1 Timothy 2

Tibetian CTB (གསུང་རབ།)

← Chapter 1 Jump to: Chapter 3 →

1ངས་ཐོག་མར་མི་ཐམས་ཅད་དང༌། རྒྱལ་པོ། དཔོན་པོ་ཐམས་ཅད་ཀྱི་དོན་དུ་གསོལ་བ་དང༌། སྨོན་ལམ། ཞུ་བ། བཀའ་དྲིན་ཆེ་བཅས་ཞུ་རྒྱུར་སྐུལ། དེ་ནི་ཆོས་སེམས་དང་ལྡན་པར་དཀོན་མཆོག་གི་ཐུགས་མཉེས་པར་བྱེད་དེ་ང་ཚོ་ཞི་འཇམ་གྱི་ངང་ནས་མི་ཚེ་སྐྱེལ་བའི་ཆེད་དུ་ཡིན།

3ངེད་རྣམས་ཀྱི་སྐྱབས་མགོན་དཀོན་མཆོག་གི་སྤྱན་སྔར་དེ་ནི་ལེགས་ཤིང་འོས་པ་ཡིན།

4ཁོང་གིས་མི་ཐམས་ཅད་ཐར་བར་འགྱུར་ཏེ་བདེན་པ་རྟོགས་པར་དགོངས།

5དཀོན་མཆོག་གཅིག་ཡིན་ལ། དཀོན་མཆོག་དང་མི་རྣམས་ཀྱི་བར་ལ་བར་འདུམ་གཏོང་མཁན་གཅིག་ཡོད། མི་དེ་ནི་མཱ་ཤི་ཀ་ཡེ་ཤུ་ཡིན་ནོ།

6ཁོང་གིས་མི་ཐམས་ཅད་ཀྱི་དོན་ལ་རང་ཉིད་བླུ་རིན་གནང་བའི་སྒོ་ནས་དུས་ལ་འབབ་སྐབས་དཀོན་མཆོག་གིས་རང་གི་དགོངས་པ་མངོན་པར་མཛད།

7ངས་རྫུན་གཏམ་མི་ཟེར་བར་བདེན་པ་ཟེར། དོན་དེའི་ཕྱིར་ང་ཆོས་སྒྲོག་མཁན་དང༌། སྐུ་ཚབ་དང༌། ཡ་ཧུ་དཱ་པ་མིན་པ་རྣམས་ལ་དད་པ་དང་བདེན་པ་སྟོན་མཁན་དུ་བསྐོས།

8གནས་གང་དུ་འཛོམས་ཀྱང་སྐྱེས་པ་རྣམས་ཀྱིས་ཁྲོ་བའམ་རྩོད་གླེང་མེད་པར། ལག་པ་གཙང་མ་ཡར་བཏེགས་ཏེ་སྨོན་ལམ་འདེབས་པར་ང་འདོད་དོ།

9དེ་དང་འདྲ་བར་བུད་མེད་རྣམས་ཀྱིས་འོས་པའི་གོས་གྱོན་ཏེ། ཁྲེལ་དང་བག་ཡོད་ཀྱིས་ལུས་རྒྱན་དགོས། ཚུལ་དང་མི་མཐུན་པའི་མགོའི་སྐྲའམ། གསེར་རམ། མུ་ཏིག་གམ། རིན་ཆེ་བའི་གོས་ཀྱིས་མ་ཡིན་པར།

10བྱ་བ་བཟང་པོས་རྒྱན་དགོས། དེ་ནི་དཀོན་མཆོག་ལ་གུས་བཀུར་བྱེད་པ་ཁས་ལེན་མཁན་བུད་མེད་ལ་འོས་སོ།

11བུད་མེད་རྣམས་ཀྱིས་ཁ་ཁུ་སིམ་པོར་བསྡད་ནས་ཁ་ལ་རབ་ཏུ་ཉན་ཏེ་སློབ་དགོས།

12བུད་མེད་རྣམས་ཀྱིས་ཆོས་སྟོན་པའམ། སྐྱེས་པ་ལ་དབང་སྒྱུར་བ་ངས་ཆོག་མཆན་མི་འགོད་དེ། ཁོ་མོ་ཁ་ཁུ་སིམ་པོར་སྡོད་དགོས།

13གང་ཡིན་ཞེ་ན། དང་པོར་ཨ་དམ་དང༌། དེའི་རྗེས་ལ་ཧ་ཝ་བཟོས་པར་མཛད་པས་སོ།

14ཡང་ཨ་དམ་མིན་ཏེ་བུད་མེད་སླུ་བར་གྱུར་ནས་དཀོན་མཆོག་གི་བཀའ་དང་འགལ་མཁན་དུ་གྱུར།

15འོན་ཀྱང་བག་དང་ལྡན་ཏེ་དད་སེམས་དང༌། བྱམས་སེམས། དམ་པ་བཅས་ལ་གནས་ན། ཕྲུ་གུ་སྐྱེད་པའི་སྒོ་ནས་བུད་མེད་ཐར་བར་འགྱུར་རོ། །

← Chapter 1 Jump to: Chapter 3 →