3 John 1

Edo ((E Baibol Ẹdo) Version 1996)

Jump to:

1Ọmwa ni ne ọre Ediọn, ọre ọ gbẹn ebe na gie Gaiọs mwẹ ne ọ ghaan, ọmwa ne I họ ẹmwẹ ọnrẹn vbe ẹmwata.

2Ọse mwẹ ne ọ ghan, I na erhunmwu ne agbọn gha ma ruẹn, kevbe ne egbe rran ruẹn ẹsẹse zẹ vbene I rẹnrẹn wẹ egbe rran ruẹn vbe uwu ekhọe.

3Ẹko hia keghi rhiẹnrhiẹn mwẹ uan vbe etẹn eso rre, iran na do khama mwẹ vbene u rhie ekhọe lele ẹmwẹ ẹmwata ni hẹ zẹ vbene u gele ka wa ru dee vbe ẹmwata.

4Emwi ọkpa i rrọọ ne ọ ghi ya ẹko mwẹ rhiẹnrhiẹn gberra ọnii vbe i họn wẹ ivbi mwẹ wa rrọọ vbe uwu ẹmwata nii.

5Ọse mwẹ ne ọ ghaan, u mobọ wa mu aro ye ẹmwẹ iwinna ne u winna ne avbe etẹn, uhin vbe a vbe miẹn wẹ, erriọvbe ọre iran khin.

6Iran wa ta ẹmwẹ aho ẹmwẹ ọmwa ne u mwẹ ghe esọsi sẹ edinran, lahọ, u ghi ru iyobọ ne iran ne iran ya gha khian, zẹ vbe ne ọ gha yẹ Osanobua.

7Rhunmwuda, okhian ne iran kpaegbe yo vbe ọghe iwinna Kristi, iran i miẹn avbe emwa ni ma yayi emwi rhọkpa.

8Rhunmwuda ọnii, ọ kere ne ima ni re eniyayi gha ye avbe emwa na obọ, ne ima miẹn ehe na gha mwẹ oghae vbe iwinna ne iran winna ne ẹmwata.

9I gbẹn ebe ne ọ ma tan gie esọsi, sokpan Diotrẹfis ne ọ ho ne irẹn gha re ọkaolotu iran, ma kue zẹ ye ẹmwẹ ne I tae hiehiere.

10Rhunmwuda ọnii, ẹghẹ ne I gha ya rre, I gha mu ẹmwẹ emwi ne ọ ru hia tuorre, ẹmwẹ ihin ne ọ talọe vbe ekpa mwa, kevbe avbe ohoghe ne ọ ta, sokpan, ọ ni ma yevbe sẹ ọe, avbe etẹn gha rre, ẹ i vbe miẹn iran yi, ọ ghi gha de avbe emwa ni te ho ne iran rhan obọ miẹn iran obọ yi, ọ ghi gha hia ne ọ khulo iran hin esọsi rre.

11Wa ne avbe ọse mwẹ, wa ghẹ gha ya egbe ta emwi dan, wa gha ya egbe ta emwi esi. Ọmwaikọmwa ne ọ ru emwi ne ọ maa ọghe Osanobua nọ, ọmwaikọmwa ne ọ ru emwi dan, ọ ma he miẹn Osanobua.

12Emwa hia ọre ọ wa na iyẹn Demetriọs ne ọ maa, ẹmwata tobọ ẹre vbe ta ẹmwẹ ọnrẹn ne ọ maa. Ma keghi vbe rhie osẹe ima ba ẹre, wa tobọ uwa rẹnrẹn wẹ, ẹmwẹ ne I ma ta, ẹmwata nọ.

13I wa mwẹ ẹmwẹ ni bun ne I gha ta ma ruẹn, sokpan I ma ho ne I ya ebe vbe ẹmu ne a ya gbẹn ebe ta ẹe.

14I mwẹ ọnrẹn vbe ekhọe ne I do miẹn ọẹn aro vbe ọ ma he kpẹe ban, ne ima miẹn ehe na guan vbe ghe aro mwẹ ghe aro ruẹ.

15Ọfumwegbe ne ọ gue uẹ gha rrọọ. Avbe esiọ hia wẹẹ do. Tobọ ruẹ ya we avbe ọse mwa hia do.

Jump to: