2 Timothy 4

Edo ((E Baibol Ẹdo) Version 1996)

← Chapter 3 Jump to:

1I ye ọghọ vbe ute tama ruẹn, vbe odaro Osanobua kevbe Kristi Jesu, Ọmwa ne ọ ra bu ohiẹn emwa ni rre agbọn kevbe ni wulo nẹ, rhunmwuda urremwẹ ọnrẹn kevbe Arriọba ẹre, I yi ẹre iyi nuẹn.

2Gha kpe orhu nene ẹmwẹ, mu yan rẹn wẹ, ne a gha ta ẹe, deghẹ ẹghẹ ke yọ, ra ọ ma ke yọ ne u gha yae la emwa ekhọe, ne u gha gu ọmwa gui, ne u gha rhie igiẹdu ne emwa, kevbe ne u gha ye i ziengbe ma emwa emwi.

3Rhunmwuda ẹghẹ dee ne emwa i gha ra na danmwehọ iruẹmwi ẹmwata, sokpan iran ghi lele ne ọ khọn iran, iran ghi silo avbe emamwaemwi gboo ne egbe iran, ne iran gha ta egbe ẹmwẹ ne ohanmwẹ ọnrẹn gbe iran ma iran.

4Iran gha fi iyeke gbe ẹmwata ne a danmwehọ ẹre, iran ghi gha danmwehọ umaranmwẹ.

5Sokpan, wẹ ghi da egbe ruẹ yi, vbe ne emwi rhirhi gha ye hẹ, gha ziengbe oya, gha winna iwinna ọmwa ne ọ kpe orhu Iyẹn Ne ọ maa ne u vbe gha winna iwinna ruẹn hia, zẹ vbe ọguọmwadia Osanobua.

6Zẹ vbe ọghomwẹ, ẹghẹ ne a ra na ya mwẹ zọ ese, sẹ nẹ nian, ẹghẹ sẹ nẹ ne I ra ya fi agbọn na ye otọ.

7I ni nẹ vbene ẹtin mwẹ sẹe, vbe nene ulẹ, I rhie nene ulẹ sẹ eke ne a vin owẹ yi nẹ, I rhie nene iyayi mwẹ nẹ.

8Wanwanna nian, igho ọmwẹguae ne a ra se yọ mwẹ obọ dia khẹ mwẹ nẹ, nene ẹde ọmwa ẹmwata, ne Nọyaẹnmwa ne ẹ i bu eku gha mu mẹ Ẹdẹ ne ẹdẹrriọ, ẹ i vbe re mẹ ọkpa, sokpan kevbe iran hia ni ye aho ẹmwẹ ọmwa diakhẹ ẹghẹ ne ọ gha ya ye egbe ladian.

9Hia ne u rherhe bu mwẹ gha dee.

10Rhunmwuda agbọn na rhiẹnrhiẹn mu e Demas ukpẹ nẹ, ọ kpao sẹ mwẹ rae, ọ kpao gha rrie Tesalonaika, e Kresens rrie Galatia, e Taitọs rrie Dalmatia.

11E Luk ọkpa ma ghi gba rre emwa. Tie Mak ne u rhie ẹre ba egbe gha dee rhunmwuda, ọ gha sẹtin yo mwẹ obọ vbe iwinna na.

12I gie Taikikọs gha rrie Ẹfisọs.

13U gha dee u ghi mu ẹwu mwẹ ne I sẹrae ye ọghe Kapos vbe Troas gha dee, vbe viọ avbe ebe nii gha dee, kpataki avbe enii ne a ya ohian ru.

14Emwi ne ọ ru mwẹ re ima ighẹ Alẹkzanda ne ogun ẹrọnmwọ. E Nọyaẹnmwa gha vbe ha ẹre osa emwi ne ọ ru.

15Wẹ tobọ ruẹ ghi vbe rhuanegbe vbe egbe ẹre, rhunmwuda, ọkpankpan ọre ọ ya ye ọmwa egbe ba ẹmwẹ ikporhu na.

16Ẹghẹ ne I na ya gui ẹzọ mwẹ vbe okaro, orhunmwu ọkpa ne ọ lele mwẹ yo ẹ i rrọọ, ehia keghi lẹ sẹ mwẹ rae. Osanobua ne ọ lahọ ne oghẹ kae ye iran owẹ.

17Sokpan, Nọyaẹnmwa keghi mudia ke mwẹ, ọ na rhie ẹtin yọ mwẹ iwu, sẹrriọ wẹ I keghi sẹtin kpe orhu ẹmwẹ nii ma avbe iran ne ẹ i re Ju hia họn, a keghi vbe wọlọ mwẹ hin uwu unu oduma nii rre.

18Erriọ Nọyaẹnmwa gha yuo mwẹ hin uwu ọkhọ hia rre, ọ ghi rhie mwẹ gha rrie Arriọba ẹrinmwi ẹnrẹn vbe ne a i na mwẹ ẹbe. Uyi ọre ọghọe ẹdẹ kevbe ẹdẹdẹmwẹdẹ. Isẹ.

19We Priska kevbe Akuila do, ke ẹe kevbe Onisimọs.

20Ẹrastọs yakọ vbe Kọrinti, I keghi vbe sẹ Trofimọs rae ye Miletọs, egbe ma rran rẹn.

21Hia ne u sẹ emwa ọ te sẹ ẹghẹ okhuakhua. Yubukọs, Pudẹns, Linua kevbe Klaudia wẹ uwa do, erriọ vbe nọ ne avbe etẹn nekpa hia fẹẹrẹ.

22Te Nọyaẹnmwa gha yaba orhiọn uwa. Te ẹsọhẹ Osanobua gha gu uwa hia gha rrọọ.

← Chapter 3 Jump to: