Habakkuk 1

Edo ((E Baibol Ẹdo) Version 1996)

Jump to: Chapter 2 →

1Uhunmwu ne a gie ne Nọyaẹnmwa rhie ma e Habakọk ne akhasẹ ọ re ọna khin.

2Nọyaẹnmwa, inu ẹghẹ ọ re I gha datu nọ iyobọ la, a keghi zẹ yọmwẹ re, ne u do miẹn ima fan hin obọ uyinmwẹ ọkpankpan rre?

3Vbe u a ghi na gunmwẹ miẹn ọlọghọmwa vbenian hẹ yi? Vbe uwẹ ra sẹtin ziengbe gha ghe amaruẹse vberriọ hẹ yi? Omurhia kevbe uyinmwẹ ọkpankpan lẹga mwẹ; igbinna kevbe ẹzọ wa vbe rre ehe hia.

4Te uhi ye mitan mitan, ẹ i vbe mwẹ esa, a i vbe bu ohiẹn ẹmwata. Emwa dan ghi gha rria ase emwa ẹmwata, rhunmwuda ọnii, te ohiẹn ghi khian ne a khiẹn bu.

5E Nọyaẹnmwa tama emwa rẹn wẹẹ, “Wa gbe aro ke otọ vbe egbe ẹvbo ni lẹga uwa, emwi ne uwa miẹn gha wa yan uwa unu uan. I khian ru emwi eso ne uwẹ i ra yayi vbe u gha họn ẹn.

6I ra dọlegbe viọ ivbi e Babilọn ye ukpo ẹtin, iran ne isanmwisan kevbe ekpakpasusu nii. Iran wa ladian, ne iran gbe agbọn na dunmwu, ne iran ya gha khọn ẹvbo ọvbehe khian.

7Iran si ohan kevbe orrirri khian rhunmwuda itengbemu iran, emwi ne ọ khọn iran ọ re iran ru.

8“Okhian kẹ avbe ẹsin iran sẹ atalakpa, iran vbe mu ohan sẹ avbe oduma ne ohanmwẹ gbe. Emwa ni hin ẹsin ọghe iran, ehe ne ọ rrei ọre iran kegha hin ẹsin gha dee, ẹsin ya owẹ guọghọ otọe hia. Iran ghi vin rre zẹ vbe oghohọn ne ọ ra gbe emwi.

9“Ivbiyokuo iran ghi gha rhulẹ ye odaro vbe uwu akhọnmiotọ, ọrẹnkhuan. Emwa hia ghi gha guọ vbe iran a gha dee. Oghunmwu ne iran munọ ẹn bun vbe ikpekhaẹ ne otọe.

10Iran i ghe avbe ọba sẹ ọmwa, te iran wa ye avbe ekhaẹmwẹ gbe ogiẹ. Ogba ne a gba ye odẹ ne ọ gha sẹtin da iran yi i rrọọ. Iran gha mama ekẹn ye evba nẹ, iran ghi khọn mu ẹẹn.

11Iyeke ọnii, iran ghi bi gha khian vbe ẹhoho, iran rrie; ighe avbe emwa na ne ẹtin iran re ẹbọ ne iran gho.”

12E Nọyaẹnmwa, ke omuhẹn fẹẹrẹ gha dee, wẹ ọrọre Osanobua. Wẹ ọrọre Osanobua mwẹ, nọhuanrẹn kevbe etẹbitẹ. Nọyaẹnmwa, Osanobua kevbe ọmwa ne ọ degue mwẹ hin ẹbe rre, wẹ hannọ ivbi e Babilọn zẹ, u keghi ya iran wegbe ne iran miẹn ehe na gha rri ima oya.

13Sokpan, vbe uwẹ ra sẹtin ziengbe avbe igbẹki ne emwa dan na hẹ yi? Aro ruẹ huan gbe ne ọ gha sẹtin ghe ọkhọ, wẹ i vbe sẹtin gha ghe ughe vbe emwa a gha ru emwi dan, vbọzẹ ne uwẹ na hunwan yi vbe iran dunmwu emwa ni maa sẹ iran an?

14Vbe uwẹ a ghi ra ru emwi hẹ yi zẹ vbe ehẹn ra oghẹn atete ne ẹ i mwẹ ne ọ khaemwisẹ, ne ọ gha tama iran emwi ne iran gha ru?

15Ivbi e Babilọn, ẹghọe ọre iran ya munọ emwa vbene a munọ ehẹn. Iran ghi ya ọga silo iran gha khian, iran ghi vbe gha wee ye emwi ne obọ iran vbare.

16Uhin ighe te iran wa gho ọga iran, iran ghi vbe gha zọ ese ne iran, rhunmwuda, ọga iran ọ re ọ rhie emwi ne ọ ghi maa sẹ ne iran vbe emwi hia.

17Te iran ra wa gha fi umozo iran rhinrin ẹdẹ ra, ne iran vbe dunmwu agbọn ẹvbo rua vbe ne a i na mwẹ itohan?

Jump to: Chapter 2 →