikasuulilapo ne milungu ya fikolwe fyaiko, ikasuulilapo no mulungu wine uo abanakashi batemwa. Emukuti ikasuulilapo ne milungu yonsefye, pantu ikaisansabalika ukucila iyi milungu yonse.

38Pa malo ya iyo milungu, ikapyanikilapo umulungu umo uwakulinda imisumba ya malinga, uo ifikolwe fyaiko fishaishibe. Yena e mulungu uo ikalatuula golide, na silifa, no tumabwe twamutengo, ne fintu fimbi ifikankala ifyo ikakwata.

39Abenafyalo abakalapepa uyo mulungu, ebo imfumu ikapeela umulimo uwakulinda amalinga yaiko, na bakaisumina ukuti e mfumu yabo ebo ikapeela imilimo imbi iyacindamisha, no kubalambula impanga iyakuti emo bakaleikalila nge cilambu.

40“Ilyo ubufumu bwaiko bukalasumbila ukupwa, elyo imfumu ya ku kapinda ka ku kulyo ikaya sansa imfumu mbiye iya ku kapinda ka ku kuso, lelo nayo imfumu ya ku kapinda ka ku kuso ikemya amaceleta, ne fita fya pali bakabalwe na mato ayengi, no kulwisha pa maka imfumu ya ku kapinda ka ku kulyo. Imfumu ya ku kapinda ka ku kuso ikengilila ifyalo kwati lyeshi, no kufipupanya ikafipupanya.

41Ikengilila ne calo icawamisha pali fyonse, no kwipaululamo abantu amakana na makana. Lelo icalo ca bena Edomu, ne ca bena Moabu, ne ntungulushi sha bena Amoni, fyena fikapusukako.

42Ikasansa ifyalo ifingi, ne calo ca Egupto cine tacakapusukeko.

43Mu Egupto ikasendamo ifyuma ifyafiswa ifya golide ne fya silifa, kumo kwine ne fintu fimbi ifyamutengo ifyabamo. Ikacimfya na bena Libya na bena Kushi.

44Nomba intulubundi sha ku kabanga ne sha ku kapinda ka ku kuso shikaitiinya, kanshi ikalalwisha inkondo cipyu cipyu, no kulaipaya abantu abengi.

45Ikabika amatenti yaiko ayakulu kabili ayacindama pakati uku ni bemba, uku nako lupili ulwayemba kabili ulwamushilo. Awe no kufwa epo ikafwila, ukwabula nelyo umo uwakuti ayafweko.”