Exodus 35

Edo ((E Baibol Ẹdo) Version 1996)

← Chapter 34 Jump to: Chapter 36 →

1E Mosis keghi tie ivbi Izrẹl hia si koko, ọ keghi tama iran wẹẹ, “Emwi ne Nọyaẹnmwa yi ẹre iyi wẹ ne uwa gha ru ọre ena khin:

2Ẹdẹ ehan ọre uwa gha ya gha winna sokpan ẹdẹ ne ogihinrọn ghi gha re Ẹdẹ Ikẹtin ne ọ huanrẹn ne uwa, Ẹdẹ ọghe Ikẹtin ne a ya fiohan ne ime ne Nọyaẹnmwa. Ọmwaikọmwa ne ọ winna ẹn ẹdẹrriọ, a gha gbe ẹe rua.

3Wa ghẹ kue hie erhẹn vbe owa uwa vbe Ẹdẹ Ikẹtin.”

4E Mosis keghi tama emwa Izrẹl hia wẹẹ, “Emwi ne Nọyaẹnmwa yi ẹre iyi ọre ọna khin.

5Wa ghi zọhẹ gie Nọyaẹnmwa. Dọmwadẹ ọghọe ne ọ rhirhi gha ho ne ọ ru vberriọ ghi viọ emwi izọhẹ na rre: Igoru, esiliva, oze.

6Eto ohuan ne raghoragho, ne ọ vboro rhan-an, kevbe ne ọ baa, eto ovbiohuẹ ne vbukhẹẹ, ukpọn ne a ya eto ewe do.

7Ohian ogho ne a ya ẹmu ne ọ baa gbe, ohian ne vbukhẹẹ, erhan akasia.

8Ofigbọn ne a ya rhu ukpa, emwi ni winhin ne a viọ ye ofigbọn ne a nọnọ ye emwa uhunmwu, kevbe ne a viọ ye eturari ni winhin ẹsẹse,

9ikpẹrọnmwọ ni kọnkọn kevbe ikpẹrọnmwọ ne a gha ya zẹ adaghọ kevbe uhanhan ẹwẹe ọghe ogie ohẹn ose.

10“Emwa ifuẹro nii rre uwu owa hia ghi gha dee ne iran do ru emwi hia ne a yi ẹre iyi.

11Ehe ne a dia, owa ukpọn kevbe emwi ne a ya gue ẹre, adẹn ni rrọọ kevbe edọnmwẹ ọnrẹn, erhan ne a viọ gbe ẹre, ọkpọ nii rrọọ kevbe ẹzi ẹre.

12Ẹkpẹti ke avbe ọkpọ nii rrọọ, ugue ẹkpẹti nii, kevbe ukpọn onurho ne ọ degue ẹre.

13Eteburu, ọkpọ nii rrọọ kevbe emwi ne a ya ru emwi vbọ hia, kevbe ebrẹd ne a ya zọhẹ gie Osa.

14Erhan ọmukpa ne a mu ukpa yi, kevbe emwi ne a lo vbe evba hia, ukpa nii rrọọ, kevbe ofigbọn ọghe ukpa.

15Aka ne a na giẹn eturari kevbe ọkpọ ni rrọọ. Ofigbọn ne a nọnọ ye emwa uhunmwu, eturari ne ọ winhin, kevbe ukpọn onurho ne ọ rre onurho Owa Ukpọn ne a dia.

16Aka ne a na zọhẹ ne a giẹn uan, kevbe oze ne a ya wiẹn emwi ne a so ginna ẹn, ọkpọ ni rrọọ kevbe emwi ni lele ẹe khian, uwawa akhuẹ kevbe uhe ẹre.

17Ukpọn onurho ọghe ọlẹga ẹre, ọkpọ ni rrọọ, oze iran, ukpọn onurho ne ọ rre ehe ne a la la ọlẹga ẹre.

18Ukeke igbe kevbe irri ni rre ehe ne a dia kevbe ọlẹga ẹre.

19Ukpọn aghanghan ne ohẹn ya ru ugamwẹ vbe ehe ne ọ huanrẹn, avbe ukpọn ne ọ huanrẹn ọghe Errọn ne ohẹn kevbe avbe ivbi ẹre vbe ugamwẹ iran zẹ vbe ohẹn.”

20Ivbi Izrẹl hia keghi kpao.

21Dọmwadẹ emwa ne ọ ho ne ọ ru vberriọ keghi zọhẹ gie Osanobua ne a ya bọ Owa Ukpọn ehe ne Nọyaẹnmwa ye, emwi ne a ya ru ugamwẹ hia kevbe ne a ya sẹ ukpọn iruemwi.

22Ikpia kevbe ikhuo kevbe dọmwadẹ emwa ni ho keghi viọ ukotin ne a ya te emwi egbe rre, emwiehọ, oroka, emwiurhu, kevbe ikpẹrọnmwọ igoru ne iran ya fi ohan, zẹ vbe emwi izọhẹ gie Nọyaẹnmwa.

23Dọmwadẹ ọghọe ne ọ mwẹ eto ohuan ne raghoragho, ne ọ vboro rhan an, ra ne ọ baa, eto ovbiohuẹ ne vbukhẹẹ, ukpọn eto ẹwe, ohian ogho ne a ye emwi ne ọ baa gbe ra ohian ne vbukhẹẹ kegha viọ emwi ne iran mwẹ rre.

24Iran ne obọ ẹre vbe sẹ esiliva ra oze kevbe viọ izọhẹ iran gie Nọyaẹnmwa, iran ni vbe mwẹ erhan akasia ne ọ gha gie a lo ye emwi ne a kae hia keghi vbe viọ rre.

25Ikhuo ni fuẹro hia keghi ya eto ohuan ne raghoragho, ne ọ vboro rhan-an, kevbe ne ọ baa, sin oru ba eto ovbiohuẹ ne vbukhẹẹ viọ rre.

26Avbe ikhuo ni fuẹro hia keghi vbe ya eto ewe sin oru.

27Avbe ọkaolotu keghi viọ ikpẹrọnmwọ ni maa rre, ikpẹrọnmwọ ne a gba ye ẹwu iruemwi, kevbe uhanhan ukpọn ẹwẹe.

28Emwi ni winhin kevbe ofigbọn ọghe ukpa, kevbe ne a ya nọnọ ori ye emwa uhunmwu kevbe ọghe eturari ne ọ winhin.

29Ikpia kevbe ikhuo hia ni rre Izrẹl, ni vbe ho ne iran mwẹ obọ vbe iwinna ne Nọyaẹnmwa gie Mosis do kha wẹ ne a ru, keghi viọ emwi izọhẹ iran gie Nọyaẹnmwa.

30E Mosis keghi tama ivbi Izrẹl wẹẹ, “E Nọyaẹnmwa zẹ Bezalẹl ne ovbi Uri ne ovbi e Họ ne ẹwae Juda.

31Ọ ya orhiọn Osanobua vuọn rẹn sẹrriọ wẹ te ọ ghi mwẹ ifuẹro ẹtin kevbe irẹnmwi ne a ya winna iwinna ifuẹro hia.

32Ne ọ ya mwamwa ona ogie ẹwaẹn kevbe ne ọ vbe ya igoru, esiliva kevbe oze ru ẹe.

33Ne a ya giagia ikpẹrọnmwọ, ne a ya te emwi, ne a ya gbẹn erhan, kevbe iwinna ifuẹro ughughan ọvbehe.

34E Nọyaẹnmwa vbe rhie ne irẹn kevbe Oholiab ne ovbi Ahisamak ne ẹwae e Dan, ẹwaẹn ne iran vbe ma emwa ọvbehe ifuẹro iran.

35Ọ vbe rhie ifuẹro ne iran ya gha ru emwi hia ne owinna ru, emwa ni ya eto ohuan do ukpọn ne raghoragho, ne ọ vboro rhan an, kevbe ne ọ baa kevbe eto ovbi ohuẹ ne vbukhẹẹ kevbe ọghe emwa ni do ido kẹkan. Iran sẹtin winna iwinna ifuẹro hia, emwa ne ẹwaẹn emwi ne a mwa gba na iran khin.

← Chapter 34 Jump to: Chapter 36 →