Zephaniah 3

Edo ((E Baibol Ẹdo) Version 1996)

← Chapter 2 Jump to:

1Ọghe Jerusalẹm fo, ọghe ọe fo ighe ẹvbo ne ọ sakan an, ne ọ vbe sọtẹ nii, ne ọ vbe wọ emwa rẹn tobọ ẹre uhunmwu.

2Ọ ma danmwehọ e Nọyaẹnmwa ra ne ọ vbe rhan obọ miẹn emwi a rẹn enegbe ne ọ ma ẹre re. Ọ ma mu ẹtin ẹnrẹn yan e Nọyaẹnmwa ra ne ọ nọ ẹre iyobọ.

3Avbe ekhaẹmwẹ ọnrẹn yevbe oduma ni tulo wauwauwau. Iran ni buohiẹn ni rrọ yevbe akpakomiza ne ohanmwẹ gbe, ne obọ da sẹrriọ wẹ ẹ i ghi sẹtin sẹ ugboloko ọkpa rae khẹ owiẹ nọkpa.

4Avbe akhasẹ nii rrọ ma rẹn enegbe, uma dan iran si, avbe ohẹn ghi gha ru awua avbe emwi nihuanrẹn, iran gha khiẹn uhi Osanobua ne ọ miẹn ehe na gua emwi ne iran ho ro.

5Sokpan, e Nọyaẹnmwa ye rre ore ẹvbo, emwi ne ọ gbae ọ re ọ ru, ẹ i vbe zẹdẹ ru emwi ne ọ ma gba. Rẹn i ba ẹe ku vbe owiowiẹ ne ọ ya ru enọkhẹke ne emwa rẹn. Sevba, emwa ne ẹ i re emwata ni rre evba ghi ye gha ru emwi ne ọ ma gba khian vbene ekhue i na mu iran.

6E Nọyaẹnmwa khare wẹẹ, “I ka gbe iyaẹvbo eso ogbefo yi. I dunmwu avbe okpẹvbo iran an, I keghi sẹ ekẹn iran kevbe owa ọkhẹ iran rae ye itowa. Emwa lẹ hin okpẹvbo iran rre, emwa i ghi rre ore iran, orhiọnkpa ma ke ẹe vbọ.

7I te gha ro wẹ emwa mwẹ gha rhunmwuda ọnii da mẹ, ne iran rhan obọ miẹn emwi enọrẹn enegbe ne ima iran re, wẹ iran i ra mianmian emwi ne I ma iran re ẹdẹ. Sokpan, wanwanna, iran keghi wa suẹn gha ru emwi dan ne iran ka ru de yi.”

8E Nọyaẹnmwa khare wẹẹ, “Wa zin egbe, wa ziengbe khẹ ẹdẹ ne I gha guakpao ba avbe uhunmwu ẹvbo ifi ẹzọ. I ta ẹe nẹ wẹ, I gha si avbe uhunmwu ẹvbo kevbe avbe arriọba koko ne iran miẹn ehe na họn obọ ohu mwẹ vbe egbe. Erhẹn ohu mwẹ nọkhua, gha giẹn agbọn na hia.

9“Ẹghẹ nii, I gha fi avbe emwa ni rre uhunmwu ẹvbo werriẹ, iran ghi do gha na erhunmwu ghe imẹ ọkpa, vbene iran i ghi na na ghe ẹbọ ọvbehe. Iran hia gha vbe gha họn ẹmwẹ mẹ.

10Emwa mwẹ gha ke Sudan ne gban an, ehe ne a zagha iran kui, gha viọ emwi ọhẹ gun mwẹ.

11Ọ gha sẹ ẹghẹ nii, ekhue i ghi ra ye gha mu uwa ne emwa mwẹ wẹ wa sọtẹ mwẹ. I gha viọ iran hia ni hio kevbe ni tọn egbe mu hin rre, wa i ghi ra dọlegbe sọtẹ ghe mwẹ ọvbehe vbe oke mwẹ nọhuanrẹn.

12I gha sẹ avbe ọmẹhẹ ni mu egberriotọ rae ye evba, iran na ọ re ọ gha do gha nọ iyobọ vbe obọ mwẹ.

13Ivbi Izrẹl ni miẹn uhunmwu vbọ i fu ọmwa, iran i ra tọlọ ọmwa, iran i ra ta ohoghe ra ne iran mu ọmwa rẹrẹ. Agbọn gha ma iran, ẹkun gha vbe sẹ iran otọ vbene iran i na mu ohan ọmwa ikọmwa.”

14Wa so ihuan, wa we ne oghọghọ, wa ne ivbi Izrẹl! Ye ekhọe ruẹ hia gha ghọghọ, e Jerusalẹm!

15E Nọyaẹnmwa dobọ oya ne a rriọ ẹre yii nẹ, Ọ viọ avbe eghian ruẹn hia kpaa. E Nọyaẹnmwa ne ọba Izrẹl guẹ rrọọ, emwi ne u gha gu gha mu ohan i ghi rrọ nian.

16Ẹghẹ dee ne iran gha na tama e Jerusalẹm wẹẹ, “Ghẹ mu ohan, okpẹvbo e Zaiọn! Ghẹ gie obọ ruẹ luẹluẹe ua!

17E Nọyaẹnmwa ne Osanobua mwẹ rrọ yaba ruẹ, ẹtin ẹnrẹn ọ re ọ rhie akhọnmiotọ nuẹn. Ẹko ruẹ gha rhiẹnrhiẹn e Nọyaẹnmwa kevbe uwu aho ẹmwẹ ọmwa ẹnrẹn, ọ gha rhie arrọ agbọn ne uẹn. Ọ gha so ihuan, ọyẹnmwẹ ruẹn ghi vbe gha sẹ ọe.

18Zẹ vbene ọyẹnmwẹ sẹ emwa vbe ẹghẹ emwiukpo.” E Nọyaẹnmwa khare wẹẹ, “I dobọ ẹmwẹ ọghe uwa fo, ne I te ya ye ohan mu uwa, yii nẹ I vbe ban uwa ukpọn efaa mu fua.

19Ẹghẹ dee! I gha rri iran ni wọ uwa uhunmwu oya; I gha fannọ iran ne arọe ye otọ I ghi viọ iran ni rre iwe gha die owa, I gha ya ekhue iran khian uyi agbọn na hia ghi gha tian iran.

20Ẹghẹ dee! I gha viọ emwa ruẹn ni zagha kua rri owa, I gha ya uwa hin usi la otọ agbọn hia. I ghi gie agbọn dọlegbe maa uwa.” Erriọ e Nọyaẹnmwa khare.

← Chapter 2 Jump to: