James 1

Chibemba

Jump to: Chapter 2 →

1Ine Yakobo, umusha wakwa Lesa ne Mfumu Yesu Kristu, namuposha bonse mwe nko ikumi limo na shibili isha bantu bakwa Lesa abasalangana icalo conse.

2Mwe bamunyinane, amacushi ya misango ne misango nga yamwishila, mulemona ukuti lishuko nganshi!

3Pantu mwalishiba ukuti ilyo icisumino cenu cileeshiwa ku macushi, ici cilenga ukushipikisha.

4Ukushipikisha kwenu kuli nokumoneka nganshi mufyo mulebomba, epakuti muleba abapwililika lyonse, abashabulisha nelyo cimo.

5Umo pali imwe nga takwete amano, alombe kuli Lesa ukuti amupeele. Lesa nao uupeelesha ne nsansa onse uwamulomba, akamupeela.

6Lelo uyu wine ilyo alepepa, afwile ukuba ne cisumino, ukwabula ukutwishika. Pantu umuntu uutwishika, apala itamba ilya pali bemba ilitumpauka no kusendwafye konse uko umwela wapuupila.

7Uyo muntu uwaba ifi, tafwile kutontonkanya ati Imfumu kuti yamupeela ico alomba.

8Abafye uwabula ukushininkisha ifyo ali nokucita, imicitile yakwe yaluka alukafye.

9Uwabwananyina umupina afwile ukumfwa bwino pali ico Lesa amucindamika.

10Umukankala uwabwananyina nao wine afwile ukumfwa bwino pali ico Lesa amupoka ubucindami. Pantu umukankala akalukuta nge luba lya cani.

11Akasuba nga katula, katampa no kubalikisha, ukukaba kwakako kulenga icani ukuma. Amaluba ya cani yalalukuta no kuyemba kwaciko kwapwa. Mu musango umo wine efyo umukankala akonaulwa pa nshita apamfiwe na makwebo yakwe.

12Alishuka umuntu uushipikisha mu macushi. Pantu nga acimya amacushi, akapokelela icilambu camweo ico Lesa alaya abo abamutemwa.

13Umo nga atunkwa elatontonkanya ukuti ni Lesa eulemutunka. Pantu Lesa teti atunkwe ne fyabipa, elyo umwine wine tatunka muntu.

14Lelo umuntu atunkwa ilyo ulunkumbwa lwakwe lwamusembeleka no kumwikata.

15Ulunkumbwa nga lwakula, luleta ububifi. Ububifi nga bwakula, ninshi buleta imfwa.

16Ala mwilabepwa mwe bamunyinane!

17Ifyabupe fyonse ifisuma ifyo tupokelela ne fyawamisha umupwilapo fifuma ku mulu. Fifuma kuli Lesa Tata uwabumba ifya mu mulu ifipeela ulubuuto. Muli wena tamwaba imfifi, taluka.

18Lesa umwine kukufwaya kwakwe ewatufyele kwishiwi lyakwe ilyacishinka. Acita ifi pantu alefwaya ukuti tube abantanshi pa fibumbwa fyakwe fyonse.

19Mwalishiba mwe bamunyinane mwe batemwikwa bandi ukuti, onse afwile ukwanguka ukumfwa, lelo uwatekanya pakulanda, kabili uushifulwa bwangu.

20Pantu icipyu ca muntu tacileta cisuma ico Lesa afwaya.

21Kanshi lekeni ifyakowela fyonse ne misango ibi yonse mucili nayo. Mulenakila Lesa no kupokelela amashiwi yakwe ayo abyala mu mitima yenu ayaba na maka yakumupususha.

22Mwilaibepa mukupelelafye pakumfwa amashiwi yakwe, lelo mulecita nefyo yalemweba.

23Umuntu uumfwafye amashiwi lelo tacita ifyo yalemweba, aba kwati muntu uuilolesha pa menso mu mulolani.

24Cilya apwa ukuilolesha afumapo, apopenefye alaba nefyo amoneka.

25Lelo umuntu uulolekesha mwifunde ilyapwililika ilitulenga tube abantungwa, kabili akonkanyapo ukulinakila, tapelelafye mukumfwa alaba nako lelo alecita ifyo omfwa, ninshi Lesa akamupaala muli fyonse ifyo alecita.

26Bushe utila ndi mwina Lesa? Nga waba cilandelande ninshi uibepafye no bwina Lesa bobe nabo bwafyefye.

27Ubwina Lesa ubo Lesa Shifwe amona ukuti bwalipwililika ku busuma, kwafwa bakashiwa na bamukamfwilwa mufyo balekabila, no kuitalusha ku fyakowela fya pano calo.

Jump to: Chapter 2 →