1 Thessalonians 1

Tibetian CTB (གསུང་རབ།)

Jump to: Chapter 2 →

1པའུ་ལུ་དང་སིལ་ཝ་ནུ། ཐི་མོ་ཐེ་གསུམ་གྱིས་ཐེ་ས་ལོ་ནི་ཀེ་གྲོང་ཁྱེར་དུ་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀའི་ཆོས་ཚོགས་ལ་འཕྲིན་ཡིག་འདི་ཕུལ་ལོ། ཐུགས་རྗེ་དང་ཞི་བདེ་ཁྱེད་རྣམས་ལ་ལྡན་པར་གྱུར་ཅིག

2ང་ཚོས་སྨོན་ལམ་ག་དུས་འདེབས་ཀྱང་ཁྱེད་ཚོ་ཚང་མའི་ཕྱིར་དཀོན་མཆོག་ལ་ཐུགས་རྗེ་ཆེ་རྟག་ཏུ་ཞུ།

3ང་ཚོའི་ཡབ་དཀོན་མཆོག་གི་དྲུང་དུ་ཁྱེད་ཚོའི་དད་པ་ལས་སྐྱེས་པའི་ལས་ཀ་དང༌། བྱམས་སེམས་ལས་སྐྱེས་པའི་ངལ་རྩོལ་དང༌། རེ་བ་ལས་སྐྱེས་པའི་བཟོད་སྒོམ་བཅས་ང་ཚོའི་གཙོ་བོ་ཡེ་ཤུ་མཱ་ཤི་ཀའི་སྒོ་ནས་རྒྱུན་མི་ཆད་པར་དྲན་ནོ།

4དཀོན་མཆོག་གི་གཅེས་པའི་སྤུན་ཟླ་རྣམས། ཁོང་གིས་ཁྱེད་ཚོ་བསྐོས་པ་ཡིན་པར་ང་ཚོས་ཤེས།

5གང་ཡིན་ཞེ་ན། ང་ཚོའི་འཕྲིན་བཟང་ནི་ཁྱེད་ཀྱི་ཁྲོད་དུ་གཏམ་བརྗོད་འབའ་ཞིག་མ་ཡིན་ཏེ། ནུས་མཐུ་དང༌། དམ་པའི་ཐུགས་ཉིད། ཡིད་ཆེས་ངེས་པ་རྙེད་པ་བཅས་ཀྱིས་སླེབས་པས་སོ། ཁྱེད་ལ་ཕན་པའི་ཕྱིར་ང་ཚོའི་སྤྱོད་ལམ་ཇི་ལྟར་ཡིན་ཁྱེད་ཀྱིས་ཤེས།

6ཁྱེད་ཚོ་ནི་ངེད་རྣམས་དང་གཙོ་བོ་ཡེ་ཤུར་དཔེ་བལྟས་ཏེ། སྡུག་བསྔལ་ཆེན་པོ་མྱོང་ཡང་དམ་པའི་ཐུགས་ཉིད་ལས་བྱུང་བའི་དགའ་སྤྲོའི་ངང་ནས་འཕྲིན་བཟང་དང་ལེན་བྱས་པས།

7ཁྱེད་ཚོས་མ་ཀེ་དོན་ཡཱ་དང་ཨ་ཀ་ཡཱ་ཡུལ་གཉིས་ཀྱི་དད་པ་བྱེད་མཁན་ཚང་མར་མིག་དཔེ་གནང༌།

8གཙོ་བོའི་བཀའ་ཁྱེད་རྣམས་ཀྱི་ཁྲོད་ནས་མ་ཀེ་དོན་ཡཱ་དང་ཨ་ཀ་ཡཱ་ཡུལ་ལ་དར་བ་མ་ཟད་ཁྱེད་ཚོས་དཀོན་མཆོག་ལ་དད་པ་བྱེད་པའི་ལོ་རྒྱུས་ཕྱོགས་ཀུན་ཏུ་གྲགས་པས། ང་ཚོས་དེའི་སྐོར་ལ་ཅིའང་ཟེར་མི་དགོས།

9ཡུལ་མི་ཉིད་ཀྱིས་ང་ཚོའི་འཚམས་འདྲི་བྱས་པའི་སྐོར་གཏམ་སྨྲས་ཏེ། ཁྱེད་ཚོས་ཇི་ལྟར་བདེན་ཞིང་ངོ་མཚར་བའི་མཛད་པ་སྒྲུབ་མཁན་དཀོན་མཆོག་ལ་ཞབས་ཕྱི་བྱེད་པའི་ཕྱིར་ལྷ་སྐུ་སྤངས་ནས་དཀོན་མཆོག་ལ་བསྙེན་བཀུར་ཞུས་པ་དང༌།

10དཀོན་མཆོག་གི་ཞིང་ཁམས་ནས་དཀོན་མཆོག་གི་སྲས་ཕེབས་རྒྱུར་རེ་སྒུག་བྱེད་ཅིང༌། སྲས་དེ་ནི་དཀོན་མཆོག་གིས་འཆི་བ་ལས་སླར་གསོན་དུ་མཛད་པའི་གཙོ་བོ་ཡེ་ཤུ་དེ་ཡིན། ཁོང་གིས་མི་རྣམས་སྡིག་ཉེས་བྱས་པའི་རྐྱེན་གྱིས་དཀོན་མཆོག་གི་མ་འོངས་པའི་ཐུགས་ཁྲོ་ལས་ང་ཚོ་སྐྱོབ་པར་མཛད་དོ། །

Jump to: Chapter 2 →