Micah 6

Edo ((E Baibol Ẹdo) Version 1996)

← Chapter 5 Jump to: Chapter 7 →

1Wa danmwehọ ẹzọ ne Nọyaẹnmwa gu ivbi Izrẹl gui. Kpaegbe, Nọyaẹnmwa, gui ẹzọ ruẹ ne a họn, gie avbe oke nekhua kevbe ne giẹrẹ họn vbene u kha hẹ.

2Wa ne avbe oke nekhua, wa ne avbe ẹyotọ etẹbitẹ agbọn na, wa danmwehọ ẹzọ ne Nọyaẹnmwa gui! E Nọyaẹnmwa mwẹ ẹzọ ne ọ gu emwa rẹn gui. Ọ ra ba Izrẹl ifi ẹzọ.

3E Nọyaẹnmwa khare wẹẹ, “Wa ne emwa mwẹ, de emwi ne I ru uwa re. Vbe I ya khian uwa ihẹ hẹ yi? Wa zẹ mwẹ wanniẹn mwẹ.

4I viọ uwa ke Igipt ladian, I fannọ uwa hin ọviẹn rre. I gie Mosis, Errọn kevbe Miriam, ne iran su uwa gha khian.

5Wa ne emwa mwẹ, wa yerre emwi ne Balak ne Ọba e Moab te mwamwa ne ọ ru uwa re, kevbe ewanniẹn ne Balam ne ovbi e Beọ rhie ne ẹẹn. Wa yerre, avbe emwi ni sunu vbe odẹ ke agọ Akasia ya sẹ Gilgal. Wa ye avbe emwi na rre, wa gha vbe rẹn emwi ne I ru ne I ya miẹn uwa fan.”

6De emwi ne imẹ gha rhie gie Nọyaẹnmwa ne Osanobua ẹrinmwi, vbe I a ra do mudia vbe odaro ẹre? Ne I mu ivbi ẹkhuia ẹmila ni maa sẹ rre ra ne a ya zọ ese ne a giẹn uan ne ẹẹn?

7Ọ gha yẹ e Nọyaẹnmwa ra, adeghẹ I viọ ohuan arriaisẹn inu ne o khin gie ẹe ra ẹzẹ ne ẹ i ka ọghe ofigbọn oliv? Te I gha rhie ovbi mwẹ ne ọdiọn ya ha oko ne ẹẹn ra ne I ya ha osa orukhọ mwẹ?

8Ẹn o, e Nọyaẹnmwa ta ma ima nẹ emwi ne ọ maa. Emwi ne ọ ho vbe obọ mwa ọre ena khin: ne a gha ru emwi ẹmwata, ne a gha mwẹ itohan ne ẹ i rueghe; kevbe ne ima gha ye a mu egbe rriotọ lele Osanobua mwa khian.

9Emwi ẹwaẹn nọ ne a gha mu ohan e Nọyaẹnmwa. Ọ datie okpẹvbo ni wẹẹ, “Wa danmwehọ, wa ni si egbe koko vbe okpẹvbo ni!

10Ẹfe ne a la odẹ dan miẹn rre uwu owa emwa dan. Iran ya omwa ne ọ ta ohoghe mwa emwi, emwi ne ọ wa sọnnọ mwẹ.

11Vbe imẹ ghi ra sẹtin yabọ emwa ni ya esike ne ọ ta ohoghe kevbe omwa ohoghe mwa emwi hẹ?

12Iran ni fe vbe emwa ruẹn ya avbe ivbiogue ru enegbe iran, ọhọn ohoghe wa hia fẹẹrẹ wa khin.

13Rhunmwuda ọnii, I suẹn a rẹnkhẹn uan kevbe ọfuan uwa nẹ, rhunmwuda orukhọ uwa.

14Wa gha rri evbare sokpan ẹko i ra vuọn uwa, vbe ẹmwata, ohanmwẹ ghi ye gha gbe uwa. Wa gha viọ emwi gha rrie, sokpan wa i ra gua dọlọ ẹe yi. Avbe emwi ne uwa gua ra dọlọ yi, I gha ye okuo fuẹn ehia a.

15“Wa gha kọ emwi, sokpan, wa i ra rhọ, wa gha minọ ofigbọn oliv, sokpan, wa i ra lo iran, wa gha ru ayọn, sokpan, wa i ra da ẹe.

16Emwi na hia gha sunu rhunmwuda emwi dan ne Ọba Ehab ne ovbi Ọmri gu ẹe, ọ re uwa vbe guẹ. Emwi ne iran mu gbọọ ọ re uwa lele, rhunmwuda ọnii, I gha fuẹn uwa a, emwa hia ghi gha zan uwa. Emwa hia ghi gha sọnnọ uwa vbe ehe hia.”

← Chapter 5 Jump to: Chapter 7 →