Nehemiah 7

Edo ((E Baibol Ẹdo) Version 1996)

← Chapter 6 Jump to: Chapter 8 →

1Vbe ẹghẹ ne a ghi kha na nian, a gbe ekẹn ọlẹga nii fo nẹ, a vbe yi ẹkhu lele ehia nẹ, a vbe ghae iwinna iran ne iran nẹ ighẹ iran ni khẹ Ọgua Osa, avbe ọsian nihuanrẹn, kevbe avbe Livai nekpa.

2I keghi viọ arhin eva yọ ne iran gha khaemwisẹ yan Jerusalẹm, iran na kegha re ọtẹn mwẹ ne okpia ighẹ Hanani kevbe Hananaia ne ọkaokuo ne ọ gbearoghe odin ikhẹgbe. E Hananaia kegha re ọmwa ne ọ gie a muẹtinyan kevbe ne ọ vbe mu ohan Osanobua ne a i vbe miẹn egbọre ọvbehe.

3I keghi tama iran wẹ ẹdẹ ma wan nẹ fẹẹrẹ, ne iran ghẹ gha kie urho e Jerusalẹm vbe owiẹ, kevbe wẹ, avbe iran ni khẹ odẹ te kpao vbe ota, a ghi khui ẹre, a ghi viọ avbe ogba ẹre kọ ẹe. I keghi vbe tama iran wẹ uwu emwa ni rre Jerusalẹm ọ re iran gha na zẹlẹ emwa ni khẹ odẹ, a ghi wa vbe rhie ehe ne dọmwadẹ ọghọe gha khẹ ne ẹẹn, kevbe nekpa, ne iran ya gha gbe ọrrẹrrẹ lẹga owa iran.

4Ẹvbo ne ọ kpọlọ ọ re Jerusalẹm khin, sokpan, emwa ni rrọ ma gha bun, a ma he vbe bọlọ owa ni bun yọ.

5Osanobua keghi rhie yọ mwẹ ekhọe wẹ ne I si avbe emwa nii koko, kevbe avbe ọkaolotu kevbe iran ni rre ukpo vbe uwu iran, ne I vbe ghe ebe uniẹn iran. I keghi gualọ ebe iran ni ka gha ke iwe rre miẹn, emwi ne I miẹn vbọ ọ re ọna khin:

6Nibun vbe uwu iran ni ye iwe ni ghi kpao vbe otọe Babilọn rre, iran keghi dọlegbe gha die ẹvbo edọmwadẹ ọghọe vbe Jerusalẹm kevbe Juda. Ke ẹghẹ ne Ọba Nebukiadneza ya viọ iran oghunmwu kpao gha dee, otọe Babilọn ọ re ẹgbẹe iran na gha rre iwe.

7Avbe ọkaolotu iran kegha re Zerubabẹl, Jọsua, e Nehimaia Azaraia, e Raamaia, e Nahamani, e Modekai, e Bilsian, e Mizpẹrẹt, e Bigvai, e Nehum kevbe Baana.

← Chapter 6 Jump to: Chapter 8 →