Deuteronomy 19

Edo ((E Baibol Ẹdo) Version 1996)

← Chapter 18 Jump to: Chapter 20 →

1“Nọyaẹnmwa ghẹ ghi fuẹn iran an nẹ ighẹ avbe emwa ne ọ ra mu ẹvbo iran ne uwa, ighẹ wa vbe munọ ẹvbo iran ke owa iran nẹ, wa na ghi gbe ẹkun sẹ otọ vbe evba.

2Wa ghi zẹ eha vbe uwu avbe ẹvbo nii. Wa ghi gha otọe ne e Nọyaẹnmwa ra mu ne uwa ye ukhukhu eha vbene ọkpa vbe uwu avbe ẹvbo na gha na gha rre ọkpọkpa vbọ ne ọmwa ne ọ gbe ọmwa ran miẹn ehe lẹ gha rrie ne a miẹn rẹn yi hin obọ ẹbe.

4A deghẹ ọmwa gbe ọmwa ne ẹ i re oghian rẹn rua, vbene ẹ i na re ẹmwẹ ọnrẹn, ọ sẹtin lẹ gha rrie ọkpa vbe uwu avbe ẹvbo na, ọ ghi lẹ fe.

5“Vbe igiemwi, a deghẹ arhin eva gba ye uwu ẹgbo ya fian erhan, a na miẹn wẹ ọkpa ghi fian erhan vbọ, uhunmwu ughanmwa rẹn keghi vbọ hin uze rre, ọ na gbe ọmwa nọkpa a, ọ sẹtin lẹ gha rrie ọkpa vbe uwu avbe ẹvbo na, ọ ghi miẹn uhunmwu.

6A deghẹ ẹvbo ọkpa kẹkan ọ re ọ rrọ, ọ gha rrei gbe, a ghi miẹn wẹ ọmwa ne ọ khẹke ne ọ rria ikhi ye izigha ne a de ni, ghi khu ọmwa ni mu, kevbe rhunmwuda ne ohu na mu ẹẹn ni, ọ ghi ya gbe ẹe rua ighẹ ọmwa ne ọ ma rri abe. vbene ọ rhirhi gha ye hẹ, te ọ gbe ọmwa ne ẹ i re oghian rẹn rua vbe ne ẹ i na re ẹmwẹ ọnrẹn.

7Ọnii ọ zẹe ne I na wẹ ne uwa zẹ ẹvbo eha ya otọ.

8“Deghẹ Nọyaẹnmwa Osanobua rua ghi vbe mu otọe uwa ne uwa zẹ vbe ne ọ yan ma avbe erha uwa odede, ọ na mu otọe ne ọ yan yi hia ne uwa.

9Ẹghẹ nii, wa ghi zẹ ẹvbo eha ọvbehe ba ẹre. Ọ gha mu avbe otọe na ne uwa, a deghẹ wa ru avbe emwi ne I tama uwa na hia, kevbe deghẹ wa ho ẹmwẹ Nọyaẹnmwa Osanobua rua, wa na vbe gha ru vbene ọ ma uwa ẹre.

10“Wa ru ọna, wa i khian vbe rri abe ọghe ne a na gbe ọmwa ne ọ ma rukhọ vbe otọe ne Nọyaẹnmwa ra mu ne uwa.

11“Sokpan a deghẹ ọmwa ghi ba gbe ogieva ẹre ua, ọ na lẹ gha rrie ọkpa vbe uwu avbe ẹvbo na ne a miẹn rẹn yi hin obọ ẹre rre vboo?

12Ọ gha ye rriọ, avbe ekaolotu ẹvbo ẹre ghi do mu ẹẹn, a ghi si ẹe gie ọmwa ne ọ khẹke ne ọ rria ikhi izigha nii ne ọ miẹn ehe na gbe ẹe rua.

13“Wa ghẹ tohan rẹn, wa wabọ izigha na an vbe otọ Izrẹl ne agbọn miẹn ehe na ma uwa.

14“Ghe fi uwu ọghe emwi ogieva ruẹ ne a rhie yọ ke ẹghẹ ne ọ kpẹre gha dee vbe otọe nii ne Nọyaẹnmwa Osanobua rua ra mu ne uwa.

15“Osẹe ọkpa ma sẹ ne a gha ya bu abe gbe ọmwa, ọ gha ghi kanmwa buan, osẹe eva ọ re ọ gha sẹ osẹe a te kha ighẹ ọmwa nii rri abe.

16Adeghẹ ọmwa ho ne ọ ho ọkhọ ye ọmwa ọvbehe egbe vbe ekpa ne ọ na mu ẹmwẹ kuan rẹn.

17Iran eveva ghi do mudia vbe ehe ọkpa ne a na ga nii, ne avbe ohẹn kevbe ni bu ohiẹn ni mu unu ẹghẹ nii, bu ohiẹn iran.

18Iran ni bu ohiẹn ghi kakabọ gualọ otọ ẹmwẹ nii ẹsẹse, a deghẹ te ọmwa nii wa gheghe mu ẹmwẹ kuan ovbi Izrẹl ne ihua ẹre.

19A ghi rri ọ re oya ne a gha te rri ọmwa ne a mu ẹmwẹ kuan ni re. Odẹ vbe nian, wa gha gbe ukhu iba vberriọ rua.

20Emwa hia ghi họn emwi ne ọ sunu, iran ghi rhie ẹwaẹn ye uhunmwu, a ighi miẹn ọmwa ọvbehe ne ohan ghẹ ghi gie ẹe zẹ egbe iba vberriọ.

21Wa ghẹ tohan ọmwa rhọkpa, oya ne ọ gha re ghi gha re, wẹ ne ọ gbe ọmwa, a ghi vbe gbe ẹe rua, ne ọ rhu ọmwa aro ọkpa, a ghi vbe rhu ẹre aro ọkpa, akọn ọkpa ye ihe akọn ọkpa, obọ ye ihe obọ, owẹ ye ihe owẹ.”

← Chapter 18 Jump to: Chapter 20 →