Amos 3

Edo ((E Baibol Ẹdo) Version 1996)

← Chapter 2 Jump to: Chapter 4 →

1Wa ne ivbi Izrẹl, wa danmwehọ uhunmwu na ne Nọyaẹnmwa gie vbe ekpa uwa, emwa uhunmwu ẹvbo ni hia fẹẹrẹ ne Nọyaẹnmwa viọ ke Igipt gha dee:

2“Vbe avbe uhunmwu ẹvbo hia ni rre agbọn na, wa ọkpa ọre I rẹnrẹn, wa ọkpa ọre I vbe gbe aro ghe vbọ. Ọnii ọre ọ si ẹe ne orukhọ uwa na re emwi ne ọ mu ohan, ọnii ọ si ẹe ne a na miẹn wẹ ẹ i mwẹ I ma rri uwa oya yọ.”

3Arhin eva gha sẹtin gba kpaegbe gha rrie ehe ra vbe ẹ i re te iran ka gba taa ẹe ye otọ nẹ?

4Oduma vbe davan vbe uwu ẹgbo ra vbe ẹ i re te ọ gbe emwi nẹ? Ovbi oduma vbe zuyọn vbe uwu uvun ra vbe ẹ i re te obọ ẹre vba emwi nẹ?

5Ifi vbe mu ahianmwẹ ra deghẹ ẹ i re te a ke ẹre? Ifi wa vbe gheghe dọn ra adeghẹ ẹ i re emwi ọ dọn rẹn?

6A gha họn urhu okpe okuo vbe ẹvbo, ne ohan ghẹ mu emwa ni rrọ ra? Ọkhọ vbe sunu vbe ẹvbo ra vbene Nọyaẹnmwa ma na gie?

7E Nọyaẹnmwa ne Udazi i da ru emwi vbe ne ọ ma na ka ta ẹe ma avbe akhasẹ ne eguọmwadia ẹre nẹ.

8Oduma gha davan, de ọmwa ne ohan i ra mu. E Nọyaẹnmwa ne Udazi gha guaan nẹ, de ọmwa ne ọ gha sẹtin wẹ rẹn i ra ta uhunmwu ne ọ gie?

9Wa tama iran ni rre ẹguae vbe Igipt kevbe Asdọd wẹẹ: “Wa ya si egbe koko ye oke ni rre ọkpẹn e Sameria ne uwa ya ghe otighi kevbe emwi dan ne iran ru vbe evba.”

10E Nọyaẹnmwa khare wẹẹ, “Emwi ne emwa na ya okuo igbe kevbe imu viọ, ọ re iran viọ vuọn owa iran ne mose mose. Iran ma kue rẹn vbene a ru emwi uhẹn hẹ.

11Rhunmwuda ọnii, eghian gha lẹga otọ iran, iran ghi dunmwu odin iran, iran ghi fu avbe emwi ni rre owa iran ne mose mose viọ.”

12E Nọyaẹnmwa khare wẹẹ, “Zẹ vbene ọsuohuan rhọ owẹ ra ehọ ohuan ne oduma gbe re vbe otọ, erriọ zẹẹ, ibozẹghẹ ọ re ọ ra miẹn uhunmwu vbe ivbi e Sameria, ni niẹn obọ niẹn owẹ ua lele aga ne purhẹ iran.

13Wa danmwehọ nian, ne uwa gu ivbi uniẹn Jekọb guan ye otọ khẹ ọ dee,” erriọ e Nọyaẹnmwa, Udazi ne Oghodua khare.

14“Ẹdẹ ne I gha rri ivbi Izrẹl oya ye orukhọ ne iran ru, I gha dunmwu Ogiukpo ne ọ rre Bẹtẹl rua, a gha vbe kpannọ igẹngẹn Ogiukpo hia kua, ehia ghi dele kuotọ.

15I gha dunmwu avbe owa ne a bọ ẹre ọghe okhuakhua kevbe ọghe owowo kua; avbe owa ne a ye akọn eni tee gha rẹnkhẹn uan, a gha dunmwu dọmwadẹ owa nekhua hia a.”

← Chapter 2 Jump to: Chapter 4 →