Jude 1

Edo ((E Baibol Ẹdo) Version 1996)

Jump to:

1E Jud ne ọguọmwadia Jesu Kristi kevbe ọtẹn Jems ne okpia, ọre ọ gbẹn ebe na gie emwa hia ne Osanobua tie re, emwa ni rrọọ vbe uwu aho ẹmwẹ ọmwa ọghe Osanobua ne erha kevbe iran ne Jesu Kristi gbe aro ghe.

2Itohan, ọfumwegbe kevbe aho ẹmwẹ ọmwa ne ọ gha re ọ ghe uwa vbe ne ọ vuọẹn sẹ omwa.

3Wa ne ọse mwẹ ni ghan, ẹghẹ ne I na wa gha hia ne I gbẹn ebe gie uwa, vbe ekpa imiẹnfan ne ọre ọghe ima hia, ọre ọ na wa do la mwẹ ekhọe ne I gbẹn ebe gie ua, ne I ya rhie igiẹdu ne uwa, ne uwa gha gbinna nẹẹn khian ighẹ iyayi ni ne Osanobua rhie ne emwa rẹn hia uhukpa nii.

4Rhunmwuda, emwa dan eso rẹnrẹn la uwu ima vbe ne a ma na rẹn, iran gha mu ikporhu ẹmwẹ ẹsọhẹ Osanobua khian ne iran miẹn ehe na rhie otọ ne uyinmwẹ alama oghẹ iran, ne iran miẹn ehe na he Jesu Kristi ye otọ, ọmwa ne ọre Arowa ọkpa ne ima mwẹ kevbe Nọyaẹnmwa. Ẹghẹ ne ọ kpẹre ne ọ gberra, ọre Ebe ta ẹmwẹ a bu abe gbe emwa na, ye otọ ighẹ ne ọ do sẹ iran egbe na.

5A gha rhe miẹn wẹ wa ka rẹn emwi na nẹ, I ho ne I ye ye uwa ẹre rre, vbene a miẹn wẹ Nọyaẹnmwa miẹn ivbi Izrẹl fan hin otọ Igipt rre hẹ, sokpan vbe okiekie, ọ keghi gbele iran ni ma yayi ni rrọọ ua.

6Ye iran ne avbe odibo Osa rre, iran ni ma gbe ye egbe, vbe ehe ne a rhie ẹtin ne iran sẹ, sokpan, iran keghi kpao sẹ ehe ne a rhie ne iran gha ye rre. Osanobua hẹ iran ku uwu ebiebi ne ọ rre ototọ, a ya eghan etẹbitẹ de iran khẹ Ẹdẹ ne ẹdẹrriọ ne a gha bu abe gbe iran.

7Wa ye Sọdom kevbe Gomorra kevbe ivbi ẹvbo ni lẹga iran rre, emwa ni ru vbene avbe odibosa vbe ru, ne iran na gha ru emwi ne ọ ma gba vbe ekpa oghẹ, iran kegha fi ehia werriẹ ghe odẹ dan, a keghi ya erhẹn ne ọ giẹn ẹdẹdẹmwẹdẹ rri iran oya ne emwa hia gha miẹn ọnii waan.

8Erriọ ọ vbe ye, avbe emwa na miẹn umian, ne ọ ya iran ru orukhọ ghe egbe iran, iran ghi zan asẹ Osanobua, iran ghi gha ya ukpẹ sakan emwi ni mwẹ uyi ni rre odukhunmwu.

9Maikẹl ne olotu avbe odibo Osa ne a rẹn egbe, ma ru emwi vberriọ. Ẹghẹ ne ẹzọ na sunu ne irẹn vbe Setan, vbe iran muan ẹmwẹ ye ọmwa ne ọ gha mu ikun e Mosis, ohan ma gie Maikẹl ya ihẹn yan Setan ya bu ohiẹn gbẹe, sokpan ọ keghi kha wẹ, “Nọyaẹnmwa ọre ikọ uẹ.”

10Sokpan, iran na ghi gha ya unu salọ emwi ne iran ma rẹn otọ ẹre, avbe emwi nii ne egbe ma iran ẹre, zẹ vbe aranmwẹ oha, ọrọre emwi ne ọ vbe fuẹn iran uan.

11Umiẹn agbọn ne iran ye. Odẹ ne Ken lae ọre iran vbe la, iran keghi rhunmwuda igho ya egbe iran fi ohan ne abaku ru, zẹ vbene Balam ru. Isọtẹ fuẹn iran uan, zẹ vbe ne Kora sọtẹ.

12Iran ye vbe ehe ne ọ gbe iruẹn vbe ehe ne ima na rri evbare ivbiotu mwa, rhunmwuda evbare ọzuọ ọghe ifaegbe ua, iran. Ẹgẹn iran ọkpa ọre iran gua yi. Iran ye vbe ubimwẹ amẹ ne ẹhoho mu khian, amẹ ọnrẹn i rhọ. Iran yevbe erhan ne ẹ i mọ, ọ gha khọn rẹn ne ọ gha re ẹghẹ orhọ, erhan ne a vu ẹre uhe mu fua nẹ, ne ọ wa wu fẹẹrẹ.

13Iran ye vbe ogbigbi amẹ a kuọkan, ọghe okun, vbene uyinmwẹ efa iran na rhiegbe ma zẹ vbe ihu. Iran ye vbe orhọnmwẹ ni hẹ yo hẹ rre, emwa ne Osanobua rhie ihe ye otọ khẹ nẹ, vbe uwu ebiebi ne ọ dinmwi sẹẹ.

14Inọk ne ọ re, ọmwa ne ogiehan ke egbe Adam wa gha dee zẹẹ, ọre ọ guan ẹmwẹ iran na ye otọ ẹghẹ nii wẹ: “Ghe, Nọyaẹnmwa gha rre ke irẹn kevbe arriaigbe vbe uwu avbe odibo ẹre ni huanrẹn.

15Ne ọ do bu ohiẹn iran hia, ne ọ do bu abe gbe avbe emwa dan hia, rhunmwuda emwi dan hia ne iran ru, kevbe rhunmwuda ẹmwẹ ihin hian ne iran ne emwa dan na guan gie Osanobua!”

16Ẹzọ uwu unu ọre iran na gui vbe ẹhi, iran ghi gha ba emwa ọvbehe ifi ẹzọ, emwi dan ni rre iran ekhọe ọre iran ru, iran ghi gha ya unu kpa egbe iran, iran ghi gha ya unu lalọ emwa ọvbehe egbe, ne obọ iran miẹn ehe na vba emwi ne iran ho.

17Sokpan, wa ne ọse mwẹ, wa ghi ye rre o. Wa ye avbe emwi ne avbe ukọ Nọyaẹnmwa Jesu Kristi tama uwa ẹghẹ ne ọ gberra.

18Rhunmwuda iran khare wẹẹ, “Ọ gha ghi sẹ ẹdẹ okiekie, emwa eso gha rre, iran ni gha do gha ya uwa gbe ogiẹ, emwa ni gha ru emwi dan ni rre iran ekhọe.”

19Iran na ọre ọ si iwannegbe rre, iran ne amiẹn wẹ, emwi egbe kẹkan ọkpa ọre ọ ya iran ruemwi, emwa ne Orhiọn nii i gue hiehie.

20Sokpan zẹ vbe ọghe uwa, wa ne ọse mwẹ, wa gha wo ye egbe vbe emwi iyayi uwa ne ọ huan sẹ. Wa gha na erhunmwu vbe ẹtin Orhiọn Ne Ọ Huanrẹn.

21Wa ghi vbe mudia vbe uwu aho ẹmwẹ ọmwa Osanobua, zẹ vbene uwa mudia khẹ Nọyaẹnmwa Jesu Kristi ne ọ gha la ekpa itohan rẹn rhie ẹfe ne ẹ i fo ne uwa.

22Wa gha tohan iran ni ye biro eva.

23Wa ghi miẹn iran fan vbe ekpa ne uwa gha na sanmwẹ iran ke uwu ọgẹn erhẹn ladian. Wa vbe gha mwẹ itohan ne a rhie ohan ba ghe emwa ọvbehe, sokpan wa gie ukpọn ne ẹkun iran, ne orriarria orukhọ iran ya iruẹn yi, gha sọnnọ uwa.

24Rọẹn ni ne ọ gha sẹtin da uwa yi ne uwa ghẹ de, ne ọ gha viọ uwa mudia vbe odaro uyi ẹre, zẹ vbe emwa ne ẹ i mwẹ ozan, kevbe ne ọ sẹ ọyẹnmwẹ.

25Ne Osanobua ọkpa kevbe Ọmiọnmwafan, la ekpa Jesu Kristi Nọyaẹnmwa, ọre uyi, ọdakha, ẹtin kevbe asẹ gha rrọọ na, ke orre ni gberra hia gha dee do sẹ wanwanna, ẹdẹ kevbe ẹdẹdẹmwẹdẹ. Isẹ.

Jump to: