2 Corinthians 6

Tibetian CTB (གསུང་རབ།)

← Chapter 5 Jump to: Chapter 7 →

1ང་ཚོ་དཀོན་མཆོག་དང་ལྷན་དུ་ལས་ཀ་བྱེད་པས། ང་ཚོས་ཁྱེད་རྣམས་ལ་དཀོན་མཆོག་གི་ཐུགས་རྗེ་དོན་མེད་དུ་མ་ལེན་པར་སྐུལ།

2ཁོང་གིས་གསུངས་པ་ལྟར། དུས་ལ་བབས་པས་ང་ཡིས་ཁྱེད་ལ་ཉན། ། ཐར་པའི་ཉིན་མོར་ཁྱེད་ལ་སྐྱོབ་རོགས་བྱས། ། ཅེས་འཁོད་ཡོད། ལྟོས་ཤིག ད་ལྟ་དུས་ལ་བབས་པ་ཡིན། ད་ལྟ་ཐར་པའི་ཉིན་མོ་ཡིན་ནོ།

3ཞབས་ཏོག་འདི་ལ་སྐྱོན་མི་འདོགས་པའི་ཕྱིར་ང་ཚོས་གཞན་ལ་སུ་ཞིག་གི་ལམ་ལ་གེགས་པར་མི་གཏོང༌།

4རྣམ་པ་ཀུན་ནས་ང་ཚོ་དཀོན་མཆོག་གི་ཞབས་ཕྱི་བཅོས་མིན་ཡིན་པར་སྟོན་ཏེ། བཟོད་པ་ཆེན་པོ་དང༌། སྡུག་བསྔལ་དང༌། དཀའ་ངལ་དང༌། རྐྱེན་ངན་དང༌།

5ཉེས་རྡུང་ཕོག་པ། བརྩོན་འཇུག་དང༌། ཟིང་ཆ་དང༌། ངལ་རྩོལ་དང༌། གཉིད་མི་ཁུག་པ་དང༌། ལྟོགས་པ་དང༌།

6དག་པའི་སྤྱོད་ལམ་དང༌། ཤེས་རབ་དང༌། ངང་རྒྱུད་རིང་པོ་དང༌། དྲིན་དང༌། དམ་པའི་ཐུགས་ཉིད་དང༌། བཅོས་མིན་གྱི་བྱམས་སེམས་དང༌།

7བདེན་པའི་གཏམ་དང༌། དཀོན་མཆོག་གི་ནུས་མཐུ་དང༌། ལག་པ་གཡས་གཡོན་ལ་དྲང་བདེན་གྱི་མཚོན་ཆ་ལྡན་པ་དང༌།

8སྟོད་རུང་སྨད་རུང༌། བཟང་ངན་ཅི་བརྗོད་རུང༌། གཡོ་རྒྱུ་ཅན་ལྟར་རྩི་ནའང་བདེན་པ་ཡིན།

9ང་ཚོ་ནི་མིང་གྲགས་མེད་པ་ལྟར་རྩི་ཡང་གྲགས་ཅན་ཡིན། འཆི་བ་ལ་ཐུག་ཀྱང་གསོན་པོ་ཡིན། ཉེས་ཆད་བཅད་ཀྱང་མ་བསད།

10སེམས་སྐྱོ་ནའང་རྟག་ཏུ་དགའ་བར་བྱེད། དབུལ་པོར་རྩི་ནའང་མི་མང་པོ་ལ་ནོར་སྦྱིན། ཅི་ཡང་མེད་པར་རྩི་ཡང་ཐམས་ཅད་ཡོད་མཁན་ཡིན།

11ཀྱེ་ཀོ་རིན་ཐུ་པ་རྣམས། ཁྱེད་ཚོར་ཁ་གསང་པོར་བརྗོད་ཅིང༌། ང་ཚོའི་སེམས་ཀྱི་སྒོ་ཁྱེད་ཚོར་འབྱེ།

12ང་ཚོས་ཁྱེད་ཚོར་གཅེས་པ་མཚམས་མ་བཞག་ཀྱང༌། ཁྱེད་ཚོས་ང་ཚོར་གཅེས་པ་བཞག་པར་གྱུར།

13དེའི་ལན་དུ་ངའི་ཕྲུ་གུར་སྨྲ་བ་ལྟར་ཁྱེད་ཚོའི་སེམས་ཀྱི་སྒོ་འབྱེད་ཅིག་ཅེས་བརྗོད།

14དད་མེད་པ་རྣམས་དང་འགྲོགས་ནས་གཉའ་ཤིང་མ་ཁུར་ཞིག གང་ལགས་ཤེ་ན། དྲང་བདེན་དང་ཁྲིམས་འགལ་ལ་འབྲེལ་བ་ཅི་ཡོད། འོད་དང་མུན་པ་ལ་འབྲེལ་བ་ཅི་ཡོད།

15མཱ་ཤི་ཀ་དང་བདུད་པེ་ལི་ཡཱར་ལ་མཐུན་པ་ཅི་ཡོད། དད་པ་ཅན་དང་དད་མེད་པ་ཞིག་ལ་འབྲེལ་བ་ཅི་ཡོད།

16ཡང་དཀོན་མཆོག་གི་མཆོད་ཁང་དང་སྐུ་འདྲ་རྣམས་ལ་མཐུན་པ་ཅི་ཡོད། ང་ཚོ་ནི་གཏན་དུ་གནས་པའི་དཀོན་མཆོག་གི་མཆོད་ཁང་ཡིན་ཏེ། དཀོན་མཆོག་གིས་གསུངས་པ་བཞིན། ང་ཉིད་ཁོ་ཚོའི་དཀྱིལ་དུ་གནས། ། ཁོ་ཚོའི་ཁྲོད་དུ་རྒྱུ་བར་བྱེད། ། ང་ཉིད་ཁོ་ཚོའི་དཀོན་མཆོག་དང༌། ། དེ་རྣམས་ང་ཡི་འབངས་སུ་འགྱུར། ། ཞེས་འཁོད།

17དེའི་ཕྱིར་གཙོ་བོས་འདི་སྐད་གསུངས། ཁོ་ཚོ་བྲལ་ནས་ཐོན་པ་དང༌། ། མི་གཙང་བ་དང་མ་རེག་ཅིག ། དེས་ན་ཁྱེད་རྣམས་དང་དུ་ལེན། །

18ང་ནི་ཁྱེད་ཀྱི་ཡབ་འགྱུར་ཞིང༌། ། ཁྱེད་ཚོ་སྲས་དང་སྲས་མོར་འགྱུར། ། ཀུན་དབང་གཙོ་བོས་འདི་སྐད་གསུངས། ། ཞེས་འཁོད་ཡོད་དོ། །

← Chapter 5 Jump to: Chapter 7 →