Matthew 22

Edo ((E Baibol Ẹdo) Version 1996)

← Chapter 21 Jump to: Chapter 23 →

1Jesu keghi vbe dọlegbe ya itan gha gu emwa guan.

2“Arriọba ẹrinmwi yevbe ọba ọkpa ne ọ le evbare irhiọha ọghe ovbi ẹre nokpia.

3Ọ keghi gie eguọmwadia ẹre ne iran ya khama emwa ne a tiere wẹ ne iran gha dee. Sokpan, iran ma ho ne iran rre.

4Ọ keghi vbe gie eguọmwadia ọvbehe ya khama iran wẹẹ, ‘A le evbare nẹ, avbe ẹmila abẹgbe ne a ware, ọre a ya le ẹe, a wa mwamwa emwi hia ye otọ nẹ. Wa gha dee do rri evbare irhiọha’,

5sokpan a ma miẹn ne ọ zẹ ye ọre hiehie, edọmwadẹ ọghọe na wa gha ru ọghọe khian, eso la odẹ ugbo, eso la odẹ ẹki.

6Eso keghi munọ eguọmwadia ne a gie nii, iran mama iran, iran keghi gbele iran ruan.

7Ohu keghi mu ọba ni, ọ na gie ivbiyokuo ẹre, iran na ya gbele avbe izigha ni uan, iran na giẹn ẹvbo iran muotọ.

8Ọ keghi tie avbe eguọmwadia ẹre, ọ tama iran wẹẹ, ‘A le evbare irhiọha mwẹ nẹ, sokpan emwa oya iran na a te tie do rri evbare wa khin.

9Rhunmwuda ọnii, wa la ore, wa ya tie inu emwa ne uwa miẹn rre.’

10Avbe eguọmwadia keghi la ore, iran na ya koko emwa hia ne iran miẹn ne ọ maa, kevbe ne ẹ i maa, owa irhiọha ni keghi vuọn ne ẹvbo.

11“Ugbẹn vbe ọba ghi do ghe emwa ne a tiere, ọ keghi miẹn ọkpia ọkpa ne ọ ma yọ ẹwu irhiọha vbe evba.

12Ọba keghi nọ rẹn wẹẹ, ‘Ọse mwẹ, vbe uwẹ ya sẹ emwa na hẹ vbe ne u i na mwẹ ẹwu irhiọha yi?’ Sokpan okpia na ma miẹn ẹmwẹ guan.

13Ẹkpo nii ọre ọba ghi na khama avbe eguọmwadia ẹre wẹẹ, ‘Wa gba ẹre obọ gba ẹre owẹ, ne uwa mu ẹn fi uwu ebiebi vbe ore, ne ọ ya gha viẹ egbe kevbe ne ọ ya gha rri akọn vbe evba.’ ”

14Jesu keghi vbe wanniẹn wẹẹ, “Rhunmwuda, ni bun ọre a tiere sokpan ibozẹghe ọre a hannọ zẹ.”

15Avbe Farisi keghi ya si uma ne iran do ya ọta ne a nọ gualọ Jesu ẹmwẹ ne unu.

16Iran keghi rhunmwuda ọnii gie eso vbe uwu avbe erhuanegbe iran ba avbe igbesa Hẹrọd bu Jesu gha khian. Iran tama rẹn wẹẹ, “Ọmwa ẹmwata ọre ima rẹn ruẹn yi, ẹmwata ne ọ rre vbene Osanobua mu ẹmwẹ ẹdẹ agbọn emwa ne agbọn yi, ọre u ma emwa re, vbe ne u i na vbe lele ne agbọn khare, rhunmwuda ighe osi ẹrrẹe ọghe ukpo ne ọmwa ye, ẹ i si ọ.

17Tama ima vbene ọ ye hẹ vbe ekhọe uwẹ. Ma gha zẹ igho uhunmwu gie Nọgbaisi e Rom, a ghẹ ru nọ ra ẹ i re a ghẹ ru?”

18Sokpan Jesu wa rẹn ehe ne iran ghae yi, rhunmwuda ọnii, ọ wanniẹn tama iran wẹẹ, “Wa ni zẹ imamase, vbọzẹ ne uwa na ho mwẹ ẹmwẹ ne unu?

19Wa rhie agiẹghẹ igho ne uwa ya zẹ igho uhunmwu ọkpa mẹ ghe.” Iran keghi rhie gie ẹe.

20Rẹn keghi nọ iran wẹẹ, “Gha ọ yan eni kevbe ama ugbaro na yi?”

21Iran wanniẹn tama rẹn wẹẹ, “Ọ ghe Nọgbaisi nọ” Jesu wanniẹn tama iran wẹẹ, “A deghẹ erriọ nọ, wa rhie ne ọre ọghe Nọgbaisi ne ẹn ne uwa vbe rhie ne ọ re ọghe Osanobua ne Osanobua.”

22Ugbẹn vbe iran họn ẹmwẹ na, ọ keghi wa yan iran unu an, iran keghi hẹko sọ rae, iran na gha rrie.

23Ẹdẹrriọ zẹẹ ọre avbe Sadusi eso vbe bu Jesu rre, (Iran na ọre ọ tae ighe a i rhiọrre vbe idin.)

24Iran nọ rẹn wẹẹ, “Ọmamwaemwi, Mosis ma ima ẹre wẹẹ, ‘Deghẹ ọ ma he kẹ ọmwa ya biẹ ọ ke wu, ne ọtẹn ọnrẹn si amwẹ ọnrẹn ẹgbẹ, ne ọ miẹn ehe na biẹ ne ọmwa ne ọ wu nii.’

25Vbe ẹghẹ ọkpa, etẹn ikpia ihinrọn kegha rrọọ. Ne ọdiọn ne ọ rrọọ keghi rhie okhuo, ọ keghi wu vbe ọ ma he kẹ ọre biẹ, ọtẹn ọnrẹn keghi si amwẹ ọnrẹn ẹgbẹ.

26Erriọ ọre ẹmwẹ ne ogieva ni vbe de, kevbe ne ogieha rhinrin ya sẹ egbe ne ogihinrọn.

27Vbe okiekie ehia, nene okhuo tobọ ẹre kevbe wu.

28Ẹn hẹn, ọ gha ghi sẹ ẹdẹ arhiọkpaegbe, de amwẹ ọmwa ne irẹn ghaa khin! Iran hia ọre ọ wa rọnmwẹ ọẹn gba obọ.”

29Jesu keghi tama iran wẹẹ, “Wa wa bae ku rhunmwuda ighe wa ma rẹn otọe Ebe nii, ra ẹtin Osanobua.

30Rhunmwuda a gha huẹn emwa kpao vbe orinmwi nẹ te iran ra gha ye vbe avbe odibo Osanobua ni rre ẹrinmwi, okpia i ghi rhie okhuo, okhuo i ghi vbe rọnmwẹ ọdọ.

31Vbe ẹmwẹ orinmwi ne a huẹn kpaegbe na, wa ma he tie ẹmwẹ ne Osanobua tama uwa ra? Vbe ọ khare wẹẹ,

32‘Mẹ ọrọre Osanobua Ebraham, Osanobua Aizik kevbe Osanobua Jekọb!’ Ọ ni rhie maa wẹẹ Osanobua ọghe iran ni ma he wu nọ, ẹ i re ọghe ni wulo.”

33Emwa ni gbe ẹbu ye vba ghi họn ẹmwẹ na, ẹmwẹ iruẹemwi ẹnrẹn keghi yan iran unu uan.

34Avbe Farisi ghi họn ighe avbe Sadusi ma ghi sẹtin san ibo ne Jesu, iran kegha rrie uma.

35Ọkpa vbe uwu iran ne ọ vbe re ne ọ ma emwa Uhi keghi fi aranmwẹ ye ọre irho, ọ wẹẹ,

36“Ọmaemwaemwi, de ne ọre iyi nọ ghi wa kpọlọ sẹẹ vbe usun avbe Uhi hia?”

37Jesu wanniẹn wẹẹ, “ ‘Ye ekhọe ruẹ hia, orhiọn ruẹn hia, otọe ẹko ruẹ hia, kevbe ẹtin ruẹn hia ho ẹmwẹ Nọyan ruẹn Osanobua ruẹ.’

38Ọnọna ọrọre uhi kpataki ne ọ kpọlọ sẹẹ.

39Ne ogieva ne ọ ghi vbe kpọlọ sẹẹ vbe ye vbe ọre: ‘Gha ho ẹmwẹ ogieva ruẹ zẹ vbe egbe ruẹ.’

40Uhi eva na ọrọre ẹzi Uhi e Mosis kevbe ẹmwẹ avbe akhasẹ.”

41Avbe Farisi ghi vbe si egbe koko, Jesu nọ iran wẹẹ,

42“Vbe uwa ro ẹmwẹ e Mẹzaia hẹ? De uniẹn ọmwa ne ọ khin?” Iran wanniẹn tama rẹn wẹẹ, “Uniẹn Devid nọ.”

43Jesu keghi vbe nọ iran wẹẹ, “Vbọzẹ ne Orhiọn ghi na rhie ẹre ye Devid unu ne ọ tie ẹre ‘Nọyaẹnmwa?’ Rhunmwuda Devid khare wẹẹ,

44“ ‘Nọyaẹnmwa tama Nọyaẹnmwa wẹẹ: Tota ye obọ erha ọmwa mwẹ vbe emwa na, rhinrin mẹ te do viọ eghian ruẹn ye uwẹ atataowẹ.’

45Deghẹ Devid tie ẹre ‘Nọyaẹnmwẹ,’ vbe nene Mẹzaia ghi na vbe re uniẹn ọnrẹn hẹẹ?”

46A ma miẹn ne ọ sẹtin wanniẹn Jesu ẹmwẹ ọkpa kẹkan, ke ẹdẹ ne ẹdẹrriọ kpao, a ma ghi miẹn ọmwa ne ohan ghi gie ẹe nọ Jesu ọta rhọkpa.

← Chapter 21 Jump to: Chapter 23 →