Haggai 2

Edo ((E Baibol Ẹdo) Version 1996)

← Chapter 1 Jump to:

1Vbe ikpẹdẹ ọkpayan ugie, vbe uki ne ogihinrin, ọghe ukpo ọkpa nii, e Nọyaẹnmwa keghi vbe dọlegbe gie Hagai ne akhasẹ uhunmwu rre.

2Ọ tama Hagai wẹ ne ọ tama e Zerubabẹl ne gọvina ọghe Juda, kevbe Jọsua ne Ogie Ohẹn kevbe avbe emwa nii wẹẹ,

3“A gha ye miẹn ọmwarhọkpa vbe uwu uwa ra, ne ọ gha ye yerre vbene Ọgua Osa nii te ye hẹ ẹghẹ nii vbe umosemwẹ? Vbe ọ ghi khọ vbe aro uwa nian? Ẹ i zẹdẹ gia gie hiehiere.

4Sokpan, banbanna nian, wa ghẹ gie egbe wọ uwa rhọkpa, wa winna iwinna nii rhunmwuda, I rrọọ yaba uwa.

5Ẹghẹ ne uwa na ke Igipt ladian, I yanrẹn wẹ I gha gu uwa gha rrọ ẹghẹ hia. I ye gu uwa rrọ, rhunmwuda ọnii wa ghẹ fian afianma.

6“Vbe ọ ma he kpee wan, I gha mu ẹrinmwi rueghe, kevbe agbọn otọe kevbe okun.

7I gha ye avbe uhunmwu ẹvbo hia uhunmwu rhu, a ghi viọ emwi ẹfe iran gha die emwa na, Ọgua Osa ghi vuọn ne emwi ẹfe.

8Esiliva kevbe igoru ni rre agbọn na hia, ọghomwẹ nọ.

9Ọgua Osa ne ọgbọn na gha mose sẹẹ Ọgua Osa nẹdẹ, evba ọ re imẹ gha na rhie ne emwa mwẹ wẹ ne agbọn ma iran kevbe ne iran gha rre ọfumwegbe.” Erriọ Nọyaẹnmwa ne Oghodua khare.

10Vbe ikpẹdẹ enẹyan-ugie vbe uki ne ogihinrin vbe ukpo ne Ogieva ne Dariọs ya gha re ọgbaisi, e Nọyaẹnmwa ne Oghodua keghi vbe dọlegbe gu e Hagai ne akhasẹ guan.

11Ọ wẹẹ, “Tama avbe ohẹn ne iran guan ye ẹmwẹ awua vbene ọ kere ne ọ gha ye:

12Gie a kha ighe orhunmwu ọkpa rhie ukpudu emiowo vbe aranmwẹ ne a ya fi ohan nẹ vbe uwu aranmwẹ ne a ya zẹ ese, ọna vbuẹ ọre ye agbada ẹwu ẹre mu gha rrie, a deghẹ ọ ghi gie ẹwu ẹre ni dekan ebrẹd, evbare ne a le nẹ, ayọn ofigbọn oliv, ra evbareikevbare ne ọ rhirhi a gha khin, ọ gha ye evbare nii khian ne avbe ya fi ohan ra?” A ghi nọ ọta na, avbe ohẹn keghi wanniẹn wẹẹ, “Ẹn o.”

13Ẹre Hagai ghi na nọ wẹẹ, “Gie a kha ighe awua gu ọmwa rhunmwuda ighe ọ ya obọ kan orinmwi, a deghẹ ọ na ya obọ kan avbe evbare ne a kha na, ọnii gha ya iran khian ne ọ ma ghi huan ra?” Avbe ohẹn keghi wanniẹn wẹẹ, “Ẹn.”

14Ẹre Hagai ghi na kha wẹẹ, “Erriọ ọ re ọghe emwa otọe na wa vbe ye, kevbe emwi ne iran ya obọ ru hia, rhunmwuda ọnii, emwikemwi ne iran ya zẹ ọhẹ rrie Ogiukpo awua rrọ.”

15E Nọyaẹnmwa khare wẹẹ, “Wa ma miẹn emwi ne ọ sunu vbe egbe uwa na? Vbe uwa te suẹn gha dọlọ Ọgua Osa bọ,

16wa ghi kpao gha rrie ehe ne a si ọka gbo yi, ne uwa na rhie aro ye agban ugie, sokpan, igbe kẹkan ọ re uwa miẹn vbọ. Wa ghi wẹ wa ra sa egalọn ayọn ekigbesiyeha vbe ẹgbẹdin nọkhua, sokpan wa ghi miẹn ugie kẹkan vbọ.

17I gie ẹhoho kevbe owowo ne ọ giẹn emwi uan ne ọ do rhia emwi ne uwa te kọ hian a, sokpan, wa ma ye ro iro fi uyinmwẹ werriẹ.

18Ẹdẹnẹrẹ na ọrọre ikpẹdẹeneyan-ugie ọghe uki ne ogihinrin, ẹdẹ ne a gbe ẹyotọ Ọgua Osa ni fo. Wa ghi ye emwi ne ọ ra gha sunu ke ẹghẹ na kpao ẹro.

19A gha rhe miẹn wẹ, ọka kevbe avbe emwiokọ ni khọe i ghi rrọ, avbe erhan azara erhan ohọ, e pomegranẹt, kevbe oliv, ne ọ he mọ i rrọ, sokpan ke ẹghẹ na kpao te I ra gha fiangbe uwa.”

20Vbe ẹdẹ ọkpa nii, ikpẹdẹ enẹ yan ugie vbe uki, e Nọyaẹnmwa keghi vbe gie Hagai uhunmwu ukpogieva,

21gie Zerubabẹl ne gọvina e Juda wẹẹ, “I ra mu ẹrinmwi vbe agbọn rueghe.

22I ghi ya avbe arriọba kevbe ẹtin iran uhunmwu rhu, I gha ya avbe ikẹkẹ okuo kevbe iran ni hin iran uhunmwu rhu, avbe ẹsin gha wulo, iran ni hin iran khian gha gbele egbe ua.

23Vbe ẹdẹ ne ẹdẹrriọ, I gha rhie uwẹ e Zerubabẹl ne ọguọmwadia mwẹ. I gha ka uwẹ uhe ye aga ne u gha ya eni mwẹ khaemwisẹ. Wẹ ọrọre ọmwa ne I zẹe.” E Nọyaẹnmwa ne Oghodua ta ẹe nẹ.

← Chapter 1 Jump to: