Deuteronomy 2

Tibetian NTB (བོད་འགྱུར་གསར་མ།)

← Chapter 1 Jump to: Chapter 3 →

1དེ་ནས་དཀོན་མཆོག་ཡ་ཝཱེས་ང་ལ་བསྒོས་པ་ནང་བཞིན། རང་ཅག་ཁ་ཕྱིར་འཁོར་ཏེ་རྒྱ་མཚོ་དམར་པོའི་ལམ་དེད་ནས་དབེན་སྟོང་དུ་ཕྱིན་པ་དང་། རི་བོ་སེ་ཨིར་ནས་ཉིན་མང་པོར་འཁོར་བ་ཡིན།

2དེ་ནས་དཀོན་མཆོག་ཡ་ཝཱེས་ང་ལ་འདི་སྐད་དུ།

3ཁྱོད་ཚོས་རི་བོ་འདིར་བསྐོར་བ་བརྒྱབ་ནས་ཉིན་མང་པོ་འགོར་བས་ད་ནི་བྱང་ཕྱོགས་སུ་ལམ་ཁ་སྒྱུར་ལ།

4ཁྱོད་ཀྱིས་མི་རྣམས་ལ་འདི་ལྟར། ཁྱོད་ཅག་གི་སྤུན་ཟླ་ཨེ་སཱབ་ཀྱི་བུ་རབས་ཚ་རྒྱུད་ནི་སེ་ཨིར་ཡུལ་དུ་གནས་ཤིང་། ད་ལྟ་ཁྱོད་ཅག་ཁོ་རྣམས་ཀྱི་ས་མཚམས་བརྒྱུད་ནས་འགྲོ་དགོས། ཁོ་རྣམས་ཁྱོད་ཅག་ལ་འཇིགས་སྲིད་པས་དོགས་ཟོན་ནན་མོ་བྱོས།

5ཁོ་རྣམས་ལ་ཁོང་ཁྲོ་མ་སློང་ཞིག བདག་གིས་སེ་ཨིར་རི་རྒྱུད་ནི་ཨེ་སཱབ་ལ་ས་སྐལ་དུ་སྤྲད་ཡོད་པས། དེ་དག་གི་ཡུལ་ལས་ས་རྐང་མཐིལ་ཙམ་ཡང་བདག་གིས་ཁྱོད་རྣམས་ལ་སྤྲོད་པར་མི་བྱའོ། །

6ཁྱོད་ཅག་གིས་ཁོ་རྣམས་ལ་དངུལ་སྤྲད་དེ་ཁ་ཟས་ཉོས་ནས་བཟའ་དགོས་ལ། ཆུ་ཡང་ཉོས་ནས་འཐུང་དགོས།

7ཅི་ལ་ཞེ་ན། ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ལག་གི་ལས་ཀ་ཐམས་ཅད་ལ་བྱིན་རླབས་མཛད་པ་དང་། ཁྱོད་རྣམས་དབེན་སྟོང་ཆེན་པོ་འདི་ནས་ཇི་ལྟར་སྐྱོད་པའང་ཁོང་གིས་མཁྱེན་ལ། ལོ་ངོ་བཞི་བཅུའི་རིང་དུ་ཁྱོད་ཅག་གི་དཀོན་མཆོག་ཡ་ཝཱེ་ཁྱོད་ཅག་དང་ལྷན་དུ་བཞུགས་ཤིང་། ཁྱོད་ཅག་ལ་མ་འདང་ས་ཅི་ཡང་བྱུང་མེད་ཅེས་བསྒོས་ཤིག་ཅེས་གསུངས་སོ། །

8དེ་བས་རང་ཅག་སེ་ཨིར་དུ་ཡོད་པའི་རང་ཅག་གི་སྤུན་ཟླ་ཨེ་སཱབ་ཀྱི་བུ་རབས་ཚ་རྒྱུད་རྣམས་བརྒལ་ནས་ཕར་བསྐྱོད་པ་དང་། ཨ་ར་པཱའི་ལམ་དེད་ནས་ཨེ་ལད་དང་ཨེ་ཙི་ཡོན་གེ་བེར་ལ་སླེབས་ཤིང་། དེ་ནས་མོ་ཨབ་ཀྱི་དབེན་སྟོང་ཕྱོགས་སུ་ཆས་སོ། །

9དཀོན་མཆོག་ཡ་ཝཱེས་ང་ལ། ཁྱོད་ཀྱིས་མོ་ཨབ་པ་རྣམས་དགྲ་རུ་འཛིན་མི་རུང་ལ། ཁོ་རྣམས་དང་འཐབ་འཛིང་ཡང་བྱེད་མི་རུང་། བདག་གིས་ཨར་གྱི་ཡུལ་ནི་ལོད་ཐུའི་བུ་རྒྱུད་ལ་ས་སྐལ་དུ་སྤྲད་པ་ཡིན་པས། ངས་ཁོ་ཚོའི་ཡུལ་ནས་ཁྱོད་ལ་ཅི་ཡང་མི་སྦྱིན།

10སྔོན་ཆད་ཡུལ་དེར་ཨེ་མཱ་པ་རྣམས་བསྡད་ཡོད་པ་དང་། མི་རིགས་དེ་ནི་མི་གྲངས་མང་ཞིང་གཟུགས་རིང་ལ་ཨ་ནག་པ་དང་མཚུངས་སོ། །

11དེ་དག་ནི་ཨ་ནག་མི་རིགས་ཀྱི་མི་དང་འདྲ་བར་རེ་པཱ་མི་རིགས་ཡིན་ནའང་། མོ་ཨབ་པ་རྣམས་ཀྱིས་ཁོ་རྣམས་ལ་ཨེ་མཱ་པ་ཞེས་མིང་བཏགས།

12སྔར་ཧོར་པ་རྣམས་ཀྱང་སེ་ཨིར་དུ་བསྡད་ཡོད་ནའང་། ཨེ་སཱབ་ཀྱི་བུ་རབས་ཚ་རྒྱུད་རྣམས་ཀྱིས་དེ་དག་གི་ས་སྐལ་ཕྲོགས་ཤིང་དེ་རྣམས་ཚར་བཅད་ནས་དེའི་ཤུལ་དུ་བསྡད། དེ་ནི་ཡེས་ར་ཨེལ་གྱིས་དཀོན་མཆོག་ཡ་ཝཱེས་ཁོ་ཚོར་ས་སྐལ་དུ་གནང་བའི་ཡུལ་དུ་བྱས་པ་ནང་བཞིན་ཡིན་ནོ། །

13དཀོན་མཆོག་ཡ་ཝཱེས་ད་ནི་ཡར་ལོངས་ལ་ཟེ་རེད་གྲོག་རོང་གི་ཕར་ཁ་རུ་སོང་ཞིག་ཅེས་བཀའ་བསྩལ་པས། རང་ཅག་ཟེ་རེད་གྲོག་རོང་བརྒལ་བ་ཡིན།

14རང་ཅག་ཀཱ་དེའེ་ཤཱ་པར་ནེ་ཨ་དང་བྲལ་ནས་ཟེ་རེད་གྲོག་རོང་བརྒལ་བའི་བར་དུ་ལོ་སུམ་ཅུ་སོ་བརྒྱད་འགོར་བ་དང་། ཡང་དཀོན་མཆོག་ཡ་ཝཱེས་ཁོ་རྣམས་ལ་མནའ་བཞེས་པ་ནང་བཞིན་དུས་རབས་དེའི་དམག་མི་ཐམས་ཅད་སྒར་ཁ་རུ་གཤེགས་པ་ཡིན།

15དཀོན་མཆོག་ཡ་ཝཱེའི་ཕྱག་གིས་ཁོ་རྣམས་ལ་རྒོལ་ཞིང་སྒར་ཁ་ནས་རྩ་མེད་མཛད་པ་ཡིན།

16དམག་མི་ཐམས་ཅད་མི་རྣམས་ཀྱི་ཁྲོད་ནས་གཤེགས་པའི་རྗེས་སུ།

17དཀོན་མཆོག་ཡ་ཝཱེས་ང་ལ་འདི་སྐད་དུ།

18དེ་རིང་ཁྱོད་མོ་ཨབ་ཀྱི་མངའ་ཁོངས་ཨར་ཞེས་པ་བརྒལ་ནས་འགྲོ་དགོས།

19ཁྱོད་རང་ཨམ་མོན་པའི་ཉེ་བར་སླེབས་དུས་དེ་དག་དགྲ་རུ་འཛིན་མི་རུང་ལ། ཁོ་རྣམས་ལ་ཁོང་ཁྲོ་ཡང་སློང་མི་རུང་། བདག་གིས་ཡུལ་དེ་ནི་ལོད་ཐུའི་བུ་རྒྱུད་ལ་ས་སྐལ་དུ་སྤྲད་ཡོད་པས། ཨམ་མོན་པའི་ཡུལ་ནི་ཁྱོད་ལ་ས་སྐལ་དུ་སྦྱིན་པར་མི་བྱའོ་ཞེས་གསུངས།

20ཡུལ་དེ་ཡང་རེ་པཱ་པའི་ཡུལ་དུ་བརྩིས་ཤིང་། སྔར་རེ་པཱ་མི་རིགས་ཡུལ་དེར་གནས་ལ་ཨམ་མོན་པས་ཁོ་རྣམས་ལ་ཟམ་ཟུམ་པ་ཞེས་འབོད་པ་དང་།

21མི་རིགས་དེ་ནི་ཨ་ནག་མི་རིགས་དང་འདྲ་བར་མི་གྲངས་མང་ཞིང་གཟུགས་པོ་ཆེ་ནའང་། དཀོན་མཆོག་ཡ་ཝཱེས་ཨམ་མོན་པའི་སྔུན་ནས་མི་རིགས་དེ་མེད་པར་མཛད་པས། ཨམ་མོན་པས་དེ་དག་གི་ཡུལ་བདག་གིར་བཟུང་ནས་དེ་རུ་བསྡད།

22དེ་ནི་སྔར་དཀོན་མཆོག་ཡ་ཝཱེས་སེ་ཨིར་དུ་གནས་པའི་ཨེ་སཱབ་ཀྱི་བུ་རབས་ཚ་རྒྱུད་ལ་ཇི་ལྟར་མཛད་པ་ནང་བཞིན་ཡིན་ཏེ། ཁོང་གིས་ཧོར་མི་རིགས་དེ་དག་གི་སྔུན་ནས་མེད་པར་མཛད་པས། དེ་དག་གིས་ཧོར་པའི་ཡུལ་བདག་གིར་བཟུང་ནས་དེ་རིང་ཉིན་མོའི་བར་དུ་དེར་བསྡད།

23ཡང་ཨ་ཝི་པ་རྣམས་གཱ་ཟཱའི་ཉེ་འགྲམ་གྱི་གྲོང་ཚོ་རེ་རེར་གཞིས་ཆགས་ཀྱང་། ཀབ་ཐོར་ཡུལ་ནས་ཐོན་པའི་ཀབ་ཐོར་མི་རིགས་ཀྱིས་ཨ་བིད་པ་རྣམས་མེད་པར་བཏང་སྟེ། དེ་དག་གི་ཤུལ་དུ་གཞིས་ཕབ་པའོ། །

24དཀོན་མཆོག་ཡ་ཝཱེས་ད་ཡར་ལོངས་ལ་ཨར་ནོན་ལུང་པ་བརྒྱུད་ནས་སོང་ཞིག ངས་ཨེ་མོར་པ་སི་ཧོན་ཏེ་ཧེ་སི་པོན་གྱི་རྒྱལ་པོ་དང་ཁོའི་ས་ནི་ཁྱོད་རྣམས་ཀྱི་ལག་ཏུ་གཏད་པ་ཡིན། ཁོ་དང་འཐབ་འཛིང་བྱས་ནས་ཡུལ་དེ་བདག་གིར་ཟུངས་ཤིག

25དེ་རིང་བདག་གིས་གནམ་འོག་ཀུན་ཏུ་གནས་པའི་མི་རིགས་ཐམས་ཅད་ལ་ཁྱོད་ཀྱི་གནས་ཚུལ་ཐོས་ནས་འཇིགས་ཤིང་སྐྲག་ཏུ་འཇུག་པ་དང་། ཁྱོད་ཀྱི་རྐྱེན་གྱིས་དངངས་ནས་འདར་བར་འགྱུར་ཞེས་བཀའ་བསྩལ་ཏོ། །

26དེར་ངས་ཀེ་དེ་མོད་དབེན་སྟོང་ནས་ཧེ་སི་པོན་གྱི་རྒྱལ་པོ་སི་ཧོན་གྱི་དྲུང་དུ་བང་ཆེན་བཏང་བ་དང་། ཞི་བདེའི་གཏམ་འདི་ལྟར།

27ངེད་རྣམས་ཁྱེད་ཀྱི་ཡུལ་བརྒྱུད་ནས་འགྲོ་རུ་ཆུག་དང་། ང་ཚོ་གཞུང་ལམ་གཅིག་པུ་ནས་འགྲོ་བ་ལས་གཡས་གཡོན་གང་དུའང་གཟུར་བར་མི་བྱ།

28ང་ཚོས་ཁྱེད་ཀྱི་ལག་ནས་ཁ་ཟས་དངུལ་གྱིས་ཉོས་ནས་ཟོས་ཆོག་ལ། ཆུ་ཡང་དངུལ་གྱིས་ཉོས་ནས་འཐུང་ཆོག ངེད་རྣམས་རྐང་ཐང་གིས་ཕར་འགྲོ་བར་གནོངས།

29ངེད་རྣམས་ཡོར་དན་གཙང་པོ་བརྒལ་ནས་ངེད་ཀྱི་དཀོན་མཆོག་ཡ་ཝཱེས་ངེད་ཅག་ལ་གནང་བའི་ཡུལ་དུ་འབྱོར་རེག་བར་དུ། སེ་ཨིར་དུ་གནས་པའི་ཨེ་སཱབ་ཀྱི་བུ་རྣམས་དང་། ཨར་དུ་གནས་པའི་མོ་ཨབ་པ་རྣམས་ཀྱིས་ངེད་རྣམས་ལ་བྱས་པ་ལྟར་དུ་སྒྲུབས་ཤིག་ཅེས་ཞུས་ནའང་།

30ཧེ་སི་པོན་གྱི་རྒྱལ་པོ་སི་ཧོན་གྱིས་རང་ཅག་ཁོའི་ཡུལ་བརྒྱུད་ནས་འགྲོ་རུ་མ་བཅུག ཅི་ལ་ཞེ་ན། ཁྱོད་ཅག་གི་དཀོན་མཆོག་ཡ་ཝཱེས་དེ་རིང་ནང་བཞིན་སི་ཧོན་ཁྱོད་ཚོའི་ལག་ཏུ་སྤྲོད་པའི་ཕྱིར། ཁོའི་སེམས་གྱོང་པོ་དང་མཁྲེགས་པོར་མཛད་པ་ཡིན་ནོ། །

31དཀོན་མཆོག་ཡ་ཝཱེས་ང་ལ་འདི་སྐད་དུ། ལྟོས་དང་། སི་ཧོན་དང་ཁོའི་ཡུལ་ནི་བདག་གིས་ཁྱོད་ལ་སྤྲོད་པར་བརྩམས་པས། ཁོའི་ཡུལ་བདག་གིར་འཛིན་པའི་ཕྱིར་དུ་ཁྱོད་ཀྱིས་དེ་ལེན་པར་རྩོམས་ཤིག་ཅེས་བཀའ་བསྩལ་ཏོ། །

32དེ་ནས་སི་ཧོན་ནི་རང་གི་མི་ཐམས་ཅད་དང་མཉམ་དུ་ཡོང་ནས་རང་ཅག་ལ་རྒོལ་ཞིང་། ཡ་ཧ་ཙཱ་རུ་རང་ཅག་དང་འཐབ་འཛིང་བྱས།

33རང་ཅག་གི་དཀོན་མཆོག་ཡ་ཝཱེས་ཁོ་རང་ཅག་ལ་སྤྲད་པས། རང་ཅག་གིས་ཁོ་དང་ཁོའི་བུ་རྒྱུད་དང་མི་ཐམས་ཅད་བསད་པ་ཡིན།

34སྐབས་དེར་རང་ཅག་གིས་ཁོའི་གྲོང་ཁྱེར་ཐམས་ཅད་དབང་དུ་བསྡུས་པ་དང་། གྲོང་ཁྱེར་རེ་རེའི་སྐྱེས་པ་དང་བུད་མེད་དང་བྱིས་པ་རྣམས་མེད་པར་བཏང་ནས་མི་གཅིག་ཀྱང་ཤུལ་དུ་མ་བསྐྱུར།

35རང་རང་གི་ཕྱིར་ཕྲོགས་པའི་སྒོ་ཕྱུགས་རྣམས་དང་གྲོང་ཁྱེར་རྣམས་བླངས་ནས་ཐོབ་པའི་བཅོམ་ནོར་འབའ་ཞིག་བསྐྱུར་བ་ཡིན།

36ཨར་ནོན་གྲོག་རོང་གི་འགྲམ་དུ་ཡོད་པའི་ཨ་རོ་ཨེར་དང་། གཡང་རོང་དུ་ཆགས་པའི་གྲོང་ཁྱེར་ནས་གིལ་ཨད་ཀྱི་བར་དུ་གྲོང་ཁྱེར་ཆེན་པོ་རང་ཅག་གིས་མི་ལོན་པ་གང་ཡང་མེད་ལ། རང་ཅག་གི་དཀོན་མཆོག་ཡ་ཝཱེས་དེ་ཐམས་ཅད་རང་ཅག་ལ་སྤྲད་པ་ཡིན།

37ཨམ་མོན་པའི་ཡུལ་དང་། ཡཱབ་པོག་ཆུ་བོའི་འགྲམ་རྒྱུད་དང་རི་ཁུལ་གྱི་གྲོང་ཁྱེར་རྣམས་དང་། རང་ཅག་གི་དཀོན་མཆོག་ཡ་ཝཱེས་འགྲོ་མི་རུང་བར་གསུངས་པའི་ཡུལ་རྣམས་ལ་བདག་ཅག་མ་བཅར་ཏོ། །

← Chapter 1 Jump to: Chapter 3 →