2 John 1

Edo ((E Baibol Ẹdo) Version 1996)

Jump to:

1Ọmwa nii ne ọre Ediọn ọre ọ gbẹn ebe na gie okpokhuo nii, ke ẹe kevbe ivbi ẹre ne I ho ẹmwẹ ọnrẹn ẹsẹse. Ẹ i re mẹ ọkpa, sokpan emwa hia ne ọ ghi rẹn ẹmwata nẹ, ọre ọho ẹmwẹ ruẹn.

2Rhunmwuda wẹ, ẹmwata rre uwu ima nẹ, ọ gha vbe gu ima gha rrọọ rhinrin ẹdẹ.

3Osanobua ne Erha, kevbe Jesu Kristi ne Ovbi Evbavba ne ọ rhie ẹsọhẹ itohan kevbe ọfumwegbe ne ima, ne ọ gele gha re ọghomwa vbe ẹmwata kevbe aho ẹmwẹ ọmwa.

4Umiẹn vbene ẹko rhiẹnrhiẹn mwẹ uan hẹ, vbe I miẹn wẹ eso vbe avbe ivbi uẹ rrọọ vbe uwu ẹmwata zẹ vbene Evbavba yi ẹre iyi ne ima.

5Rhunmwuda ọnii, ọre I na nọ ruẹn nian okpokhuo ne ọ ghaan, wẹ, ne uwa gie ima hia gha ho ẹmwẹ egbe. Ẹ i zẹdẹ re iyi ọgbọn ọre I gbẹn ebe ẹre guẹ, iyi ne a mu ye ima otọ ke omuhẹn wa gha dee ọre nọ.

6Aho ẹmwẹ ọmwa ne I ta ẹmwẹ ọnrẹn na ọrọre, wẹ ne ima gha ya avbe iyi ne Osanobua yi ru emwi. Nene iyi, zẹ vbene uwa họẹn ke omuhẹn gha dee ọrọre wẹ: wa hia gha rrọọ vbe uwu aho ẹmwẹ ọmwa.

7Avbe ọrẹrẹ ọmwa ni bun vẹ ku agbọn hia, emwa ni ma tae wẹ Jesu Kristi gele khian ọmwa ne ọ sẹtin wu. Egbe ọmwa vberriọ, ọrẹrẹ ọmwa nọ. Rẹn ọrọre oghian Kristi.

8Wa ghi khẹ yegbe nian khekherriọ, ne uwa ghẹ ya mu emwi ne uwa winna yi nẹ fua, sokpan ne ere ne ọ rrọọ sẹ uwa obọ vbe ne ọ vuọẹn.

9Ọmwaikọmwa ne ọ ma rhie owẹ lele emwi ne Jesu ma emwa ẹre, sokpan ọ keghi fian yan rẹn, ẹ i mwẹ Osanobua. Sokpan ọmwa ne ọ rhie owẹ lele emwi ne ọ ma emwa ẹre, ọ mwẹ Erha kevbe Ọmọ.

10Rhunmwuda ọnii, ọmwa gha bu ruẹ la owa vbe ne a na miẹn wẹ, ọ ma rhie iruẹmwi na rre, ghẹ giẹe la owa. Ghẹ kue zẹdẹ kha ma rẹn wẹ, “Ọfumwegbe nọ nuẹn.”

11Rhunmwuda, ọmwa ne ọ na erhunmwu ọfumwegbe ne ẹẹn ọ gu ẹe mwẹ obọ vbe iwinna dan ne ọ winna.

12I wa mwẹ emwi ni bun ne I gha tama ruẹn, sokpan ẹ i re ebe vbe ẹmu ne a ya gbẹn ebe ọre I gha ya ta ẹe, sokpan, I mwẹ ọnrẹn vbe ekhọe ne I do miẹn uwẹ aro, ne I wa tobọ mwẹ guẹ guan, ne ọyẹnmwẹ miẹn ehe na sẹ mwa fo.

13Avbe ivbi ọtuẹn ne okhuo ni ghaan giotuẹ uwa.

Jump to: